ރާއްޖޭގައި މިހާތަނަށް ކުރިއަށްގެންދާ އުމްރާނީ ތަރައްޤީގެ އެންމެ ބޮޑު ޕްރޮޖެކްޓްކަމުގައިވާ ގްރޭޓަރ މާލެ ކަނެކްޓިވިޓީ ޕްރޮޖެކްޓްގެ ތެރެއިން މާލެ އާއި ވިލިމާލެ ގުޅުވާލާ ބްރިޖު (ތިލަމާލެ ބްރިޖް) ގެ ފައުންޑޭޝަން މަސައްކަތް ފެށުމަށް ތައްޔާރުވަމުންދާކަމަށް މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ އިން ބުނެފިއެވެ.

މިކަމާ ގުޅޭގޮތުން ރާއްޖެއެމްވީއަށް މައުލޫމާތު ދެމުން ޕްލޭނިންގ މިނިސްޓްރީން ބުނީ، ބްރިޖުގެ ފައުންޑޭޝަން މަސައްކަތް އަންނަ މަހުގެ ފެށޭ ހަފްތާގައި ކުރުމަށް މަސައްކަތް ކުރަމުންދާ ކަމަށެވެ. މިއީ ތިލަމާލެ ބްރިޖުގެ އެންމެ މުހިންމު އަދި ބުރަ މަސައްކަތްކަން މިނިސްޓްރީން ފާހަގަ ކުރެއެވެ.

މީގެ އިތުރުން، މިހާރު ބްރިޖަށް ބޭނުންވާ މުހިންމު ސާމާނުތައް ރާއްޖެ ގެނެވިފައިވާއިރު، އަދިވެސް ބައެއް ސާމާނު ގެނައުމުގެ މަސައްކަތްތައް ކުރެވެމުންދާކަމަށް ވެސް މިނިސްޓްރީން ބުނެއެވެ.

އެ މަސައްކަތް ކުރާ އިންޑިއާގެ އެފްކޮންސް އިން ބުނީ މަސައްކަތްތައް ތާވަލާއި އެއްގޮތަށް ކުރިއަށްދާ ކަމަށެވެ. އަދި 6 ކިލޯމީޓަރުގެ މި ބްރިޖް މަޝްރޫއުގެ ފުރަތަމަ ބްރިޖު ނުވަތަ މާލެ ވިލިމާލެ ގުޅުވާލާ 1 ކިލޯ މީޓަރަށްވުރެ ދިގު ބްރިޖު އަންނަ އަހަރުގެ ޖުލައި މަހުގެ ތެރޭގައި ނުވަތަ އޮގަސްޓް މަހުގެ ފުރަތަމަ ކޮޅު އާންމުންނަށް ހުޅުވާލާނެ ކަމަށެވެ.

އެފްކޮންސް އިން ބުނީ މިހާރު ކުރިއަށްދަނީ ޖިއޯޓެކްނިކަލް ސަރވޭގެ މަސައްކަތް ކަމަށާއި، އެ މަސައްކަތުގެ 50 އިންސައްތައަށްވުރެ ގިނަ މަސައްކަތް ނިމިފައިވާ ކަމަށެވެ. އެ ކުންފުނިން ބުނީ ކަނޑުގަދަވުމާއި އެ ސަރަހައްދުގެ ގޮތުން ސަރވޭ ކުރިއަށް ގެންދިއުމުގައި ދަތިތަކެއް ހުރި ނަމަވެސް، މި އަހަރުގެ އޮކްޓޯބަރު މަހުގެ ތެރޭގައި ޖިއޯޓެކްނިކަލް ސަރވޭގެ މަސައްކަތް އެއްކޮށް ނިންމާލެވޭނެ ކަމަށެވެ.

މީގެ އިތުރުން ޖިއޯޓެކްނިކަލް ސަރވޭގެ ނަތީޖާތަކަށް ރިއާޔަތްކޮށް ޑިޒައިންގެ މަސައްކަތް ކުރަމުން އަންނަ ކަމަށާއި، މައި ބްރިޖު އެޅުމަށްޓަކައި އަޅާ ވަގުތީ ބްރިޖުގެ މަސައްކަތް ވެސް ވަރަށް އަވަހަށް ފެށިގެންދާނެކަމަށް އެފްކޮންސް އިން ބުނެއެވެ. މީގެ އިތުުރުން ބްރިޖުގެ ކޮންކްރީޓް ޓެސްޓް ކުރުމުގެ މަސައްކަތް ކާމިޔާބު ކަމަށާއި، މުޅި ބްރިޖުގެ މަސައްކަތް 2024 ވަނަ އަހަރުގެ ފަހުކޮޅު އެއްކޮށް ނިންމާލެވޭނެކަމަށް ވެސް އެކުންފުނިން ބުނެއެވެ.

ބްރިޖުގެ އުމުރު 120 އަހަރުވާން ދެން ހިފަހައްޓާނެ ކަމަށްވެސް އެކުންފުނިން ބުނެއެވެ.

އެފްކޮންސް އިން އިތުރަށް ބުނީ ބްރިޖުގެ މަސައްކަތަށް މިހާތަނަށް 88 އިންޖިނިއަރުން ރާއްޖެ އައިސްފައިވާ ކަމަށާއި، އިތުރު 164 އިންޖިނިއަރުން މިއަހަރުގެ ނިޔަލަށް އަންނާނެ ކަމަށެވެ. އަދި މި ޓީމުގެ ތެރޭގައި ތުރުކީ ޖަރުމަންވިލާތް އަދި އޮސްޓްރޭލިއާގެ އިންޖިނިއަރުން ހިމެނޭ ކަމަށް އެފްކޮންސް އިން ބުނެއެވެ.

ބްރިޖުގެ މަސައްކަތް ކުރުމަށްޓަކައި މިހާތަނަށް 500 މަސައްކަތު މީހުން ރާއްޖެ އައިސްފައިވާ އިރު، އަހަރު ނިމޭ އިރު 1227 މަސައްކަތު މީހުން ރާއްޖެ އަންނާނެ ކަމަށް ވެސް އެފްކޮންސް އިން ބުނެއެވެ.

މީގެއިތުރުން ބްރިޖު އަޅާ ސަރަހައްދަކީ މުރަކަ ފަރެއްކަމުގައި ވުމުން، ދިރޭތަކެތި ހިމާޔަތްކުރުމުގެ މުއާހަދާއާއި އެއްގޮތަށް ބްރިޖު އަޅާ ސަރަހައްދުގައި ހުރި މުރަކައިގެ ބާވަތްތައް އެހެން ހިސާބުތަކަށް ބަދަލުކުރުމުގެ މަސައްކަތް ކުރިއަށްދާ ކަމަށް އެފްކޮންސް އިން ވަނީ މީގެކުރިން ބުނެފައެވެ. އަދި ތެޔޮ ލީކުވުމުގެ އެއްވެސް މައްސަލައެއް ދިމާ ނުވާނެ ގޮތަށް ސައިޓުގެ އިންތިޒާމްތައް ހަމަޖައްސަމުން އަންނަ އިރު، މުހިންމު ގަސްތަކާއި އެ ނޫންވެސް ދިރޭ ތަކެތީގެ ބާވަތްތައް ވެސް ބަދަލުކުރުމުގެ މަސައްކަތް ކުރަމުން އަންނަ ކަމަށް ވެސް އެފްކޮންސް އިން ވަނީ މީގެ ކުރިން ބުނެފައެވެ.