އެމްޑީޕީ މެމްބަރުންގެ ލޮލުން ކަރުނަ އޮހޮރޭ ހިސާބަށް މިއަދު ކަންކަން ގޮސްފި: ރީކޯ މޫސާ
31 ޖުލައި 2022 | އާދީއްތަ 08:08ޕާޓީގެ ލީޑަރޝިޕްގައި ހަރުދަނާ އުސޫލުތަކެއް ގެންގުޅެންޖެހޭ
އެމްޑީޕީގެ ކުރީގެ ޗެއަރޕަރސަން މޫސާ މަނިކު (ރީކޯ މޫސާ)
މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ އާންމު މެމްބަރުންގެ ލޮލުން ކަރުނަ އޮހޮރޭ ހިސާބަށް މިއަދު ކަންކަން ގޮސްފަައިވާކަމަށް އެޕާޓީގެ ކުރީގެ ޗެއަރޕަރސަން މޫސާ މަނިކު (ރީކޯ މޫސާ) ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަ ދައްކަވަމުން މޫސަ ވިދާޅުވީ، ޕާޓީގެ ލީޑަރޝިޕްގައި ހަރުދަނާ އުސޫލުތަކެއް ގެންގުޅެންޖެހޭ ކަމަށެވެ. އެގޮތުން ވާހަކަ ދައްކައިގެން ޙައްލު ނުވާ ހިސާބުން ފިޔަވަޅު އެޅުމަކީ މީގެ ކުރިންވެސް އެމްޑީޕީން އަމަލު ކުރަމުން އައިސްފައިވާ ގޮތެއްކަން މޫސަ ފާހަގަ ކުރެއްވިއެވެ.
ޕާޓީގެ ލީޑަރޝިޕުން ހިތްހަމަނުޖެހުމުން ޕާޓީގެ އިސް މަޤާމުތަކުގައި ތިއްބެވި ފަރާތްތައް މަޤާމުން ވަކި ކުރައްވާފައިވާކަމަށް މޫސަ ވިދާޅުވިއެވެ.
ރިޔާސީ އިންތިޚާބު ބޯމަތިވެގެން އަންނައިރު، އެމްޑީޕީގެ ލީޑަރޝިޕުން މިކަންކަމަށް ޙައްލުތަކެއް ގެންނާނެކަމުގެ އުއްމީދު އެބައޮތްކަމަށްވެސް މޫސަ ވިދާޅުވިއެވެ.
އެމްޑީޕީގެ އެންމެ މުހިއްމު ބަޔަކީ އެމްޑީޕީގެ ގްރާސްރޫޓުކަން ފާހަގަ ކުރައްވައި މޫސަ ވިދާޅުވީ، ޕާޓީއަށް ދިމާވާ ކޮންމެ ކަމެއްގައިވެސް އެންމެ ކުރީގައި ތިބޭނީ އެ މެމްބަރުން ކަމަށެވެ. ވީއިރު އެމްޑީޕީއަށް މުހިއްމުވާން ޖެހޭނީ ޕާޓީއަށް ލޮޅުން އެރިޔަ ނުދީ ހިފެހެއްޓުންކަންވެސް މޫސަ ފާހަގަ ކުރެއްވިއެވެ.
މިހާރު ދިމާވެގެން މި އުޅޭ ކަންކަމަކީ އެމްޑީޕީގެ ޤައުމީ މަޖިލީހާއި އެމްޑީޕީގެ މެމްބަރުން ވާހަކަ ދައްކައިގެން ޙައްލު ކުރެވެންޖެހޭ ކަންކަން ކަމަށްވެސް މޫސަ ވިދާޅުވިއެވެ.
މޫސަ ވިދާޅުވީ، ޕާޓީގެ ތެރެއަށް ލޮޅުން އަންނަ ވަރަކަށް އިދިކޮޅުން އެކަމުގެ އުފާ ފާޅު ކުރާނެ ކަމަށެވެ. އެހެންނަމަވެސް، އިދިކޮޅު ޕާޓީ ތެރޭގައިވެސް އެހާމެ މައްސަލަތައް އުޅޭނެކަމަށް މޫސަ ވިދާޅުވިއެވެ.
މޫސަ ވިދާޅުވީ ކުރިއަށް މިއޮތީ ރިޔާސީ އިންތިޚާބު ކަމަށާއި، އެމްޑީޕީ ފުނޑުފުނޑުވެގެންދާން އިދިކޮޅުން އަބަދުވެސް ވަރަށް ބޭނުންވާކަމަށެވެ. އަދި މި ދަނޑިވަޅުގައި ޕާޓީ ފުނޑުފުނޑުވެދިޔަ ނުދިނުމަށް މޫސަ ވަނީ އެމްޑީޕީގެ ލީޑަރޝިޕަށް ގޮވާލައްވާފައެވެ.
އޭގެ އިތުރުން، މިއަދު ރާއްޖޭގެ އިދިކޮޅުގެ ރޯލު އަދާ ކުރާ މަންޒަރު ފެންނަނީ މީޑިއާއިން ކަމަށްވެސް މޫސަ ވިދާޅުވިއެވެ.
މޫސަ ވިދާޅުވީ، އެމްޑީޕީގެ އެތެރޭގައި ހިނގައިގެން އުޅޭ ހަމަނުޖެހުމަކީ އިދިކޮޅަށް ވަރަށް ފޯރިގަދަ ކަމަކަށް ވެދާނެ ކަމަށެވެ.
