މީގެ ކުޑަދުވަސްކޮޅެއް ކުރިން އިންޑިއާގެ ހޮސްޕިޓަލުގައި އެޓްމިޓްކުރި ބޮލީވުޑްގެ ފިލްމީތަރި އަކްޝޭ ކަންނާގެ ބައްޕަ ވިނޯދް ކަންނާގެ ހާލު މިހާރު ރަނގަޅު ކަމަށް އަކްޝޭ ބުނެފިއެވެ.
ވިނޯދް ކަންނާއަކީ ބޮލީވުޑްގެ މަޝްހޫރު އެކްޓަރެއް ވެސް މެއެވެ.
ޑީހައިޑްރޭޓްވުމުގެ ސަބަބުން ބޮލީވުޑްގެ ކުރީގެ މަޝްހޫރު އެކްޓަރު ވިނޯދް ކަންނާ ހޮސްޕިޓަލްގައި އެޑްމިޓްކުރުމާއެކީ ފަރުވާ ދޭން ވަނީ ފަށާފައެވެ. އޭނާ އެޑްމިޓްކޮށްފައި ވަނީ އެޗްއެން ރެލައިންސް ފައުންޑޭޝަން އެންޑް ރިސާޗް ސެންޓަރުގައި ކަމަށް ޓައިމްސް އޮފް އިންޑިއާއިން ބުންޏެވެ.
ވިނޯދަށް ހޮސްޕިޓަލުގައި ލިބުން އަންނަ އަޅާލުމަށާއި ހެޔޮ އެދޭ ފަރާތްތަކުން ފޮނުވަމުންދާ ހެޔޮ ދުޢާތަކަށްޓަކައި އޭނާގެ އާއިލާ ވަރަށް ބޮޑަށް ޝުކުރުވެރިވާ ކަމަށް އޭނާގެ އާއިލާއިން ބުނެއެވެ.
ވިނޯދްގެ ހާލަތު ރަނގަޅުވަމުން އަންނަ ކަމަށް ހޮސްޕިޓަލުން ވެސް ވަނީ ކަށަވަރުކޮށްދީފަ އެވެ.
ވިނޯދު ކަންކާ އެޑްމިޓްކުރީ ޑިހައިޑްޓޭޓް ވެގެން ކަމަށް އާއިލާ އިން ބުނި ނަމަވެސް މީޑިއާގައި އާންމުވެފައިވާ ފޮޓޯތަކަށް ފަހު އޭނާގެ ސިއްޚީ ހާލަތާ މެދު ވަނީ ސުވާލު އުފެދިފައެވެ. އަދި އުމުރުން 70 އަހަރުގެ ވިނޯދު ކަންނާ މަރުވެއްޖެ ކަމަށް ބުނެ ސޯޝަލް މީޑިއާގައި ފެތުރި ޚަބަރުތަކަށް ފަހު ވެރިކަންކުރާ ބީޖޭޕީގެ މަގަލާޔާ އޮފީހުގައި ބައެއް އޮފިޝަލުން ވަނީ ހިމޭންކަމުގެ ދެ މިނިޓްގެ ސުކޫތެއް ވެސް ގެނެސްފައެވެ. މި ހަރަކާތުގެ ވީޑިއޯ އާންމުވެފައިވާ އިރު ބީޖޭޕީން ބުނީ އެ ޕާޓީގެ ފަރާތުން ގާނޫނު ހަދާ މަޖިލީހުގައި މެންބަރުކަން ވެސް ކުރެއްވި ވިނޯދުގެ މަރުގެ ޚަބަރު ސޯޝަލް މީޑިއާގައި ފެތުރުމުން އެ ޕާޓީގެ ބައެއް އޮފިޝަލުން އެކަމުގެ ހަގީގަތް ނުބަލައި ހިތާމާފާޅުކޮށްފައި ވަނީ ވަރަށް ބޮޑު އޮޅުމަކުން ކަމަށެވެ. އެކަމަށްޓަކައި އެ ޕާޓީން ވަނީ މައާފަށް ވެސް އެދިފައެވެ.
ވިނޯދް ކަންނާ އެންމެ ފަހުން ފެނިފައި ވަނީ ޝާހުރުހާން އެކްޓްކޮށްފައިވާ ފިލްމު "ދިވާލޭއިން" ނެވެ. އޭނާ ކުޅެފައިވާ މަޝްހޫރު ފިލްމުތަކުގެ ތެރޭގައި "މެރަ ގައޯން މެރަ ދޭޝް"، "އިމްތިހާން"، "ދަޔާވަން" އަދި "ހޭރާފޭރީ" ހިމެނެއެވެ. ވިނޯދް ކަންނާ ކުޅެފައިވާ ފިލްމް "އަމަރް އަކްބަރް އެންތޮނީ" އަކީ އަދިވެސް ބެލުންތެރިންގެ ތަރުހީބު ލިބެމުންދާ ފިލްމެކެވެ.
