ޑެންމާކުގެ މިހާރުގެ ރާނީގެ މަހާނައާ ޖެހިގެން، މަހާނަ ހުރުމަށް ނޭދޭ ކަމަށް ފިރިކަލުން ވިދާޅުވެއްޖެ

ޑެންމާކުގެ މިހާރުގެ ރާނީ އަވަހާރަވުމުން އެކަމަނާގެ މަހާނަ އާ ޖެހިގެން ފިރިކަލުންގެ މަހާނަ ހުންނަން އެދިވަޑައިނުގަންނަވާ ކަމަށް ރާނީގެ ފިރިކަލުން ޕްރިންސް ހެންރިކް ވިދާޅުވެއްޖެ ކަމަށް ޑެންމާކުގެ ޝާހީ ގަނޑުވަރުން ބުރާސްފަތި ދުވަހު ހާމަ ކޮށްފިއެވެ.

ޑެންމާކުގައި އޮންނަ އާދަކާދައަށް ބަލާއިރު ރަސްކަން ކުރައްވާފައި ބޭފުޅެއްގެ ދެމަފިރިކަނބަލުންގެ މަހާނަ ހުންނަނީ ޖެހިޖެހިގެންނެވެ.

އުމުރުފުޅުން 83 އަހަރުގެ ޕްރިންސް ހެންރިކް އަކީ އޭނާ އަށް ވަލީ އަހުދުގެ ބަދަލުގައި ރަސްގެފާނު ނުކިޔާތީ އެކަމާ ހިތްޕުޅު ހަމަޖެހިވަޑައިނުގަންވާ ބޭފުޅެއް ކަމަށް މީޑިއާ ރިޕޯޓުތަކުގައި ވެއެވެ.

ކުރިން ބެލެވިފައި އޮތީ ދެބޭފުޅުންގެ މަހާނަ ވެސް ހުންނާނީ އެކަމަށް ޚާއްސަ ކުރެވިފައިވާ ތަނުގައި ޖެހިޖެހިގެން ކަމަށެވެ.

އުމުރުފުޅުން 77 އަހަރުގެ ރާނީ މާގްރެތޭ ވަނީ ފިރިކަލުންގެ މި އެދިވަޑައިގަތުން ގަބޫލުފުޅު ކުރައްވާފައެވެ.

ޑެންމާކްގެ ދުވަހު ނޫހެއް ކަމަށްވާ "ބީޓީ" އަށް ދެއްވި އިންޓަވިއުއެއްގައި "ދަ ރޯޔަލް ޑެނިޝް ހައުސް" ގެ ޑިރެކްޓަރ ވިދާޅުވީ، ވަލީ އަހުދު ހެންރިކްގެ ލަގަބާ އަދި އޭނާއަށް ރަސްގެފާނުގެ ގޮތުގައި މުޚާތަބް ނުކުރާތީ ހިތްޕުޅު ހަމަޖެހިވަޑައިނުގެން އުޅުއްވާތާ ގިނަ ދުވަސްތަކެއް ވެފައިވާ ކަމަށެވެ. އެނާ ވިދާޅުވީ، އަނބިކަނބަލުންގެ މަހާނަ އާ ޖެހިގެން އޭނާގެ މަހާނަ ހުންނަން ފިރިކަލުން ބޭނުންފުޅު ނުވާ ސަބަބަކީ ވެސް ރާނީ އާ އެއް ދަރަޖައެއް އޭނާ އަށް ދުނިޔޭގައި ލިބިވަޑައިގެންފައި ނުވާތީ އެކަމާ ހިތްޕުޅު ހަމަޖެހިވަޑައިނުގަންނަވާތީ ކަމުގައެވެ. ޕްރިންސް ހެންރިކް ދެކެވަޑައިގަންނަވާ ގޮތުގައި ދުނިޔޭގައި އޭނާ އަށް އަނބިކަނބަލުންނާ އެއް ދަރަޖައެއް ލިބިވަޑައިގެންފައި ނުވާއިރު ކަށްވަޅުގައި އެ ހަމަހަމަކަން ލިބިވަޑައިގަންނަވަން ބޭނުންފުޅު ނުވާކަމަށެވެ.

މި ދެބޭފުޅުންގެ ކައިވެންޏަށް ދެ ފިރިހެން ބޭފުޅުން ލިބިވަޑައިގެންފައި ވެއެވެ.

ޑެންމާކްގެ ރާނީގެ ފިރިކަލުން ޕްރިންސް ހެންރިކް އުފަންވެ ވަޑައިގަތީ 1934 ވަނަ އަހަރު ފްރާންސް އަށެވެ. ނަމަވެސް ޑެންމާކްގެ ރާނީ އާ ކައިވެނި ބައްލަވައިގަތުމަށްފަހު ފްރާންސްގެ ސިޓިޒަންޝިޕް އޭނާ ވަނީ ދޫކޮށްލައްވާފައެވެ.