އެމެރިކާގެ ކެންޓަކީ ސްޓޭޓަށް ބޯކޮށް ވާރޭވެހި ވަރަށް ބޮޑަށް ފެންބޮޑުވުމުގެ ސަބަބުން 16 މީހުން މަރުވެ ބޮޑެތި ގެއްލުންތަކެއް ލިބިއްޖެއެވެ. ކެންޓަކީގެ ގަވަނަރ އެންޑީ ބިޝެއަރ ވިދާޅުވީ، ހާލަތު ވަރަށް ސީރިއަސްކަމަށާއި ގިނަ އަދަދެއްގެ ގެތަކެއް ފެނުއަޑިޔަށް ގޮސްފައިވުމާއެކު، މަރުވި މީހުންގެ އަދަދު އަދިވެސް އިތުރުވާނެކަމަށް ބެލެވޭ ކަމުގައެވެ. މިހާތަނަށް މަރުވި މީހުންގެތެރޭގައި އެއް އާއިލާއަކަށް ނިސްބަތްވާ 4 ކުދިންނާއެކު 6 ކުޑަކުދިންވެސް ހިމެނެއެވެ.

ކެންޓަކީއަށް ދެދުވަހުގެ ތެރޭގައި ވަނީ ދެމަސްދުވަހު ވެހޭހާ ވާރޭ ވެހިފައިކަމަށްވެއެވެ. އަދި ވަރަށް ބޮޑު ސަރަހައްދެއްގައި ފެންބޮޑުވެފައިވާއިރު، ބައެއް ހިސާބުތަކުގައި ފުރާޅާ ހަމައަށްވެސް ފެންގަނޑު ވަނީ ހެދިފައެވެ. އެ ސްޓޭޓްގެ 23,000އެއްހާ މީހުން މިވަގުތު ވަނީ ކަރަންޓުގެ ޚިދުމަތުންވެސް މަހުރޫމްވެފައެވެ.

ހާލަތު ވަރަށް ގޯސްވެފައިވުމާއެކު އެމެރިކާގެ ރައީސް ބައިޑަންވެސްވަނީ މިއީ ބޮޑު ޑިޒާސްޓަރއެއް ކަމަށް އިއުލާންކުރައްވާފައެވެ. އަދި އެހީގެ މަސައްކަތްތައް އަވަސްކުރުމަށް ފެޑަރަލް ސަރުކާރަށް ވަނީ އަންގަވާފައެވެ.

ފެންބޮޑުވި ހިސާބުތައް ހެލިކޮޕްޓަރުގައި ބައްލަވާލެއްވުމަށްފަހު ގަވަނަރ އެންޑީ ބިޝެއަރ ވިދާޅުވީ، މިއީ އޭނާގެ ހަޔާތުގައިވެސް މިހާތަނަށް ފެނިފައިވާ އެންމެ ސީރިއަސް ފެންބޮޑުވުމުގެ ހާދިސާ ކަމަށެވެ. ފެންބޮޑުވުމުގެ ސަބަބުން މަގުތައް ބަންދުވެ ބައެއް ހިސާބުތަކަށް ދެވޭނެ ގޮތެއްވެސް ނެތިފައިވާކަން އޭނާ ފާހަގަކުރެއްވިއެވެ.

އެމެރިކާގެ އިތުރުން އީރާނާއި ޔޫއޭއީގަވެސް ބޯކޮށް ވާރޭ ވެހި ފެންބޮޑުވުމުގެ ސަބަބުން އެތައް ބަޔަކު މަރުވެ ބޮޑެތި ގެއްލުންތައް ލިބިފައިވެއެވެ.