ޝައްފާނުގެ މަރު: މައްސަލަ ނިންމި ގޮތުގެ ރިޕޯޓް ލަހުން ދޫކޮށްފައި އޮތުމުން އިސްތިއުނާފު ބަލައިގަންނަން އަމުރުކޮށްފި
25 ޖުލައި 2022 | ހޯމަ 07:57ގާޒީ ވަނީ އެމީހުން 25 އަހަރަށް ޖަލަށްލުމަށް ހުކުމްކުރައްވާފައި
4 މީހުން އުމުރަށް ޖަލަށްލުމަށް ކްރިމިނަލް ކޯޓުން ޙުކުމް ކުރީ 28 ނޮވެމްބަރުގައި
ތޫނު އެއްޗަކުން ހަމަލާދީ މަރާލާފައިވާ ށ. ފޭދޫ ހީނާމާގެ އިސްމާއިލް ޝައްފާން ޝަރީފްގެ މަރުގެ މައްސަލައިގައި ކުށް ސާބިތުވެފައިވާ މީހުންގެ އިސްތިއުނާފު ބަލައިގަތުމަށް ސުޕްރީމް ކޯޓުން އަމުރުކޮށްފިއެވެ.
ޝައްފާން ޝަރީފްގެ މަރުގެ މައްސަލައިގައި ދައުވާ އުފުލާފައިވާ 4 މީހުން އުމުރަށް ޖަލަށްލުމަށް ކްރިމިނަލް ކޯޓުން ޙުކުމް ކުރީ 28 ނޮވެމްބަރު 2021 ގައެވެ.
ޝައްފާންގެ މަރުގެ މައްސަލައިގައި ދައުލަތުން ދައުވާ އުފުލާފައިވާ 4 މީހުންނަކީ ސ ހިތަދޫ ޗަމަން، ޙުސައިން ނިހާދު އަހްމަދު އާއި ކ.މާލެ މއ. ޓޮމާޓާ ފްލާވަރ ޙުސައިން ޖައިލަމްގެ އިތުރުން، ސ. މަރަދޫ މޫންލައިޓްގްލޯރީ، ޙަސަން ނަބާޙް އާއި ސ.ހިތަދޫ މަލަ، މުޙައްމަދު އައިމަން ޙަބީބުއެވެ.
އޭގެ ތެރެއިން ނިހާދުއާއި ޖައިލަމްގެ މައްޗަށް އުފުލާފައިވަނީ ތޫނު އެއްޗެއް ބޭނުންކޮށްގެން ޤަސްތުގައި މީހަކު މެރުމުގެ ކުށުގެ ދައުވާއެވެ. އަދި ނަބާޙްއާއި އައިމަންގެ މައްޗަށް އުފުލާފައިވާ ދައުވާއަކީ ތޫނު އެއްޗެއް ބޭނުންކޮށްގެން ޤަސްތުގައި މީހަކު މަރާލުމުގައި ބައިވެރިވުމުގެ ކުށުގެ ދައުވާއެވެ.
މި މައްސަލައިގައި ކްރިމިނަލް ކޯޓުން ކުރި ޙުކުމުގައި ވަނީ އެމީހުންގެ މައްޗަށް ކުށް ސާބިތުވާކަމަށް ނިންމައި، އުމުރަށް ޖަލަށްލުމަށް ޙުކުމްކޮށްފައެވެ.
ގާޒީ ޙަސަން ސައީދު ކުރެއްވި ޙުކުމުގައި ބުނެފައިވަނީ މިއީ ޖިނާއަތުގެ އެންމެ މަތީ ދަރަޖައިގެ ކުށެއް ކަމަށާއި، ކުށް ކޮށްފައިވަނީ އުމުރުން 15 އަހަރުގެ ކުޑަ ކުއްޖަކާ ދެކޮޅަށް ކަމަށެވެ. އަދި މިއީ އިންސާނެއްގެ ފުރާނަޔަށް އެއްވެސް ޙުރުމަތެއް ނުބަހައްޓައި ކުރި އަމަލެއްކަން ވަނީ ފާހަގަ ކުރައްވާފައެވެ. ގާޒީ ވަނީ އެމީހުން 25 އަހަރަށް ޖަލަށްލުމަށް ޙުކުމްކުރައްވާފައެވެ.
އެ ޙުކުމް އެމީހުންގެ ފަރާތުން ހައިކޯޓުގައި އިސްތިއުނާފު ކުރުމުން އިސްތިއުނާފު ކުރަން އޮންނަ މުއްދަތުގެ ފަހުން މައްސަލަ ހުށައެޅިފައިވާކަން ބަޔާންކޮށް އިސްތިއުނާފު ބަލައެއް ނުގަތެވެ. އެހެންނަމަވެސް، އެހެން ދިމާވީ ދަށު ކޯޓުން މައްސަލަ ނިންމި ގޮތުގެ ރިޕޯޓް ލަހުން ދޫކޮށްފައި އޮތުމުން ކަމަށްވާތީ އިސްތިއުނާފު ބަލައިގަތުމަށް ސުޕްރީމް ކޯޓުން އަމުރުކުރީއެވެ.
ދަށު ކޯޓުން ކުރި ޙުކުމުގައި ގާޒީ ވިދާޅުވީ، ހަރުދަނާ ޤަރީނާތަށް ހުރި ނަމަވެސް، އެންމެ މުހިއްމު ޝަފަހީ ދެހެކިންގެ ހެކިބަހާމެދު އޮޅުން އުފެދި، އެ ދެހެކިންގެ ހެކިބަސް ޝަރީޢަތަށް ލިބިފައިނުވާ ކަމަށެވެ. އެއާއެކު ޤިސާސްގެ ކުށް ސާބިތުކުރުމަށް އިސްލާމީ ޝަރީޢަތުގައި ކަނޑައަޅާފައިވާ އެއްވެސް ޝައްކެއް ނެތް މިންވަރަށް ނުވަތަ އެ އަމަލު ދަޢުވާލިބޭ ފަރާތްތައް ހިންގިކަމަށް މުޅިން ޔަޤީންވާ މިންވަރަށް ޤަސްދު މަރު ޝަރީއަތަށް ސާބިތުނުވާކަމަށް ގާޒީ ވިދާޅުވިއެވެ.
ތޫނު އެއްޗަކުން ހަމަލާދީ ޝައްފާނު މަރާލާފައިވަނީ ދެ ގްރޫޕެއްގެ ދެމެދުގައި ހިނގި ސިލްސިލާ މާރާމާރީތަކާ ގުޅިގެން ބަދަލުހިފުމުގެ ގޮތުން ކަމަށް އެ މައްސަލަތަކުގެ ތަހުގީގު ޓީމުން ބުނެފައިވެއެވެ.
