ވައިގެ ދަތުރުފަތުރުން ޖައްވަށް ބޭރުވާ ވިހަ ގޭސް މަދުކުރުމަށް ރާއްޖޭގެ އެއްބާރުލުން ލިބޭނެ: ނަހުލާ
ދިވެހިން ދިރިއުޅެމުންދަނީ މޫސުމީ ބަދަލުތަކުގެ ސަބަބުން ދިމާވާ ގޮންޖެހުންތަކާ އެކުގައި
ޓްރާންސްޕޯޓް މިނިސްޓަރ އައިޝަތު ނަހުލާ
ކާބަން ނިއުޓްރަލް ވުމަށް އިންޓަނޭޝަނަލް ސިވިލް އޭވިއޭޝަން އޯގަނައިޒޭޝަން (އައިކާއޯ) އިން ކަނޑައަޅާފައިވާ ލަނޑުދަނޑި ހާސިލްކުރުމަށް ދިވެހިރާއްޖޭގެ ފަރާތުން ފުރިހަމަ އެއްބާރުލުން ލިބޭނެ ކަމަށް މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން އައިޝަތު ނަހުލާ ވިދާޅުވެއްޖެއެވެ.
މިނިސްޓަރ ނަހުލާ މިފަދައިން ވިދާޅުވީ ވައިގެ ދަތުރުފަތުރުގެ ސަބަބުން ޖައްވަށް ބޭރުވާ ވިހަ ގޭސް މަދުކުރުމުގެ އަމާޒުގައި އައިކާއޯ އިން ބޭއްވި މަތީ ފަންތީގެ ބައްދަލުވުމުގެ ވައިސް ޗެއަރޕަރސަންގެ ހައިސިއްޔަތުން ބައިވެރިވެވަޑައިގެން ރާއްޖޭގެ ފަރާތުން ދެއްވި ސްޓޭޓްމަންޓުގައެވެ.
މިނިސްޓަރގެ ވާހަކަފުޅުގައި ވަނީ ރާއްޖޭގެ ރައްޔިތުން ދިރިއުޅެމުންދަނީ މޫސުމީ ބަދަލުތަކާއެކު ކުރިމަތިވާ ގޮންޖެހުންތަކާއެކުގައިކަން ފާހަގަކުރައްވާފައެވެ. މޫސުމީ ބަދަލުތަކުގެ ސަބަބުން ރައްޔިތުންގެ މުދަލާއި ގެދޮރަށް އެތައް ގެއްލުމެއް ލިބެމުންދާކަމަށް ވިދާޅުވިއެވެ.
ނަހުލާ ވިދާޅުވީ މޫސުމީ ބަދަލުތަކަށް އެންމެ ބޮޑަށް ހުށަހެޅިފައިވާ ގައުމުތަކަކީ ޖައްވަށް ވިހަ ގޭސް އެންމެ މަދުން ބޭރުކުރާ ގައުމުތައް ކަމަށެވެ. އެހެންނަމަވެސް މިކަމުގެ އެންމެ ނޭދެވޭ އަސަރެއް ކުރަނީ އެމީހުންނަށް ކަމަށް ނަހުލާ ވިދާޅުވިއެވެ.
ރާއްޖެއިން މޫސުމީ ބަދަލުތަކާ ދެކޮޅަށް މަސައްކަތްކުރަމުންދާކަން ފާހަގަކުރައްވައި ނަހުލާ ވިދާޅުވީ ވައިގެ ދަތުރުފަތުރުގެ ސަބަބުން ޖައްވަށް ބޭރުވާ ވިހަ ގޭސް މަދުކުރުމަށް އައިކާއޯއިން ކުރަމުންދާ މަސައްކަތަށްވެސް ރާއްޖެއިން ދަނީ ފުރިހަމަ އެއްބާރުލުން ދެމުން ކަމުގައެވެ. އަދި ކުރިއަށް އޮތް ތަނުގައިވެސް މި އެއްބާރުލުން ދެމުންދާނެ ކަމަށް ނަހުލާ ވިދާޅުވިއެވެ.
