ހެޔޮބަސް ބަހަކީ މާތް ﷲގެ ހަޟްރަތަށް އިންސާނާގެ މެސެޖްތައް ގެންގޮސްދޭ ސަފީރު - ޚުތުބާ
ހެޔޮ ބަހެއް ބުނުމަކީ ބޮޑު ހޭދައެއް ކުރަން ޖެހޭ ކަމެއް ނޫން
ހުކުރު ނަމާދު
ހެޔޮ ބަހަކީ މީސްތަކުންގެ ހިތްތައް ހުޅުވައިދޭ ތަޅުދަނޑި ކަމަށާއި، އެއީ މާތް ﷲގެ ހަޟްރަތަށް އިންސާނާގެ މެސެޖްތައް ގެންގޮސްދޭ ސަފީރު ކަމަށް ހުކުރު ޚުތުބާގައި ބުނެފިއެވެ.
ރާއްޖޭގެ އެކި ކަންކޮޅުތަކުގައި މިއަދު އިއްވި ހުކުރު ޚުތުބާގެ މައުޟޫއަކީ ހެޔޮބަސް ބުނުމެވެ. މި މައުޟޫއަށް އިއްވި ޚުތުބާގައި ބުނެފައިވަނީ ހެޔޮބަހަކީ ރަނގަޅު ގަހަކުން ނުކުންނަ ފައިދާ ހުރި މޭވާއެއް ކަމަށެވެ. އެއީ ހިނުތުންވުން ގެނެސްދޭ ކަމެއް ކަމަށާއި، ހެޔޮ ބަސް ބުނެ އުޅުމަކީ ވާހަކަ ދައްކާ މީހާގެ ޝަހްސިއްޔަތު އަންގައިދޭ އޭނާގެ ފޭރާން ކަމަށެވެ. އެއީ މީސްތަކުންގެ ހިތްތައް ހުޅުވައިދޭ ތަޅުދަނޑި ކަމަށާއި، އެއީ މާތް ﷲގެ ހަޟްރަތަށް އޭނާގެ މެސެޖްތައް ގެންގޮސްދޭ ސަފީރު ކަމަށެވެ.
ހެޔޮބަހެއް މެނުވީ މާތްﷲ ގެ ހަޟްރަތަށް ނުފޯރާނެ ކަމަށް ޚުތުބާގައި ބުނެފައިވެއެވެ. މާތް ﷲ ވަހީ ކުރައްވާފައިވަނީ ރަނގަޅު ބަސްތައް އުފުލިގެން ދަނީ، އެކަލާނގެ ހަޟްރަތަށް ކަމަށާއި، އަދި ސާހިލު އަމަލު އެކަލާންގެ ހަޟްރަތަށް އުފުއްލަވާ ކަމަށެވެ.
ޚުތުބާގައި ބުނެފައިވަނީ ހެޔޮ ބަހެއް ބުނުމަކީ ބޮޑު ހޭދައެއް ކުރަން ޖެހޭ ކަމެއް ނޫން ކަމަށެވެ. އޭގައި ހިމެނޭނީ އެ ބަސް ބުނާ މީހާއަށާއި، އަޑު އަހާމީހާއަށް މަންފާ އާއި ލާބަ ކަމަށެވެ. އެ ބަހުގައި ފުރައްސާރަ ކުރުމެއް، ނެތިމޮށުމެއް، ހުތުރު އެއްޗެހި ކިޔުމެއް ނުހިމެނޭ ކަމަށެވެ.
ޚުތުބާގައި ބުނެފައިވަނީ ގަސް ހެއްދުމަށް ރަނގަޅު ބިމަކަށް ބޭނުންވާ އިރު، އެ ރަނގަޅު ބިމަކީ މާތް ﷲ އަށް އަޅުކަން ކުރާ ސާލިހު މުމިނާގެ ނަފްސު ކަމަށެވެ. އަދި އެ ފަދަ ނަފްސެއްގެ ވެރިއަކަށް ވެވޭނީ މާތްﷲގެ ހަލްގުތަކުންނާ އެކު ރިވެތި ގޮތުގައި މުއާމަލާތް ކުރާ މީހަކަށް ކަމަށެވެ. އަޅުގަނޑުމެންގެ ދަރިން މިފަދަ ނަފްސުތަކެއްގެ ވެރި ބަޔަކަށް ހެދޭނީ، އާއިލީ ރަނގަޅު ތަރުބިއްޔަތާއި، ރިވެތި ނަމޫނާ އާއި، މަދްރަސީ ރަނގަޅު ތަރުބިއްޔަތާއި، ސާލިހު ރަނގަޅު ވެއްޓެއް އެ ކުދިންނަށް ހޯދައި ދީގެން ކަމަށެވެ.
