އެމެރިކާގެ ހައުސް އޮފް ރެޕްރެޒެންޓެޓިވްސްގެ ސްޕީކަރ ނެންސީ ޕެލޯސީ އޭޝިޔާ ބައެއްގައުމުތަކަށް ކުރައްވާ ދަތުރުފުޅެއް ފައްޓަވާކަން އެކަމަނާގެ އޮފީހުން އިއުލާންކޮށްފިއެވެ. ޕެލޯސީގެ އޮފީހުން އާދީއްތަ ދުވަހު ނެރުނު ބަޔާނެއްގައި ބުނެފައިވަނީ، މިދަތުރުގައި އެކަމަނާ ވަޑައިގަތުމަށް އަދި ހަމަ ޖެހިފައިވަނީ ސިންގަޕޯރ، މެލޭޝިޔާ، ދެކުނު ކޮރެޔާ، އަދި ޖަޕާނަށްކަމަށެވެ. ޕެލޯސީ ހަމަ މިސަރަހައްދުގައި ހިމެނޭ ޓައިވާނަށް ދަތުރުފުޅެއް ކުރައްވަން އުޅުއްވާކަމަށް ވަރަށް ބޮޑަށް އަޑުއަރާފައި އޮތްނަމަވެސް، މިފަހަރު ވަޑައިގަންނަވާ ގައުމުތަކުގެ ލިސްޓުގައި ޓައިވާނުގެ ނަމެއް ނުހިމެނެއެވެ.

ޗައިނާއިން ދައުވާކުރަމުން އަންނަނީ ޓައިވާނަކީ އެގައުގެ ތަނެއްކަމަށެވެ. އަދި ޕެލޯސީ ޓައިވާނަށް ދަތުރުފުޅެއް ކުރައްވައިފިނަމަ ސީރިއަސް ކަންތައްތަކެއް ހިނގާނެކަމަށް ޗައިނާއިން ނިމުނު ހަފްތާގައި އިންޒާރުދީފައިވެއެވެ.

ފާއިތުވި 25 އަހަރުވެސް އެމެރިކާގެ އެންމެ މަތީ ފެންވަރުގެ ބޭފުޅަކު ޓައިވާނަށް ވަޑައިގެންފައެއްނުވެއެވެ.

މިފަހަރުގެ ދަތުރުފުޅާބެހޭގޮތުން ނެންސީ ޕެލޯސީ ކުރެއްވި ޓްވީޓްގައި ވަނީ; ކޮންގްރެސްގެ ހަ ބޭފުޅުން ހިމެނޭ ވަފުދަކާއެކު ފައްޓަވާ ދަތުރުފުޅުގެ ބޭނުމަކީ، އޭޝިޔާ ސަރަހައްދުގައިވާ އެމެރިކާގެ ރަހުމަތްތެރި ގައުމުތަކަށް އެމެރިކާއިން ކުރާ ދެގޮތެއްނުވާ ތާއީދު އިތުރަށް ޔަގީންކޮށްދިނުންކަމުގައެވެ.

މިދަތުރުފުޅުގައި މައިގަނޑުގޮތެއްގައި މަޝްވަރާކުރެވޭނީ; ސެކިއުރިޓީ، އިކޮނޮމިކް ޕާޓްނަރޝިޕް، އަދި އިންޑޯ ޕެސިފިކް ސަރަހައްދުގައި ޑިމޮކްރެޓިކް ގަވަނަންސް އޮތް ހާލަތާބެހޭގޮތުން ކަމަށް ޕެލޯސީގެ އޮފީހުން ބުނެފައިވެއެވެ. މީގެ އިތުރުން ޓްރޭޑް، މޫސުމަށް އަންނަ ބަދަލުތައް، އަދި އިންސާނީ ހައްގުތަކުގެ މައްސަލައާ ގުޅޭގޮތުންވެސް ވާހަކަތައް ކުރިޔަށްދާނެކަމަށް އޮފިޝަލުން ހާމަކުރެއެވެ.  

ޕެލޯސީ އެޕްރީލް މަހު ޓައިވާނަށް ދަތުރުފުޅެއް ކުރައްވަން މަސައްކަތްޕުޅުކުރެއްވިއެވެ. ނަމަވެސް ކޮވިޑަށް ޕޮޒިޓިވްވުމުގެ ސަބަބުން އެދަތުރުފުޅު ކެންސަލްކުރެއްވީއެވެ. ނެންސީ ޕެލޯސީއަކީ އެމެރިކާގެ ވެރިކަމުގެ ބާރުގެ ގޮތުން، ރައީސް ޖޯ ބައިޑަންއާއި ނާއިބު ރައީސް ކަމަލާ ހެރިސްއަށްފަހު ތިންވަނައަށް އެންމެ އިސް ފަރާތެވެ.