ކަންބޮޑުވާ މިންވަރުގެ މަގުމަތިން ފޭރުމުގެ ދެ ހާދިސާއެއް ފުލުހުންނަށް ރިޕޯޓްކޮށްފައިވާ ކަމަށާއި އެކަމާގުޅިގެން އަޅަންޖެހޭ ރައްކާތެރިކަމުގެ އެންމެހާ ފިޔަވަޅުތައް އަޅަމުންދާކަމަށް ފުލުހުން ބުނެފިއެވެ.
ފުލުހުން މިހެން ހާމަކުރީ މާލޭގެ އެކި ސަރަހައްދުތަކުން މީހުން ހުއްޓުވައި ތޫނު އެއްޗެހިން ބިރުދައްކައި ފޭރެމުންދާ ކަމުގެ ކަންބޮޑުވުން ސޯޝަލް މީޑިއާގައި ފާޅުކުރަން ފަށާފައިވަނިކޮށެވެ.
ގްރޫޕް ހަދައިގެން ފޭރޭ މަގުތަކެއް ކަމަށް ބުނެ ޗާޓު ހަދައިގެން ވެސް ސޯޝަލް މީޑިއާގައި އެ ސަރަހައްދުތައް ފާހަގަކޮށް މެސެޖުތަކެއް އެބަ ދައުރުކުރެ އެވެ. އޭގެތެރޭގައި މޯލްޑިވްސް ނެޝެނަލް ޔުނިވަސިޓީ ހުންނަ ސަރަހައްދާއި ހެލްތު މިނިސްޓްރީ ހުންނަ ސަރަހައްދު ހިމެނެ އެވެ. އަދި އެސރަހައްދުތަކުން އެކަނިދާ މީހުން ހުއްޓުވާ ވަޅިން ބިރު ދައްކައިގެން އެމީހުންގެ އަތުގައި ހުންނަ ފައިސާއާ އެހެނިހެން ތަކެތި އަތުލަމުންދާ ކަމަށާއި އެފަދަ ކަމެއްގެ ރިޕޯޓް ކޮށްފިނަމަ މަރާލާނެ ކަމުގެ އިންޒާރުވެސް ދެމުންދާކަމަށް އެ މެސެޖްތަކުގައި ފާހަގަކޮށްފައިވެއެވެ.
މިކަމާ ގުޅިގެން ރާއްޖެ އެމްވީން ސުވާލު ކުރުމުން ފުލުހުންގެ ސްޕޯކްސްޕާސަން އަހުމަދު ޝިފާން ވިދާޅުވީ ކަންބޮޑުވާ މިންވަރުގެ ފޭރުމުގެ ދެ ހާދިސާއެއް ފުލުހުންނަށް ރިޕޯޓް ކޮށްފައިވާ ކަމަށާއި އެކަން ހިނގާފައިވަނީ މިރޯދަމުގެ ދެވަނަ ދުވަހާއި ތިންވަނަ ދުވަހު ކަމަށެވެ.
ޝިފާން ވިދާޅުވީ ސޯޝަލް މީޑިޔާގައިވެސް ފެތުރެނީ އެދެހާދިސާކަމަށް ބެލެވޭ ކަމަށާއި އިތުރު ކަމެއްގެ ރިޕޯޓެއް އަދި ލިބިފައި ނުވާކަމަށެވެ. ނަމަވެސް އެކަމާގުޅިގެން އަޅަންޖެހޭ ފިޔަވަޅުތައް އަޅަމުންދާ ކަމަށާއި އެފަދަ ހާދިސާއެއް ހިނގިޔަ ނުދިނުމަށް ކުރަން ޖެހޭ އެންމެހާ ކަންކަން މިހާރު ކުރަމުން ގެންދާ ކަމަށް ވިދާޅުވި އެވެ. އެގޮތުން މަގުތައް ބަލަހައްޓާނެ ފުލުހުން އިތުރުކޮށްފައިވާނޭ ކަމަށާއި ޚާއްޞަކޮށް އެކަނި މީހުން ގޮސްއުޅޭނޭކަމަށް ލަފާކުރެވޭ ހިސާބުތައްވެސް އިތުރަށް ބަލަހައްޓަމުންދާކަމަށް އޭނާ ވިދާޅުވި އެވެ.
މީގެ އިތުރުން އެފަދަ ކަމެއް ކޮށްފާނެ ކަމަށް ބެލެވޭ މީހުން ހުއްޓުވާ އެމީހުންނާ ސުވާލުކޮށް ފާސްކޮށް ހަދަމުންދާކަމަށްވެސް ޝިފާން ވިދާޅުވިއެވެ. ޝިފާން ވިދާޅުވީ މާލޭގެ ހުރިހާ ސަރަހައްދަު ތަކަކީވެސް ރައްކާތެރި އަމާންތަންތަނަށް ހެދުމަށް ފުލުހުން ކުރަމުންދާ މަސައްކަތުގެ ތެރެއިންވެސް އިތުރަށް ބަލަމުންދާ ކަމަށެވެ.
