ދިވެހި ޕްރިމިއަރ ލީގުގައި ބުރާސްފަތި ދުވަހުގެ ރޭ ޔުނައިޓެޑް ވިކްޓްރީ އަތުން ބަލިވެ, ފުރަތަމަ ޑިވިޝަންގައި ދެމިއޮތުމަށް ކޮލިފިކޭޝަން ކުޅެންޖެހޭނެކަން ސުޕަރ ޔުނައިޓެޑް ސްޕޯރޓްސް (ސަސް) އަށް ޔަޤީންވެއްޖެއެވެ.

މެޗުން ބަލިވުމުން ސަސްއަށް ތާވަލްގެ ހަތްވަނައަށްވުރެ ކުރިއަށް ނުދެވޭނެކަން ޔަޤީންވެ, ދެވަނަ ޑިވިޝަންގެ ފައިނަލްގައި ވާދަކުރާ ދެޓީމާއެކު ކޮލިފިކޭޝަންގައި ވާދަކުރަން ޖެހޭނެކަން ޔަޤީނެވެ. ސަސްގެ އިތުރުން ކޮލިފިކޭޝަންގައި ވާދަކުރާނީ ލީގު ތާވަލްގެ ފުލުގައި އޮތް ދަ ގްރާންޑޭއެވެ. ބާކީ ދެމެޗު އޮތް އިރު ސަސްއަށް ލިބިފައިވަނީ 14 ޕޮއިންޓެވެ. ހަވަނާގައި އޮތް ވެލެންސިޔާ އޮތީ 25 ޕޮއިންޓްގައެވެ. ވެލެންސިޔާގެ ކުރީގައި އޮތް ތިން ޓީމްވެސް އޮތީ 26 ޕޮއިންޓްގައެވެ. އެއީ ސަސް ބަލިކުރި ޔުނައިޓެޑް ވިކްޓްރީއާއި, ގްރީން ސްޓްރީޓްސްއާއި, ޓީސީއެވެ.

ސަސްގެ މައްޗަށް ޔުނައިޓެޑް ވިކްޓްރީން ކުރި ހޯދީ 3-2 ނެވެ. މެޗުގައި ޔުނައިޓެޑް ވިކްޓްރީއަށް ފުރަތަމަ ހާފްގައި ފުރަތަމަ ލަނޑު ޖަހާ ކުރި ހޯދައިދިނީ މިލޯސް ކޮވަސަވިޗްއެވެ. އެކަމަކު ދެވަނަ ހާފް ފަށައިގެން 67 ވަނަ މިނިޓްގައި އިބްރާހީމް އަތީގް ހަސަން ލަނޑުޖަހާ ސަސްއަށް ނަތީޖާ ހަމަހަމަކޮށްދިނެވެ. ޔޫވީން ދެވަނަ ފަހަރަށް ކުރިހޯދީ އިވާންގެ ލަނޑުންނެވެ. މެޗުގެ ފަހު މިނިޓްގައި ތިންވަނަ ލަނޑުވެސް ޖެހީ އިވާންއެވެ.

ލީގުގައި ހުކުރު ދުވަހު ހަވީރު ވާދަކުރާނީ އެއްވަނާގައި އޮތް މާޒިޔާއާއި ފުލުގައި އޮތް ދަ ގްރާންޑޭއެވެ. މެޗުން މޮޅުވެގެން މާޒިޔާއަށް ލީގު ޗެމްޕިއަންކަން ޔަޤީން ކުރެވޭނެއެވެ.