ގެއްލި ނުދަނީސް، އައު ފުރާޅެއްގެ ދަށުން ދިރުވަން ޖެހޭ: އީ.ޕީ.އެސް ފައުންޑޭޝަން
22 ޑިސެމްބަރު 2021 | ބުދަ 02:33ތައުލީމުން މަހުރޫމްކުރި އެތައް ކުދިންތަކެއް އަގުހުރި ލީޑަރުންނަށް ހަދައިދިން
ޚިދުމަތުގެ ހަވީރުގެ ހަފްލާގެ ތެރެއިން،
އީ.ޕީ.އެސް މާޒިވެ ގެއްލި ނުދަނީސް، އައު ފުރާޅެއްގެ ދަށުން އެސްކޫލު އަލުން ދިރުވަން ޖެހޭ ކަމަށް އީ.ޕީ.އެސް ފައުންޑޭޝަނުން ބުނެފިއެވެ.
އީ.ޕީ.އެސް. ފައުންޑޭޝަންގެ ފަރާތުން ބޭއްވި "ޚިދުމަތުގެ ހަވީރު" ހަފްލާގައި އެ ފައުންޑޭޝަންގެ ރައީސް މަރިޔަމް އާދިޔާ ވިދާޅުވީ އީ.ޕީ.އެސް ސްކޫލަކީ ރާއްޖޭގައި މިހާތަނަށް އުފައްދާފައިވާ އެންމެ ކާމިޔާބު އަމިއްލަ ސްކޫލު ކަމަށާއި، ތައުލީމަށް މަހުރޫމް ކުރެވި، ގައުމުގައި ބާކީ ކުރެވިފައިވާ އެތައް ކުދިންތަކެއް އަގުހުރި ލީޑަރުންނަށް ބަދަލުކޮށްދިން ފަޚުރުވެރި މަންމައެއް ކަމަށެވެ.
އާދިޔާ ވިދާޅުވީ އީ.ޕީ.އެސްއިން ރަސްމީ ކްލާސްތަކާއި ނުރަސްމީ ކްލާސްތަކުން ގިނަ އަދަދެއްގެ ދަރިވަރުންނަށް ފުރުސަތު ހޯދައިދީފައިވާއިރު، ގާބިލް ބަޔަކަށް ހަދައި ގައުމަށް ނެރެދިން ކަމަށާއި، މިއަދު އެކި ދިމަދިމާލުން ގައުމު ހިންގުމުގެ އިސް ލީޑަރުންގެ ގޮތުގައި ފެނިގެންދަނީ އީ.ޕީ.އެސްގެ ދަރިވަރުން ކަމަށެވެ. އެގޮތުން ގައުމުގެ ރައީސް އިބްރާހިމް މުހައްމަދު ޞާލިޙަކީ އީ.ޕީ.އެސްގެ ދަރިވަރެއްގެ ކަމަށް އޭނާ ވިދާޅުވިއެވެ.
މީގެ އިތުރުން އާދިޔާ ވިދާޅުވީ ތައުލީމީ ސްކޫލެއް އުފެއްދުމާއި، އެސްކޫލެއްގެ ދަރިވަރުންގެ މެދުގައި ކާމިޔާބުގެ އުސްމިންތަކަށް ވާސިލްވުމަށް ހިތްވަރު ލިބޭނެ ގޮތަށް ތަރުބިއްޔަތު ފަރުމާކޮށް ހިންގުމަކީ ވަރަށް ގިނަ އުދަނގޫތަކާއި ގޮންޖެހުންތައް ހުންނާނެ ކަމެއް ކަމަށެވެ. ނަމަވެސް އީ.ޕީ.އެސްއަކީ ކާމިޔާބު ސްކޫލެއްކަން ސާބިތު ކޮށްދީފައިވާ ކަަމަށް އާދިޔާ ވިދާޅުވިއެވެ.
އީ.ޕީ.އެސްގެ ނަން މާޒީއަށް އެކަނި ނިސްބަތްކޮށް، އެ ވާހަކަދައްކަން ޖެހިފައިވުމަކީ ދެރަ ކަމެއްކަން ފާހަގަކުރައްވައި އާދިޔާ ވިދާޅުވީ އެކަމުގައި މުޅި ގައުމު ހިތާމަ ކުރާނެ ކަމަށެވެ. އޭނާ ވިދާޅުވީ އުފެއްދުމުގެ ގާބިލިއްޔަތާއި ރޫހު އަށަގެންފައިވާ ސްކޫލެއްގެ ޚިދުމަތް މިއަދުގެ ޖީލުތަކަށް ލިބެން ނެތުމަކީ ލިބިފައިވާ ނިކަމެތި ކަމެއް ކަމަށާއި، މިފަދަ މޮޑެލް ސްކޫލެއް އާފުރާޅެއްގެ ދަށަށް ގެނެސް ދިރުން ގެނައުމަކީ މުޅި ގައުމަށް ކުރިއެރުން ލިބޭނެ ކަމެއް ކަމަށެވެ. އަދި އީ.ޕީ.އެސް އަލުން މުޖޫދުވެގެން އައުމަކީ ގިނަ ބައެއްގެ ހުވަފެނެއް ކަމަށް އާދިޔާ ވިދާޅުވިއެވެ.
އީ.ޕީ.އެސް ފައުންޑޭޝަންގެ ފަރާތުން ބޭއްވި ޚިދުމަތުގެ ހަވީރު ހަފްލާގައި ރައީސް ވަނީ އީ.ޕީ.އެސްއަށް ޚިދުމަތްކުރެއްވި ބޭފުޅުންގެ ޚިދުމަތުގެ އަގު ވަޒަންކުރުމުގެ ގޮތުން ދެއްވާ ހަނދާނީ ފިލާ އެފަރާތްތަކާ ހަވާލުކޮށްދެއްވާފައެވެ.
މި ހަފްލާގައި އީ.ޕީ.އެސްގެ 50 އަހަރުގެ ރަން ތާރީޚުގެ ދިރާސާ ލޯންޗުކޮށްދެއްވީ ރައީސުލްޖުމްހޫރިއްޔާގެ ނައިބެވެ. އީ.ޕީ.އެސް ސްކޫލް އުފެދުމަށްފަހު ފާއިތުވި 50 އަހަރަށްވުރެ ދިގު މާޒީގައި އެ ސްކޫލުން ހަތާވީސް ހާހެއްހާ ދަރިވަރުން ތައުލީމު ހާސިލުކޮށްފައިވެއެވެ. އީ.ޕީ.އެސް އަކީ އެންމެ ފުރަތަމަ އިންގްލިޝް މީޑިއަމް އަށް ކިޔަވައިދޭން ފެށި އަމިއްލަ ސުކޫލެވެ.
އީ.ޕީ.އެސް ފައުންޑޭޝަނުން އެ ސްކޫލްގެ ނަން ދިރުވުމަށްޓަކައި، ސްކޫލްގެ އަހަރީ ދުވަސް ފާހަގަކުރުމާއި އަދި ބައެއް ހަރަކާތްތައް ހިންގަމުން ދެއެވެ.
