ތިމަރަފުށީގައި އިމާރާތްކުރާ 100 ހައުސިންގ ޔުނިޓަށް ކުރިމަތިލުމަށް ހުޅުވާލައިފި
ތިމަރަފުށީގައި އިމާރާތްކުރަނީ 3 ކޮޓަރީގެ ހައުސިންގ ޔުނިޓުތަކެއް
ތިމަރަފުށީގެ ހައުސިންގ ޔުނިޓުތައް
ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ތ. ތިމަރަފުށީގައި އިމާރާތްކުރަމުންދާ 100 ހައުސިންގ ޔުނިޓަށް އެދި ކުރިމަތިލާން ހުޅުވާލައިފިއެވެ.
ތިމަރަފުށީގެ ރައްޔިތުންނަށް ދިމާވެފައިވާ ބޯހިޔާވަހިކަމަށް ހައްލެއް ހޯދައިދިނުމަށް 100 ހައުސިންގ ޔުނިޓް އެޅުމަށް މި ސަރުކާރުން ބަޔަކާ ހަވާލުކޮށްގެން މަސައްކަތް ފެށީ 2020ވަނަ އަހަރުއެވެ. މި ޔުނިޓުތަކުގެ މަސައްކަތް އަންނަ އޮގަސްޓް މަހުގެ ނިޔަލަށް ނިންމާލެވޭނެކަމަށް ޕްލޭނިން މިނިސްޓަރ މުހައްމަދު އަސްލަމް ވަނީ މީގެ ކުރިން ވިދާޅުވެފައެވެ.
ތިމަރަފުށީ ކައުންސިލުން ކޮށްފައިވާ އިއުލާނުގައި ބުނެފައިވާގޮތުގައި މި ހައުސިންގ ޔުނިޓުތައް ދޫކުރާނީ ދެ ކެޓަގަރީއަކަށް ބަހާލައިގެންނެވެ. އެއީ ތިމަރަފުށީގެ ރައްޔިތުންނަށް ދޫކުރަން ހަމަޖެހިފައިވާ ޔުނިޓުތަކާއި، ތިމަރަފުއްޓަށް ދިރިއުޅުން ބަދަލުކުރަން ބޭނުންވާ އެހެން ރަށްރަށުގެ މީހުންނަށް ދޫކުރާ ޔުނިޓުތަކެވެ. އެގޮތުން، ތިމަރަފުށީގެ ރަށްވެހިންނަށް 83 ޔުނިޓު ކަނޑައަޅާފައިވާއިރު، އެހެނިހެން ރަށްރަށުގެ މީހުންނަށް 15 ޔުނިޓު ވަނީ ކަނޑައަޅާފައެވެ.
މީގެ އިތުރުން ޕްލޭނިންގ މިނިސްޓްރީން ދެ ޔުނިޓް ކަނޑައަޅައިފައިވަނީ ތިމަރަފުށީ ކައުންސިލުގެ ބޭނުމަށެވެ.
މި ހައުސިންގ ޔުނިޓުތަކަށް އެދި ފޯމު ހުށަހެޅުމުގެ ފުރުސަތު އަންނަ އޮގަސްޓް މަހުގެ 20 ވަނަ ދުވަހުގެ މެންދުރު 12:00އާ ހަމައަށް ވަނީ ހުޅުވާލާފައެވެ. ފޯމު ދޫކުރުމާއި ބަލައިގަތުމުގެ ކަންކަން ރަސްމީ ބަންދު ނޫން ކޮންމެ ދުވަހެއްގެ ހެނދުނު 9:00ން 12:00ށް ކައުންސިލް އިދާރާގައި ކުރިއަށްދާނެ ކަމަށްވެސް އެރަށު ކައުންސިލުން ވަނީ ބުނެފައެވެ.
ފޯމު ހުށަހަޅާ ފަރާތްތަކަށް ހައުސިންގ ޔުނިޓުތައް ދޫކުރުމުގެ ކަންކަން ކުރިއަށްގެންދިއުމަށް، ތިމަރަފުށީ ކައުންސިލް މެމްބަރުންނާއި ކައުންސިލުގައި މަސައްކަތްކުރާ ސިވިލް މުވައްޒަފުންނާއި އެ ރަށުގެ އާއްމު ފަރުދަކު ހިމެނޭހެން ވަނީ ކޮމިޓީއެއްވެސް ހަދާފައެވެ. މި "ވިލަރެސް ކޮމިޓީ"ގައި 9 މެމްބަރުން ހިމެނެއެވެ.
ތިމަރަފުށީގައި އަޅާ ހައުސިން ޔުނިޓްތަކަކީ 3 ކޮޓަރިއާއި 3 ފާޚާނާ އަދި ސިޓިން ރޫމަކާއި ބަދިގެ އަދި ލޯންޑްރީ އޭރިއާއެއް ހިމެނޭހެން ހަދާ ޔުނިޓުތަކެކެވެ. މި ޔުނިޓުތައް އެޅުމުގެ މަސައްކަތް ޕްލޭނިން މިނިސްޓްރީން ހަވާލުކޮށްފައިވަނީ އެސްޖޭ ކޮންސްޓްރަކްޝަނާއެވެ.
މި މަސައްކަތް ޕްލޭނިންގ މިނިސްޓްރީން ހަވާލުކޮށްފައިވަނީ 71 މިލިއަން ރުފިޔާއަށެވެ.
