އާބިދަށް ކުރާ ދައުވާ: ރެސްޓޯރަންޓުގެ މެނޭޖަރާއި އިތުރު މުވައްޒަފެއްގެ ހެކިބަސް ނަގައިފި
މޭމައްޗަށް ލިބުނު އަނިޔާގެ ވާހަކަ އަޑުއެހީވެސް އެހެން މީހުންގެ ފަރާތުން
ބަންގްލަދޭޝްގެ ވެއިޓަރެއްކަމަށްވާ ޝަމީމްއަށް ހަމަލާދީ މަރާލިކަމަށް ތުހުމަތުކުރާ ޕާކިސްތާނުގެ ކައްކާ މުހައްމަދު އާބިދު
ހުޅުމާލޭގެ ޚާންޖީ ރެސްޓޯރަންޓްގައި ބަންގްލަދޭޝްގެ ވެއިޓަރެއްކަމަށްވާ ޝަމީމްއަށް ހަމަލާދީ މަރާލިކަމަށް ތުހުމަތުކުރާ ޕާކިސްތާނުގެ ކައްކާ މުހައްމަދު އާބިދުގެ މައްޗަށް ކުރާ ދައުވާގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އިސްމާއިލް ޝަފީއުއެވެ.
އާދިއްތަ ދުވަހުގެ އަޑުއެހުމުގައި އެންމެ ފުރަތަމަ ހާޒިރުކޮށްފައިވަނީ ޚާންޖީ ރެސްޓޯރަންޓުގައި މެނޭޖަރުގެ ވަޒީފާ އަދާ ކުރަމުންދިޔަ ޕާކިސްތާނު ރައްޔިތެއްކަމަށްވާ ޚާލިދު ނަދީމެވެ.
ހެކިބަސް ދެމުން ޚާލިދު ބުނެފައިވާ ގޮތުގައި، އޭނާ ޙާދިސާ ހިނގި ދުވަހު ބަދިގެއަށް ވަނީ ބަދިގެ ތެރެއިން އަޑުގަދަވެގެންނެވެ. އޭރު އާބިދާއި ޝަމީމް މާރާމާރީ ހިންގަމުން ދިޔަކަން ފާހަގަކޮށް އޭނާ ބުނީ، އެ ހިސާބުން އެދެމީހުން ދުރުކުރުމަށްފަހު، އެމީހުންނަށް ވިސްނައިދިން ކަމަށެވެ. އެއަށްފަހު އޭނާ އަނެއްކާވެސް ބޭރަށް ނުކުތީ ރެސްޓޯރަންޓަށް ރިޒަވޭޝަންތަކެއް އައިސްފައި ހުރުމުންނެވެ.
އެހެންނަމަވެސް ބޭރަށް ނުކުމެ މިނެޓެއް ނުވަނިސް އަނެއްކާވެސް ހަޅޭއްލަވާ އަޑުއިވިގެން އޭނާ ބަދިގެއަށް ދިޔައީ ކަމަށެވެ. ދިޔައިރު ޝަމީމްގެ މޫނުމަތީގައި ޒަަޚަމެއް ހުރި ކަމަށާއި، މޫނުމަތިން ލޭ އަންނަމުން ދިޔަކަމަށް އޭނާ ބުންޏެވެ. އެހިސާބުން އަނެއްކާވެސް އެދެމީހުން ދުރުކުރުމަށް އޭނާ މަސައްކަތް ކުރިއެވެ. އޭރު އެތަނުން އިތުރު ހަތިޔާރެއް ފެނިފައިނުވާކަމަށް އޭނާ ބުންޏެވެ.
އޭރު އިތުރު 5 މީހަކު އެތަނުގައި ތިބިކަމަށް ހެކިވެރިޔާ ބުންޏެވެ. އެމީހުން ވަނީ ޝަމީމްގެ މޫނަށް އަނިޔާވީ މާރާމާރީގެ ތެރެއިންކަމަށް އޭނާ ގާތުގައި ބުނެފައެވެ.
