ބޮޑީބޯޑިންގައި ދުނިޔޭގައި ބޭއްވޭ އެންމެ ބޮޑު މުބާރާތް, ބޮޑީބޯޑިންގ ވަރލްޑް ޓުއަރ މިމަހު ރާއްޖޭގައި ބާއްވަން ބޮޑީބޯޑިންގ އެސޯސިއޭޝަނުން ތައްޔާރުވެއްޖެއެވެ.

"ވިޒިޓް މޯލްޑިވްސް ޕްރޯ 2022" ގެ ނަމުގައި މުބާރާތް ރާއްޖޭގައި ފަށާނީ މިމަހުގެ 29 ވަނަ ދުވަހުއެވެ. އަންނަ މަހުގެ 7 ވަނަ ދުވަހުގެ ނިޔަލަށް ރާއްޖޭގައި މުބާރާތް ކުރިއަށްދާނެއެވެ. މުބާރާތް އޮންނާނީ މާލޭގެ ވަރުނުލާ ރާޅުގަނޑު ސަރަހައްދުގައެވެ. މުބާރާތުގައި ދުނިޔޭގެ އެންމެ މޮޅު ބޮޑީބޯޑަރުން ވާދަކުރާނެއެވެ. އަދި ރާއްޖޭގެ ބޮޑީބޯޑަރުންނަށް ޚާއްޞަ ފުރުޞަތުތަކެއް ލިބޭނެކަމަށް ބޮޑީބޯޑިންގ އެސޯސިއޭޝަނުން މައުލޫމާތުދެއްވައެވެ. އޭގެތެރޭގައި އަންހެން ބޮޑީބޯޑަރުންވެސް ހިމެނެއެވެ.

އެސޯސިއޭޝަންގެ ޖެނެރަލް ސެކެޓްރީ ހަސަން ރަޝީދު (ރުޝް) ބުނީ މިއީ 2020 ވަނަ އަހަރު އިންޓަރނޭޝަނަލް ބޮޑީބޯޑިންގ ކޯޕަރޭޝަން (އައި.ބީ.ސީ) އެފިލިއޭޓްވީ ހިސާބުން ކުރަމުން އައި މަސައްކަތެއްގެ ނަތީޖާ ކަމަށެވެ. ވަރލްޑް ޓުއަރ ރާއްޖެއަށް ގެންނަން މަސައްކަތް ފެށީ 2020 ވަނަ އަހަރު ކަމަށާއި, ރާއްޖޭގައި އޮންނަނީ ޓުއަރގެ އެއް ލެގުކަމަށް އެސޯސިއޭޝަނުން ބުންޏެވެ.

ރާއްޖޭގައި އިންޓަރނޭޝަނަލް ސަރފިންގ އަދި ބޮޑީބޯޑިންގ މުބާރާތެއް ބާއްވާނެކަން މިއަހަރުގެ ކުރީކޮޅު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު އިއުލާންކުރެއްވިއެވެ. ރުޝް ބުނީ މިމުބާރާތް ރާއްޖޭގައި ބާއްވަނީ ސަރުކާރުގެ ވަރަށްބޮޑު ބައިވެރިވުމަކާއި, އެއްބާރުލުން ލިބިގެންކަމަށެވެ. އަދި މިއީ ރައީސުލްޖުމްހޫރިއްޔާ އެއިޝާރާތްކުރެއްވި މުބާރާތްތަކުގެ ތެރެއިން މުބާރާތެއްކަމަށެވެ.