2015ން 2018ށް ރަށްރަށުގައި ހިންގާފައިވާ ފެނުގެ މަޝްރޫއުތައް އެންމެ އެކަށީގެންވާގޮތުގައި ތަންފީޒުކޮށްފައެއްނުވޭ – އޮޑިޓް
2015ން 2018ށް ހިންގާފައިވާ 18 މަޝްރޫއުގެ ތެރެއިން %94 މަޝްރޫއުގެ މުއްދަތު އިތުރުކޮށްދީފައިވޭ
ރަށެއްގައި ބަހައްޓާފައި ހުރި ފެން ޕްލާންޓެއް
ވާރޭ ފެން ނަގާ ރައްކާކުރާ ނިޒާމް ގާއިމްކުރުމަށް އެކި ރަށްރަށުގައި ހިންގާފައިވާ މަޝްރޫއުތައް އެންމެ އެކަށީގެންވާ ގޮތުގައި ތަންފީޒުކޮށްފައި ނުވާކަމަށް, ހޫނު މޫސުމުގައި ރާއްޖޭގެ ރަށްތަކަށް ބޯފެން ފޯރުކޮށްދިނުމާގުޅޭ ޕަރޕޯމެންސް އޮޑިޓް ރިޕޯޓުގައި ބުނެފިއެވެ.
މި ރިޕޯޓުގައި ބުނެފައިވަނީ، ވާރޭފެން ރައްކާކުރާ ނިޒާމު ގާއިމުކުރުމަށް ހިންގާފައިވާ މަޝްރޫއުތަކަށް އެކަށީގެންވާވަރަށްވުރެ ދިގު މުއްދަތެއް އިތުރުކޮށްދީފައިވާކަމަށެވެ. އެގޮތުން ވާރޭފެން ނަގާ ރައްކާކުރާ ނިޒާމު ގާއިމުކުރުމަށް ބީލަން ހުށަހަޅާފައިވާ ކޮންޓްރެކްޓަރުން، އެވްރެޖްކޮށް 72 ދުވަހުގެތެރޭގައި މަސައްކަތް ނިންމޭނެކަމަށް ބަޔާންކޮށްފައިވާކަމަށެވެ. އަދި، މިނިސްޓްރީ އޮފް އެންވަޔަރަންމަންޓާއި އެކިއެކި ކޮންޓްރެކްޓަރުންނާއެކު ހެދިފައިވާ އެއްބަސްވުންތަކުގައި އެންމެ ކުރު މުއްދަތެއްގެ ގޮތުގައި 30 ދުވަސް، އަދި އެންމެ ދިގު މުއްދަތެއްގެ ގޮތުގައި 90 ދުވަސް ހިމަނާފައިވާކަމަށެވެ.
ނަމަވެސް، 2015ން 2018 ވަނަ އަހަރަށް ހިންގާފައިވާ 18 މަޝްރޫއުގެ ތެރެއިން 94 އިންސައްތަ މަޝްރޫއުގެ މުއްދަތު އިތުރުކޮށްދީފައިވާކަމަށާއި، މުއްދަތު އިތުރުކޮށްނުދީ މަސައްކަތް ނިންމާލެވިފައިވަނީ އެންމެ މަޝްރޫއެއްގައިކަމަށް އޮޑިޓްގައި ބުނެފައިވެއެވެ. އަދި، 28 އިންސައްތަ މަޝްރޫއަށް، ފުރަތަމަ އެއްބަސްވި މުއްދަތަށްވުރެ 3 ގުނަ އިތުރަށް މުއްދަތު ދީފައިވާކަމަށް އޮޑިޓްގައި ބުނެފައިވެއެވެ.
އޮޑިޓްގައި ބުނެފައިވަނީ މަޝްރޫއާގުޅޭ ލިޔުންތަކުން ފާހަގަވެފައިވާގޮތުގައި، މުއްދަތު އިތުރުކުރަންޖެހިފައިވަނީ މަސައްކަތުގެ ކުރެހުމަށް ރަށު ކައުންސިލް އިދާރާތަކުން ގެނައި ބަދަލު ގެނައުމަށް އިތުރު ދުވަސް ބޭނުންވާތީއާއި، ތާނގީތައް ބަހައްޓަން ހަދާ ސްޓޭޝަނާއި ސިމެންތީގެ އެހެނިހެން މަސައްކަތް ކުރުމަށް ރާވާފައިވާ ދުވަސްތަކުގައި މޫސުން ގޯސްވެ ވިއްސާރަ ވުމުންނާއި، އެއްބަސްވުމުގެ ބައެއް މާއްދާތަކަށް ކައުންސިލް އިދާރާއާ މިނިސްޓްރީ އޮފް އެންވަޔަރަންމަންޓުން ގެންނަން ފެނުނު ބަދަލުތައް ގެނައުމާ ގުޅިގެންކަމަށް ލިޔެކިޔުންތަކުން ދައްކާކަމަށެވެ.
އަދި، މަސައްކަތްކުރުމަށް ބޭނުންވާ މެޓީރިއަލް ނުވަތަ ސާމާނުތައް މާލެއިން ގެނައުމަށް ގިނަ ދުވަސްތަކެއް ހޭދަވުމާއި، ކަސްޓަމްސްއިން މުދާ ކްލިއަރކޮށް މަޝްރޫއު ހިނގާ ސައިޓާހަމައަށް މެޓީރިއަލް ފޯރުމަށް ގިނަ ދުވަސްތަކެއް ހޭދަވާކަމަށް ކޮންޓްރެކްޓަރުގެ ފަރާތުން މިނިސްޓްރީއާއެކު ބަދަލުކޮށްފައިވާ ލިޔެކިޔުންތަކުންވެސް ފާހަގަކުރެވިފައިވާކަމަށެވެ.
މީގެ އިތުރުން، އެއްބަސްވުމުގައި ކަނޑައަޅާފައިވާ މުއްދަތަށްވުރެ އެތައް ގުނައެއް އިތުރުކޮށްދިނުމަކީ، މަޝްރޫއުތަކަށް ހޭދަވާނެ މުއްދަތު ދިރާސާނުކޮށް މަޝްރޫއުތަކުގެ މުއްދަތު އެކުލަވާލާފައިވާކަމުގެ ހެތްކެއްކަމަށާއި، ކޮންޓްރެކްޓަރަށް ދިމާވާ އެކިއެކި މައްސަލައާ ގުޅިގެން ހުށަހަޅާ ލިޔުންތަކަށް ރިއާޔަތްކޮށް އެއްބަސްވެފައިވާ މުއްދަތުތަކަށް ބަދަލު ގެނައުމަކީ ބީލަންތަކުގައި މަސައްކަތް ނިންމަން ހިމަނާފައިވާ މުއްދަތު މުރާޖައާކޮށް، ބަދަލުގެންނަން ޖެހޭކަމެއްކަން ފާހަގަކޮށްފައިވެއެވެ.
