މެސީ އެނބުރި ބާސެލޯނާއަށް ހިނގައިދާނެތަ؟

ދުނިޔޭގެ އެންމެ މޮޅު އެއް ފުޓްބޯޅަ ކުޅުންތެރިޔާ ލިއޮނެލް މެސީ ބާސެލޯނާ ދޫކޮށް ޕީއެސްޖީއަށް ބަދަލުވި ފަހުން ބާސެލޯނާގެ ސަޕޯޓަރުންގެ ހުވަފެނަކަށްވެފައި އޮތީ އޭނާ އެނބުރި ކްލަބާ ގުޅުމެވެ. ބާސާއިން މެސީ ދޫކޮށްލީ ސްޕެނިޝް ލީގުގެ މާލީ ގަވާއިދުތަކުގެ އުސޫލުތަކުގެ ތެރެއިން އޭނާގެ އެއްބަސްވުން އައުނުކުރެވުމުންނެވެ.

ސީނިއަރ ޓީމަށް 17 އަހަރު ޚިދުމަތްކޮށްދިން މެސީއަކީ ބާސެލޯނާގެ ތާރީޚުގައިވެސް އެޓީމަށް ކުޅެދިން އެންމެ މޮޅު އެއް ކުޅުންތެރިޔާއެވެ. ނަމަވެސް މެސީ ޓީމާ ވަކިވިއިރު، އޭނާއަށް އެކަށީގެންވާ ފެއަރވެލްއެއް ނުދެވޭކަމަށް ޚުދު ކްލަބުގެ ރައީސްވެސް ގަބޫލުކުރެއެވެ. ބާސެލޯނާގެ ރައީސް ޖޮއާން ލަޕޯޓާ ދާދި ފަހުން ވަނީ އެކަމާގުޅޭގޮތުން ވާހަކަވެސް ދައްކާފައެވެ.

ލަޕޯޓާ ބުނީ އޭނާގެ ނަޒަރުގައި ބާސެލޯނާއާއެކު މެސީ ލިޔަމުން ދިޔަ ސަފުހާތައް އަދި ނުނިމޭކަމަށެވެ. އަދި އަލުން ބާސެލޯނާއަށް ޚިދުމަތްކުރުމުގެ ފުރުސަތު މެސީއަށް ހުޅުވިފައިވާކަމަށެވެ. މެސީ ޓީމު ދޫކޮށްލަންޖެހުނު ގޮތަށްވުރެ ރީތިކޮށް އެކަން ކުރިއަށް ގެންދެވޭތޯ ޔަގީންކުރުމަކީ އެންމެންގެ ޒިންމާއެއް ކަމަށެވެ. ލަޕޯޓާ ވަނީ މެސީއާ މެދު ކަންތައް ވެގެންދިޔަ ގޮތުން ބާސެލޯނާގެ ރައީސްގެ ހައިސިއްޔަތުން އެކަމާ ދެރަވާކަމަށް ބުނެފައެވެ.

މެސީ އަލުން ކްލަބަށް ގެންދަން ލަޕޯޓާ ކިތަންމެ ބޭނުންވިނަމަވެސް މިއަންނަ ސީޒަން ފެށެންވާއިރަށް އޭނާ ބާސެލޯނާއާ ގުޅުމަކީ ނާދިރުކަމެކެވެ. ޕީއެސްޖީއާއެކު މެސީ ހަދާފައިވާ އެއްބަސްވުމުގައި ބާކީ އެއް އަހަރު އޮތްއިރު، ބާސެލޯނާ ދޫކޮށް ދާންޖެހުނު ގޮތުން ދެފަރާތުގެ ގުޅުންވެސް ވަނީ ހީނަރުވެފައެވެ. މީގެ އިތުރުން މެސީ ބޭނުންނަމަ، ދެއަހަރުގެ މުއްދަތު ހަމަވުމުން ޕީއެސްޖީއާއެކު އޭނާ ހަދާފައިވާ ކޮންޓްރެކްޓްގައި އިތުރު އެއް އަހަރު މަޑުކުރެވޭނެއެވެ.

މެސީ ޕީއެސްޖީއާ ގުޅުމުން ބާސެލޯނާއަށް ގެއްލުނީ ހަމައެކަނި ދުނިޔޭގެ އެންމެ މޮޅު އެއް ކުޅުންތެރިޔާއެއް ނޫނެވެ. މެސީގެ ސަބަބުން ބާސެލޯނާއަށް ލިބެމުން ދިޔަ ގިނަ ސްޕޮންސަރުންތަކެއް ގެއްލި، މާލީގޮތުން ބާސެލޯނާއަށް ބޮޑު ދަތިކަމަކާ ކުރިމަތިލާންޖެހުނީއެވެ. އަނެއްކޮޅުން ޕީއެސްޖީއަށް މެސީ ބަދަލުވުމާއެކު އެޓީމަށް މުޅިން އައު ހަތް ސްޕޮންސަރުން ލިބުނެވެ. މީގެ ސަބަބުން 600 މިލިއަން ޔޫރޯގެ ފައިދާއެއް ޕީއެސްޖީއަށް ވީއިރު، މެސީއާއެކު ޕީއެސްޖީގެ ސޯޝަލް މީޑިއާ އެންގޭޖުމެންޓު ވަރަށް ބޮޑުތަން އިތުރުވިއެވެ. އެހެންކަމުން ޕީއެސްޖީންވެސް މަސައްކަތްކުރާނީ މެސީ އެޓީމުގައި ހިފެހެއްޓުމަށެވެ.

ބާސެލޯނާއިން މިހާރު އިންތިޒާރުކުރަމުން އަންނަނީ ޕީއެސްޖީގައި މެސީގެ ކޮންޓްރެކްޓް ހަމަވުމުން އޭނާ އެނބުރި ބާސެލޯނާއަށް ދާނެކަމަށެވެ. އެކަމަކު މިކަމާގުޅޭގޮތުން މެސީ މިހާތަނަށް އެއްވެސް ބަހެއް ބުނެފައެއް ނުވެއެވެ. ޕީއެސްޖީގައި އޭނާ ދައްކަމުން އަންނަ ކުޅުމަށް އެޓީމުގެ މެނޭޖުމެންޓް އޮތީ ހިތްހަމަޖެހިގެންނެވެ.