މާލޭގެ ބައެއް މަގުތަކުގައި ފެން ބޮޑުވެއްޖެ
21 ޑިސެމްބަރު 2024 | ހޮނިހިރު 04:52މި ދިޔަ 24 ގަޑީއިރުގެ ތެރޭގައި މާލެ އަށް 136.5 މިލިމީޓަރުގެ ވާރޭ ވެހިފައިވޭ
މާލޭގެ ބައެއް މަގުތަކުގައި ވަނީ ފެން ބޮޑުވެފައި
ބޯކޮށް ވާރޭވެހި މާލޭގެ ބައެއް މަގުތަކުގައި ފެންބޮޑުވެއްޖެ އެވެ.
އެމްއެންޑީއެފް އިން ބުނެފައިވާ ގޮތުގައި ގޭބިސީތަކަށް ފެންވަންނަމުންދާތީ އެހީތެރިކަން ފޯރުކޮށްދިނުމުގެ ގޮތުން ވެލިބަސްތާ ޖެހުމުގައި އެމްއެންޑީއެފް މާލޭ އޭރިއާ ކޮމާންޑްގެ ސިފައިން ވަނީ ހޮނިހިރު ދުވަހު ހެނދުނު ހަރަކާތްތެރިވެފައެވެ.
މޫސުމާ ބެހޭ އޮފީހުން ބުނެފައިވަނީ މި ދިޔަ 24 ގަޑީއިރުގެ ތެރޭގައި މާލެ އަށް 136.5 މިލިމީޓަރުގެ ވާރޭ ވެހިފައިވާ ކަމަށެވެ.
މިދިޔަ 24 ގަޑީއިރު ގެ ތެރޭގައި ރާއްޖޭގެ ބޮޑު ބަޔަކަށް ވިއްސާރަ ކޮށްފައި ވާއިރު އެންމެ ގިނަ އިން ވާރޭ ވެހިފައިވާ ކަމަށް ރެކޯޑް ކުރެވިފައި ވަނީ ވެސް މާލެ އަށެވެ.
މާލެ އަށް ފަހު ދެން އެންމެ ގިނައިން ވާރޭ ވެހުނީ ހުޅުލެ އަށެވެ. ހުޅުލެ އަށް 117.4 މިލިމީޓަރުގެ ވާރޭ ވެހިފައިވެއެވެ.
ގިނައިން ވާރޭ ވެހުނު ރަށްތަކުގެ ތެރޭގައި ބ. އަތޮޅު ދަރަވަންދޫ ވަނީ ހިމެނިފައެވެ. ދަރަވަންދޫ އަށް 24 ގަޑީއިރުގެ ތެރޭގައި 111.5 މިލިމީޓަރުގެ ވާރޭ ވަނީ ވެހިފައެވެ.
މިހާރު ކުރަމުންދާ ވިއްސާރައިގައި ފާއިތުވި 24 ގަޑިއިރު އެންމެ ގިނައިން ވާރޭ ވެހިފައިވަނީ ބ. އަތޮޅާއި އއ. އަތޮޅާއިި ދެމެދުގެ ރަށްތަކަށެވެ.
