އައު ސީޒަނަށް ތައްޔާރުވުމުގެ ގޮތުން ރޭންޖަރސްއާއި ދެކޮޅަށް ކުޅުނު މެޗުގައި ހެރީ ކޭން ޖެހި ދެ ލަނޑާއެކު ޓޮޓެންހަމް މޮޅުވެއްޖެއެވެ.

މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ ރޭންޖަރސް އިންނެވެ. މެެޗުގެ 24 ވަނަ މިނެޓުގައި އެންޓޯނިއޯ ކޯލަކް ވަނީ އެ ޓީމަށް ލީޑު ނަގައިދީފައެވެ. އޭގެ ފަހުން ވެސް އެ ޓިީމުން ވަނީ އިތުރު ލަނޑެއް ޖަހައި ނަތީޖާ ފުޅާކުރުމަށް މަސައްކަތް ކޮށްފައެވެ.

ޓޮޓެންހަމުން ލަނޑެއް ޖެހުމަށް ކުރަމުން ދިޔަ މަސައްކަތް އެ ޓީމަށް ކާމިޔާބުކުރެވުނީ ދެ ވަނަ ހާފުގައެވެ. އެގޮތުން މެޗުގެ 50 ވަނަ މިނެޓުގައި ޓޮޓެންހަމަށް ނަތީޖާ ހަމަހަމަކޮށްދިން ލަނޑު ޖެހީ ކޭންއެވެ. އޭގެ ހަ މިނެޓު ފަހުން، 56 ވަނަ މިނެޓުގައި ކޭން ވަނީ އިތުރު ލަނޑެއް ޖަަހައި ޓޮޓެންހަމް މެޗުން މޮޅު ކޮށްދީފައެވެ.

މެޗުގައި ޓޮޓެންހަމުން ވަނީ ގިނަ ބަދަލުތަކެއް ވެސް ގެނެސްފައެވެ. އެގޮތުން އެ ޓީމުގައި ރިކާލިސަން، އީވާން ޕެރިސިޗް، ޖޯ ރޮޑޮން، ލޫކަސް މޯރާ، ލެންގުލެޓް އަދި ބިސޯމާ ފަދަ މުހިންމު ކުޅުންތެރިން ހިމެނެއެވެ. އަދި މި މެޗަކީ މީގެ ތެރެއިން ޕެރިސިޗް، ލެންގުލެޓު އަދި ބިސޯމާ ޓޮޓެންހަމަށް ކުޅުނު ފުރަތަމަ މެޗެވެ.

ކުރިއަށް އޮތް ސީޒަނަށް ތައްޔާރުވުމުގެ ގޮތުން ކުޅޭ އެކުވެރިކަމުގެ މެޗުގައި ދެން ޓޮޓެންހަމުން ވާދަކުރާނީ ރޯމާއާއެވެ. އެ މެޗު އޮންނާނީ މި މަހުގެ 30 ވަނަ ދުވަހުއެވެ. އައު ސީޒަނުގެ ޕްރިމިއަރ ލީގައި ޓޮޓެންހަމްގެ ފުރަތަމަ މެޗުގައި އެ ޓީމު ނިކުންނާނީ އޯގަސްޓު ހަ ވަނަ ދުވަހު ސައުތުހެމްޓަންއާ ދެކޮޅަށެވެ.