އަދި މި ތިން މާހައުލަކީ ގަހެއް ރުކެއް ނުހެދޭ، ދިރުމެއް ނެތް، މަރުވެފައިވާ ބިމެއް ފަދަ މާހައުލަކަށް ވެއްޖެނަމަ، އަޅުގަނޑުމެންގެ ދަރިންގެ ހިތްތަކުގައި ހެޔޮ ބަސް ބުނުމުގެ އާދަ އަށަ ނުގަންނާނެ ކަމަށެވެ. ޚުތުބާގައި ބުނެފައިވަނި އެފަދަ ވެއްޓެއްގައި އުފެދި ބޮޑުވާ ބައެއްގެ ސަބަބުން މުޖްތަމައު އެއްބައިވަންތައެއް ނުކުރެވޭނެ ކަމަށެވެ. އެމީހުންގެ ކިބައިން ގައުމަށް ރަނގަޅު ޚިދުމަތެއް ނުލިބޭނެ ކަމަށެވެ.
ޚުތުބާގައި ބުނެފައިވަނީ ނުބައި ބަސްތަކުގައި ހަރުދަނާކަމެއް ނުހުންނާނެ ކަމަށާއި، އޭގެ ސަބަބުން މީސްތަކުންގެ މެދުގައި ފިތުނަ ފަސާދަ އުފެދޭނެ ކަމަށެވެ. އަދި އެފަދަ ބަސްތަކުގެ ސަބަބުން މީހުންނަށް މަގު އޮޅޭނެ ކަމަށެވެ. އެކަކު އަނެކަކާއި ޖެހި، މޫނު ކެނޑޭނެ ކަމަށާއި، މީހުން މަގުފުރެދި ހައްގުގެ މަގަށް ހުރަސްއެޅޭނެ ކަމަށެވެ. އަޅުގަނޑުމެންގެ މުޖްތަމައުން މިފަދަ ނޭދެވޭ އަމަލުތައް ފެންނަކަމީ ހިތާމަކުރި ކަމެއް ކަމަށް ޚުތުބާގައި ބުނެފައިވެއެވެ. ހަގީގަތާއި ހިލާފު ދޮގު ވާހަކަތައް މީސްތަކުގެން މެދުގައި ފަތުރައި، ފިތުނަ ފަސާދަ އުފައްދަން މަސައްކަތް ކުރުމަކީ މާތް ﷲ ނަހީކުރައްވާފައިވާ ކަމެއް ކަމަށް ޚުތުބާގައި ބުނެފައިވެއެވެ.
ހުކުރު ޚުތުބާގައި ބުނެފައިވަނީ ދެމަފިރިން ވެސް އެކަކު އަނެކަކާ މުއާމަލާތް ކުރަން ޖެހޭނީ ރިވެތި އޯގާތެރި ބަހުން ކަމަށެވެ. އެކަކު އަނެކަކާ ހުތުރު ބަހުން ވާހަކަދައްކައި، އެކަކު އަނެކަކު ހިތުގައި ޖައްސައި، އެ ދެމީހުންގެ ދެމެދުގައި އޮންނަން ޖެހޭ ލޯތްބާއި، ކުލުނު ނެތިދާނެ ގޮތަށް ބަސް ބުނެ އުޅެގެން ނުވާނެ ކަމަށެވެ.
މިއީ މާތްﷲ ކާވެނީގައި ލެއްވި މާތް މަގުސަދު ގެއްލި، ދެމަފިރިން ހަތުރުންނަށްވެ، ވަރިފަށަށް އަރައިދާނެ ކަމެއް ކަމަށެވެ. ޒަވާޖީ ހަތާތަކީ ލޯތްބާއި އޯގާތެވެރިކަމުގެ މަތީގައި ބިނާވެފައި އޮންނަން ޖެގޭ މުޤައްދަސް ގުޅުމެއް ކަމަށެވެ.
