އެޗްއައިވީ ޖެހިފައިވާ އިތުރު މީހަކަށް ފަރުވާ ދީގެން ރަނގަޅުކޮށްފި

ލޭގެ ކަންސަރަށް ސްޓެމް ސެލް ޓްރާންސްޕްލާންޓް ފަރުވާ ހޯދަމުންދިޔަ އެޗްއައިވީ ބަލި މީހަކު އެބަލިން ރަނގަޅުވެއްޖެއެވެ.

މިއީ އެޗްއައިވީ ޖެހިފައިވާ މީހުންގެ ތެރެއިން މިހާތަނަށް ފަރުވާ ދީގެން ރަނގަޅުކުރެވުނު ހަތަރު ވަނަ މީހާއެވެ. އުމުރުން 66 އަހަރުގެ މިމީހާގެ އެއްވެސް މައުލޫމާތެއް ހާމަކުރުމަށް އޭނާ ބޭނުމެއް ނުވެއެވެ.

މީގެ ތިން އަހަރާބައިގެ ކުރިން އޭނާގެ ޑޮކްޓަރުން ނިންމީ ޑޯނަރެއްގެ އެހީގައި ބަލި މީހާގެ ކެންސަރު ސެލްތައް ހަށިގަނޑުން ވަކިކުރުމަށެވެ.

ކެލިފޯނިއާގެ މެޑިކަލް ފެސިލިޓީން އޭނާއަށް ފަރުވާ ދީގެން ރަނގަޅުވުމާއެކު "ސިޓީ އޮފް ހޯޕް"ގެ ނަމުން ނަންދީފައިވާ މިބަލިމީހާ ވަނީ ކުރިޔަށް އޮތް 17 މަސް ދުވަހަށް ލޭގެ ކެންސަރާއި އެޗްއައިވީ ބަލިން މިވަގުތަށް ރަނގަޅުވެފައެވެ.

ބަލިން ރަނގަޅުވުމާއެކު އޭނާ ނެރުނު ބަޔާނެއްގައި ބުނެފައިވަނީ އެޗްއައިވީ ޖެހޭ އެހެން ބަލި މީހުންނެކޭ އެއްގޮތަށް 1988 ވަނަ އަހަރު އެންމެ ފުރަތަމަ ފަހަރަށް އޭނާއަށް އެޗްއައިވީ ޖެހިފައިވާކަން އެނގުމުން މިއީ މަރު ބަލި ކަމަށް ހިތަށް އެރިކަމަށެވެ. ދުވަހަކުވެސް އެޗްއައިވީ ހަށިގަނޑުގައި ނުހުންނާނެ ދުވަހެއް އަތުވެދާނެކަމަށް ހީނުކުރާކަމަށް އޭނާ ބުންޏެވެ.

މިހާތަނަށް އެޗްއައިވީ ބަލި މީހުންގެ ތެރެއިން ފަރުވާ ދީގެން ރަނގަޅުކުރެވުނު މީހުންގެ ތެރެއިން މިމީހާއަކީ އުމުރުން އެންމެ ދުވަސްވީ މީހާއެވެ.

އެންމެ ފުރަތަމަ މިގޮތަށް ފަރުވާދީގެން އެޗްއައިވީ ބަލި މީހަކު ރަނގަޅުކޮށްފައިވަނީ 2007 ވަނަ އަހަރުއެވެ. މިއަހަރުގެ ކުރީކޮޅު ނިއު ޔޯރކްގެ ޑޮކްޓަރުންތަކެއް ވަނީ އެޗްއައިވީ ޖެހިފައިވާ އަންހެނަކު ފުރަތަމަ ފަހަރަށް ރަނގަޅުކޮށްފައިވާކަމަށް ބުނެފައެވެ.