ރައީސް އަބްދުﷲ ޔާމީން ޤާނޫނާއި ޚިލާފަށް ކުރައްވާ ކަންތައްތައް އެކުރައްވަނީ ތާޢީދު ނެތުމުން ހަސަދަވެރިވެގެން ކަމަށް މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ ވިދާޅުވެއްޖެއެވެ.
ރާއްޖެ ޓީވީގެ ފަލަސުރުޚީ ޕްރޮގްރާމްގައި ވާހަކަ ދައްކަވަމުން އިންތި ވިދާޅުވީ ރައީސް އޮފީހާއި މުލީއާގޭގައި ތިބެގެން ވަރަށް ގިނަ ދިރާސާތައް ރައީސް ޔާމީންގެ ޓީމުން ކުރާ ކަމަށާއި، ކޮންމެ ދިރާސާއަކުން ރައީސް ޔާމީންގެ ނަންފުޅު ފުލަށް ވެއްޓިގެންދާ ކަމަށެވެ. އަދި އެކަމުގެ ސަބަބުން އަމިއްލަ ނަފްސުދެކެ ކޯފާވެ ލައްވާ ކަމަށެވެ.
"ދެން މިހަދާ ގޮތަކީ ހުރިހާ ސިޔާސީ މީހުން ގެންގޮސް ޖަލަށްލަނީ. ވާދަކުރާނެ މީހެއް ނުހުންނާނެ ނޫންތޯ؟ އަމިއްލަފުޅަށް ކުރީގައި ރައްޔިތުންގެ މަޖިލީހަށް ވާދަކުރެއްވިއިރު ވެސް ހަމަ އެގޮތެއް ނޫންތޯ ހަދަމުންދިޔައީ. އެމަނިކުފާނާއި ވާދަކުރަން ކެންޑިޑޭޓަކު ނިކުމެއްޖެނަމަ ކޮންމެވެސް ގޮތަކުން އެމީހެއްގެ ނަން ނެގޭ ގޮތް ހައްދަވާނެ،" އިންތި ވިދާޅުވިއެވެ.
އިންތި ވިދާޅުވީ މިފަހަރުގެ އިންތިޚާބުގައި ވާދަކުރައްވަން ވެސް ރައީސް ޔާމީން މަސައްކަތް ކުރައްވަނީ އެގޮތަށް ހުރިހާ ވާދަވެރިން ޖަލަށް ލައިގެން ކަމަށެވެ.
އިންތި ވިދާޅުވީ ފެންނަ މަންޒަރަކީ ހަސަދައިގެ ތެރެއިން ރައިސް ޔާމީން މޮޔަފުޅުވެވަޑައިގަންނަވާތަން ކަމަށެވެ.
"މުޅި ދައުލަތުގައި މޮޔަ ސިފަ ޖެހެނީ އެސަބަބުތަކާއިހުރެ. ހަސަދަވެރިކަން އޮތް މިންވަރުން ގޮސް އިނގޭތޯ"
ރައީސް މައުމޫނާއި އެމަނިކުފާނުގެ ބޭފުޅުންނަށް ރައީސް ޔާމީން ވަރަށް ހަސަދަވެރިވެ ވަޑައިގަންނަވާ ކަމަށް ކުރީގެ ނައިބު ރައީސް އަހުމަދު އަދީބު ދާދިފަހުން ޖަލުގައި ހުންނަވައި ނެރުއްވި ބަޔާނުގައި ވިދާޅުވުމަށް އިޝާރާތްކުރައްވައި އިންތި ވިދާޅުވީ އަދީބު އެހެން އެވިދާޅުވީ ރައީސް ޔާމީން ވަރަށް ރަނގަޅަށް އެނގިވަޑައިގެން ހުންނަވައިގެން ކަމަށެވެ.
އިންތި ވިދާޅުވީ ހަސަދަވެރިކަމަކީ މީހާ މޮޔަކޮށްލާ ކަމެއް ކަމަށެވެ.
"ވަރަށް ބޮޑަށް މޮޔަ ގޮވައެއް ނޫންތޯ އާއްމު ރައްޔިތުންނާއި މުޚާޠަބްކުރައްވައި ޖަލްސާތަކުގައި ވާހަކަ ދައްކަވާއިރު؟ މިސާލަކަށް ނިކަން ބައްލަވާ އިހަކަށް ދުވަހުވެސް ވިދާޅުވި ނޫންތޯ، ރައްޔިތުންގެ މަޖިލީހުގެ މެމްބަރުންގެ ގޮނޑި ގެއްލުވާލާފައި ޕާޓީއިން ވަކިކޮށްފައި، ތިމަންނަމެންގެ ޕާޓީއަށް އަންނަ ވެއްޖެއްޔާ، އެ އުޒުރު ރަނގަޅޭ، ގޮނޑިއެއް ނުގެއްލޭނެއޭ."
އިންތި ވިދާޅުވީ ހަސަދައިގެ ތެރެއިން ގޮސް ރައީސް ޔާމީން ހުންނެވީ މޮޔަފުޅުވެވަޑައިގެންފައި ކަމަށެވެ.