އިންސާނީ ވަގުފާރީގެ އެމެރިކާގެ ރިޕޯޓްގައި މުޅިންހެންވެސް ރަޝިއާގެ ނަން!

ދުނިޔޭގެ އެކި ކަންކޮޅުތަކުން އިންސާނީ ވަގުފާރި ނުވަތަ ހިއުމަން ޓްރެފިކިންގްގެ ޝިކާރައަކަށް ވެފައިވާ މީހުންގެ އަދަދު 25 މިލިއަނަށް އަރާ ކަމަށާއި، ރަޝިއާއިން ވެރިވެގެންފައިވާ ޔޫކްރެއިންގެ ރައްޔިތުން ތިބީ "އިންތިހާ ނާޒުކު" ފައްތަރެއްގައި ކަމަށް އެމެރިކާގެ ސްޓޭޓް ޑިޕާޓްމަންޓުން ބުނެފިއެވެ.

އިންސާނީ ވަގުފާރީގެ ހާލަތާ ގުޅޭ ގޮތުން އެމެރިކާއިން ކޮންމެ އަހަރަކުވެސް އެކުލަވާލާ ރިޕޯޓްގެ މި އަހަރުގެ އަދަދު އާންމު ކުރުމަށް ކުރިއަށް ގެންދިޔަ އިވެންޓްގައި، އެމެރިކާގެ ސެކްރެޓަރީ އޮފް ސްޓޭޓް އެންޓޮނީ ބްލިންކަން ވަނީ، އިންސާނީ ވަގުފާރިއާ ދެކޮޅަށް މަސައްކަތް ކުރާ އެކްޓިވިސްޓުންނަށް ހާއްސަ ޝަރަފުވެސް އަރުވާފައެވެ. މި އަހަރުގެ ޝަރަފު ލިބުނު އެކްޓިވިސްޓުންގެ ތެރޭގައި ޔޫކްރެއިންގެ އެންޖީއޯއެއްކަމަށްވާ ލާ ސްޓްރާޑާގެ ރައީސް، ކެޓެރީނާ ޗެރެޕަކާ ހިމެނެއެވެ.

އެމެރިކާއިން އާންމު ކޮށްފައި ވާ އިންސާނީ ވަގުފާރީގެ ހާލަތު ބަޔާން ކުރާ ރިޕޯޓަށް ބަލާއިރު، "ވަކި ނިޒާމެއް" ގެ ތެރެއިން އިންސާނީ ވަގުފާރީގެ ޖަރީމާ ހިންގާ ގައުމުތަކުގެ ލިސްޓުގައި ރަޝިއާ ވަނީ ހިމަނާފައެވެ. އޭގެ ތެރޭގައި މަޖުބޫރުން "ލޭބަރ" މަސައްކަތް ކުރުވުން ނުވަތަ ސަލާމަތީ ފައުޖުތައް ނުވަތަ ސަރުކާރުގެ ތާއިދާއެކު ހަރަކާތްތެރިވާ ހަތިޔާރުއެޅި ޖަމާއަތްތަކަށް "ސިފައިން"ގެ ގޮތުގައި ކުޑަ ކުދިން ރެކްރޫޓް ކުރާ ކުރުންވެސް ހިމަނާފައިވެއެވެ.

ރިޕޯޓްގެ އެކި ހިސާބުތަކުގައި ރަޝިއާގެ ނަން ފާހަގަކޮށްފައިވެއެވެ. ސަބަބެއްކަމުގައި ބަޔާން ކުރަނީ ފެބްރުއަރީ 24 ވަނަ ދުވަހު ޔޫކްރެއިނަށް އަރާ، ފަށާފައިވާ ހަނގުރާމައެވެ. ހަނގުރާމައިގެ ސަބަބުން ޔޫކްރެއިންގެ އެތައް މިލިއަން ރައްޔިތުންނެއް ގައުމު ދޫކޮށް، އެހެން ސަރަހައްދުތަކަށް ރެފިއުޖީންގެ ގޮތުގައި ބަދަލު ވެފައިވާއިރު، އެ މީހުންނަކީ ވަގުފާރީގެ ޝިކާރައަކަށް ވުމުގެ ނުރައްކަލުގައި ތިބި ނާޒުކު ބައެއް ކަމަށް އެމެރިކާގެ ރިޕޯޓްގައި ފާހަގަކޮށްފައިވެއެވެ.

އެމެރިކާގައި ހުންނަ ރަޝިއާގެ އެމްބަސީއިން އެ ރިޕޯޓަށް ތަފްސީލީ ގޮތެއްގައި އެއްޗެއް ބުނެފައި ނުވާ ކަމަށް ރޮއިޓާސްއިން ޚަބަރު ދެއެވެ.

ސަރުކާރާ ގުޅިފައިވާ ސެކްޓަރުތަކުގައި މަޖުބޫރުން މަސައްކަތް ކުރުވުމާއި، ސަރުކާރުގެ ކޭމްޕުތަކުގައި ޖިންސީ އަޅުންގެ ގޮތުގައި ގެންގުޅުމާއި، ސިފައިންގެ ގޮތުގައި ކުޑަކުދިން ގެންގުޅުމުގެ މައްސަލަތަކުގައި އެކުލަވާލާފައިވާ އާ ބާބުގައި ލިސްޓުކޮށްފައިވާ އިތުރު ގައުމުތަކަށް ބަލާއިރު، އަފްޣާނިސްތާން، މިޔަންމާ، ކިއުބާ، އީރާން އަދި އުތުރު ކޮރެއާ ފާހަގަކުރެވެއެވެ.