އީޕީއެސްގެ 54 ވަނަ އަހަރީ ދުވަސް ފާހަގަ ކުރަން މުސްކުޅި ދަރިވަރުންނަށް ހާއްސަ ހަރަކާތެއް
29 ޖުލައި 2022 | ހުކުރު 13:17އީޕީއެސް ފައުންޑޭޝަންގެ މި ހަރަކާތް އޮންނާނީ ހޮނިހިރު ދުވަހުގެ ރޭ 8:30 ގައި ގިޔާސުއްދީން އިންޓަނޭޝަނަލް ސްކޫލްގައި
އީޕީއެސް
އީޕީއެސް ސްކޫލް ހުޅުތާ 54 އަހަރު ފުރުން ފާހަގަ ކުރުމަށް އީޕީއެސް ފައުންޑޭޝަނުން ހާއްސަ ހަރަކާތެއް ބާއްވަން ނިންމައިފިއެވެ.
އީޕީއެސްގެ މުސްކުޅި ދަރިވަރުންނާއި އެ ފަރާތްތަކުގެ އާއިލާތަކަށް ހާއްސަކޮށްގެން ބާއްވާ މި ހަރަކާތް އޮންނާނީ ހޮނިހިރު ދުވަހުގެ ރޭ 8:30ގައި ގިޔާސުއްދީން އިންޓަނޭޝަނަލް ސްކޫލުގައެވެ. މިއީ އާއިލީ ހަވީރެއް ގޮތަށް ކުރިއަށްގެންދާ ހަރަކާތެކެވެ.
މި ހަރަކާތާ ގުޅޭ ގޮތުން އީޕީއެސް ފައުންޑޭޝަނުގެ ރައީސް މަރިޔަމް އާދިޔާ "ރާއްޖެ ޓީވީ" އަށް ވިދާޅުވީ މިއީ އީޕީއެސްގެ ނަން ފަނޑުވިޔަ ނުދިނުމަށް ކުރަމުން އަންނަ މަސައްކަތުގެ ދަށުން ކުރިއަށްގެންދާ ހަރަކާތެއް ކަމަށެވެ. މި ހަރަކާތުގެ ޒަރީއާއިން އީޕީއެސް އިން ކިޔެވި ދަރިވަރުން އެއްތަނަކުން ދިމާވެ އެކަކު އަނެކަކާ ގުޅުން ބަދަހި ކުރުމުގެ ފުރުސަތު ލިބިގެންދާނެ ކަމަށް އޭނާ ވިދާޅުވިއެވެ.
އާދިޔާ ވިދާޅުވީ ރާއްޖެއަށް ބޭނުންތެރި އަދި އުފެއްދުންތެރި ދަރިވަރުންތަކެއް ނެރެދިން ސްކޫލެއްގެ ނަން ފަނޑުވިޔަ ނުދިނުމަކީ މުހިންމު ކަމެއް ކަމަށެވެ. އީޕީއެސް ފައުންޑޭޝަނުން ކުރަމުންގެންދަނީ އެ މަސައްކަތް ކަމަށާއި މިހާރުވެސް ގިނަ ހަރަކާތްތަކެއް ކުރިއަށްގެންގޮސްފައިވާ ކަމަށް ވިދާޅުވިއެވެ.
އީޕީއެސް އިން ކިޔެވި ދަރިވަރުންގެ ތެރެއިން ރާއްޖޭގެ މަތީ މަގާމުތަކުގައި ހިމެނޭ ބޭފުޅުންގެ ތެރޭގައި ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙް އާއި ރައީސުލްޖުމްހޫރިއްޔާގެ ނައިބު ފައިސަލް ނަސީމް ހިމެނިވަޑައިގަންނަވައެވެ. އަދި ރާއްޖޭގައި ފާހަގަ ކޮށްލެވޭ ޑޮކްޓަރުންނާއި ޝަރުޢީ ދާއިރާގެ ބޭފުޅުންނާއި އެހެނިހެން މުހިންމު ދާއިރާތަކުގެ އިސް ބޭފުޅުން ވެސް މީގެ ތެރޭގައި ހިމެނެއެވެ.
އީޕީއެސްގެ ބޭނުން ރާއްޖެއަށް މުހިންމުކަން ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙް ވެސް ވަނީ ފާހަގަ ކުރައްވާފައެވެ. އެގޮތުން އީޕީއެސް ފައުންޑޭޝަނުން މިދިޔަ އަހަރު ބޭއްވި "ޚިދުމަތުގެ ހަވީރު" ހަފްލާގައި ރައީސް ވިދާޅުވީ އީޕީއެސް އުފެދިގެން އައީ، ދިވެހިރާއްޖެ، ތަޢުލީމީ ދާއިރާއަށް ވަރަށް ބޮޑަށް ބޭނުންވެފައި އޮތް ދަނޑިވަޅެއްގައިކަމަށެވެ. އެއީ ދުރުވިސްނޭ، ދިވެހިރާއްޖެއަށް ހެޔޮއެދޭ، ޚާއްޞަކޮށް، ރާއްޖޭގެ ތަޢުލީމަށް ލޯބިކުރާ އޭރުގެ ދިވެހި ޒުވާނުންތަކެއް އިސްނަގައިގެން ކުރެއްވި ވަރަށް މުހިންމު އަގުނުކުރެވޭވަރުގެ ބޮޑު ޚިދުމަތެއް ކަމަށް ރައީސް ވިދާޅުވިއެވެ.
އީޕީއެސް ސްކޫލް އަލުން ހުޅުވުމުގެ މަސައްކަތް ވެސް އީޕީއެސް ފައުންޑޭޝަނުން އަންނަނީ ކުރަމުންނެވެ. އެ ސްކޫލް ބަންދު ކުރިއިރު އެ ސްކޫލުން ތައުލީމު ހާސިލުކޮށްގެން 26،000 އަށްވުރެ ގިނަ ދަރިވަރުން މުޖުތަމައަށް ނުކުމެފައިވާ ކަމަށް އެ ސްކޫލުން ވަނީ ބުނެފައެވެ.