ޝަމީމަށް ލިބުނު ބޮޑު އަނިޔާކަމަށް ބުނާ މޭމައްޗަށް ލިބުނު އަނިޔާގެ ވާހަކަ އޭނާ އަޑުއެހީވެސް އެހެން މީހުންގެ ފަރާތުންކަމަށް އޭނާ ހެކިބަސް ދެމުން ބުންޏެވެ.
ތަޅާފޮޅުމުގެ ސަބަބުން އާބިދުގެ މޫނުމައްޗަށްވެސް ކޮންމެވެސް ވަރަކަށް އަނިޔާވެފައި ހުރިކަމަށް އޭނާ ބުންޏެވެ.
ދެން ހާޒިރުކުރީ އެ ރެސްޓޯރަންޓުގައި މަސައްކަތް ކުރަމުންދިޔަ ޕާކިސްތާނު ރައްޔިތެއްކަމަށްވާ މުޙައްމަދު ފައިޒާން މަނޯޖްއެވެ. އޭނާ ބުނާ ގޮތުގައި ޙާދިސާ ހިނގިއިރު އޭނާ ދިޔައީ އެ ދުވަހު އޮތް ރޯދަވީއްލުމަކަށް ތައްޔާރު ކުރުމަށް ގޮނޑި މޭޒުތައް ތަރުތީބު ކުރަމުންނެވެ. އޭރު ބަދިގެ ފަރާތުން އަޑުގަދަވި ނަމަވެސް އެއީ އާންމުކޮށް ހިނގާ ކަމަކަށްވާތީ އެވަގުތު ކުރަން ހުރި މަސައްކަތާއިގެން ކުރިއަށް ދިޔައީކަން އޭނާ ފާހަގަކުރިއެވެ.
އެ ހެކިވެރިޔާވެސް ވަނީ ޝަމީމްގެ މޭމައްޗަށް ލިބިފައިވާ އަނިޔާއެއް އޭނާއަށްވެސް ފެނިފައި ނުވާ ކަމަށާއި، ޙާދިސާ ހިނގި ތަނުން އެވަގުތު ހަތިޔާރެއް ފެނިފައިނުވާކަމަށް ބުނެފައެވެ.
އެހެންނަމަވެސް އާދައިގެ މަތިން އެތަނުގައި ވަޅި ސަމުސާ ބަހައްޓާފައި ހުރި ތަންތަނުގައި އެތަކެތި ހުންނާނެކަން އޭނާ ފާހަގަކުރިއެވެ.
މި މައްސަލައިގައި ހިމެނޭ ގިނަ ހެކިންނަކީ ޕާކިސްތާނު އަދި ބަންގްލަދޭޝް ރައްޔިތުންކަން ފާހަގަކޮށް ދައުލަތުން ވަނީ ޝަރީއަތުގެ މަރުޙަލާ ފެށުމުގެ ކުރިން ހެކިބަސް ކުރީބައިގައި ނެގުމަށް އެދިފައެވެ. ވުމާއެކު، ގާޒީ ޝަފީއު ވަނީ މި މައްސަލައިގައި ހިމެނޭ 11 މީހުންގެ ހެކިބަސް ނަންގަވަން ފައްޓަވާފައެވެ. މިހާތަނަށް މިވަނީ 8 ހެއްކެއްގެ ހެކިބަސް ނެގިފައެވެ.
އެއީ ފަހަށް ރައްކާ ކުރެވޭ ގޮތަށް ޖިނާއީ އިޖުރާއަތުގެ ދަށުން ނަގާ ހެކިބަސްތަކެކެވެ.
މި މައްސަލައިގެ ހެކިބަސް ނެގުމުގެ އަޑުއެހުމެއް ހޯމަ ދުވަހަށްވެސް ތާވަލުކުރެވިފައިވެއެވެ.
