ޤައުމެއް ތަރައްޤީވެ ކުރިއަށްދަނީ ތަޢުލީމާ އެކީގައި ދެވޭ ތަރުބިއްޔަތާއި ތަމްރީނުގެ ތެރެއިން: ރައީސް
21 ޑިސެމްބަރު 2021 | އަންގާރަ 19:59ރައީސް ވިދާޅުވީ ރާއްޖެ މިއޮތީ އަނެއްކާވެސް އީ.ޕީ.އެސް އަކަށް ބޭނުންވެފައި ކަމަށް
އީޕީ.އެސް. ފައުންޑޭޝަންގެ ފަރާތުން ބޭއްވެވި ހަވީރުގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވާހަކަފުޅުދައްކަވަނީ
ޤައުމެއް ތަރައްޤީވެ ކުރިއަށްދަނީ، އެ ޤައުމެއްގެ ދަރިންނަށް ދެވޭ ތަޢުލީމެއްގެ ސަބަބުން އެކަނި ނޫންކަމަށާއި ދެވޭ ތަޢުލީމަކާ އެކީގައި، ދެވޭ ތަރުބިއްޔަތަކާއި، ތަމްރީނުތަކެއްގެ ތެރެއިން ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
އީ.ޕީ.އެސް. ފައުންޑޭޝަންގެ ފަރާތުން ބޭއްވެވި "ޚިދުމަތުގެ ހަވީރު" ހަފްލާގައި ވާހަކަދައްކަވަމުން ރައީސް ވިދާޅުވީ އީ.ޕީ.އެސް. އިން ކޮށްދިން ކަމަކީ އެއީ ކަމަށެވެ. ދެވުނު ތަޢުލީމާ އެކީގައި ދަރިވަރުން ތަރުބިއްޔަތުކޮށް ތަމްރީނުތައްދީ މުޅި މުޖުތަމަޢަށް ލޯ ހުޅުވާލަދިން ކަމަށް ރައީސް ވިދާޅުވިއެވެ. މިއަދު ރާއްޖޭގެ ކޮންމެ ދިމާއަކަށް ބަލައިލި ނަމަވެސް، ކޮންމެ ދާއިރާއަކަށް ބަލައިލި ނަމަވެސް، މިކަމުގެ ޙަޤީޤަތް އެއޮތީ ސާފުކޮށް ފެންނަން ކަމަށް ރައީސް ވިދާޅުވިއެވެ.
މި މަޤްޞަދު ހާސިލު ކުރުމަށްޓަކައި އީ.ޕީ.އެސް.ގައި ކިޔަވައިދިނުމުގެ އިތުރަށް، އިތުރު އެތައް ކަންތައްތަކެއް ކޮށްދެއްވިކަމަށެވެ. ރައީސް ވިދާޅުވީ ރާއްޖެ މިއޮތީ އަނެއްކާވެސް އީ.ޕީ.އެސް އަކަށް ބޭނުންވެފައި ކަމަށެވެ.
ރައީސް ވިދާޅުވީ މީގެ ގާތްގަނޑަކަށް 52 އަހަރު ކުރިން، އީ.ޕީ.އެސް. އުފެދިގެން އައީ، ދިވެހިރާއްޖެ، ތަޢުލީމީ ދާއިރާއަށް ވަރަށް ބޮޑަށް ބޭނުންވެފައި އޮތް ދަނޑިވަޅެއްގައިކަމަށެވެ. އެއީ ދުރުވިސްނޭ، ދިވެހިރާއްޖެއަށް ހެޔޮއެދޭ، ޚާއްޞަކޮށް، ރާއްޖޭގެ ތަޢުލީމަށް ލޯބިކުރާ އޭރުގެ ދިވެހި ޒުވާނުންތަކެއް އިސްނަގައިގެން ކުރެއްވި ވަރަށް މުހިންމު އަގުނުކުރެވޭވަރުގެ ބޮޑު ޚިދުމަތެއް ކަމަށް ރައީސް ވިދާޅުވިއެވެ.
ރައީސް ވިދާޅުވީ 1960ގެ އަހަރުތަކުގައި، ރާއްޖޭގެ ތަޢުލީމީ ދާއިރާއަށް ބޮޑެތި ބަދަލުތަކެއް އައިކަމަށެވެ. 1960ގެ ތެރޭގައި ފެށިގެން އައިއިރުގައި، އޭރުގެ ސަރުކާރުން އިންގްލިޝް މީޑިއަމަށް ކިޔަވައިދިނުމުގެ މަސައްކަތް ފެށްޓެވިކަމަށް ރައީސް ވިދާޅުވިއެވެ. އޭރުގެ ތައުލީމީ ހާލަތު ކިޔައިދެއްވަމުން ރައީސް ވިދާޅުވީ ސަރުކާރުން އޭރު ގެންނެވި އަނެއް ބަދަލަކީ، މާލޭގެ އަވަށްތަކުގައި ހިނގަމުންދިޔަ ސްކޫލްތައް އުވާލުންކަމަށެވެ. އޭގެ ސަބަބުން މާލޭގައި ތަޢުލީމު ބޭނުންވެފައި ތިބި އެތައް ދަރިވަރުންނަކަށް، އެ ފުރުޞަތު ގެއްލިގެންދިޔަ ކަމަށް ރައީސް ވިދާޅުވިއެވެ.
އެކަމުގެ ސަބަބުން މާލޭގައި ތައުލީމަށް ބޭނުންވެފައި ތިބި އެތައް ދަރިވަރުންތަކަކަށް ފުރުސަތު ގެއްލުނުއިރު މާލެއަށް ރަށްރަށުން އަންނަ ކުދިންނަށްވެސް އޮތީ ވަރަށް ހަނި ފުރުސަތެއްކަމަށް ރައީސް ވިދާޅުވިއެވެ.
ރައީސް ވިދާޅުވީ ގާތްގަނޑަކަށް 83 ދަރިވަރުންނާއި، 13 ޓީޗަރުންނާ އެކުގައި މުޞްޠަފާ އަމިއްލަފުޅު ގޭގައި އީޕީއެސް ފެށްޓެވިކަމަށެވެ. އީ.ޕީ.އެސް. އަށް 52 އަހަރު ފުރިގެންދާއިރުގައި، ހަތާވީސްހާހެއްހާ ދަރިވަރުން ތަޢުލީމު ޙާޞިލުކޮށް، އެކި ދާއިރާގައި މިހާރު ޚިދުމަތް ކުރަމުން އެބަގެންދާކަމަށް ރައީސް ވިދާޅުވިއެވެ.
ރައީސްގެ ވާހަކަފުޅުގައި ވަނީ އީޕީއެސްގައި އޭރު ކިޔަވައިދެއްވި ޓީޗަރުންނާއި ހިންގެވުމުގައި ތިއްބެވި ބޭފުޅުންގެ ހަނދާން އައު ކުރައްވާފައެވެ.
