ސިޓީ ކައުންސިލުން އެއްބާރުލުން ނުދެނީ މިނީ ބަހުގެ ޚިދުމަތް ފެއިލްކޮށްލަން ކަމަށް ބެލެވޭ: އާޒިމް
އާޒިމް ވިދާޅުވީ ސިޓީ ކައުންސިލުން އެއްވެސް ވަރަކަށް އެއްބާރުލުން ނުދޭ ކަމަށް
އެމްޓީސީސީގެ ސީއީއޯ އާދަމް އާޒިމް މިނީ ބަހެއްގައި
މާލޭގައި މިނީ ބަހުގެ ޚިދުމަތް ފަށަން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ކުރަމުން އަންނަ މަސައްކަތްތަކަށް މާލެ ސިޓީ ކައުންސިލުން އެއްބާރުލުން ނުދެނީ އެ ޚިދުމަތް ފެއިލް ކޮށްލަން ކަމަށް ބެލެވޭ ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.
"ރާއްޖެ ޓީވީ" ގެ ފަލަސުރުޚީ ޕްރޮގްރާމުގައި ވާހަކަދައްކަވަމުން އާޒިމް ވިދާޅުވީ މާލޭގައި މިނީ ބަހުގެ ޚިދުމަތް ފަށަން އެމްޓީސީސީ އޮތީ ތައްޔާރަށް ކަމަށެވެ. އެގޮތުން، މިނީ ބަސްތައް މިހާރު ގެނެފައިވާ ކަމަށާއި ބަސް ސްޓޮޕްތައް ހެދުމަށް ބޭނުންވާ ހުއްދައަށް ސިޓީ ކައުންސިލުގައި އެދިފައިވާ ކަމަށް އޭނާ ވިދާޅުވިއެވެ. ނަމަވެސް ސިޓީ ކައުންސިލުން މިހާތަނަށް އެމްޓީސީސީގެ އެއްވެސް ސިޓީއަކަށް ޖަވާބު ދީފައިނުވާ ކަމަށާއި އެއްވެސް ވަރަކަށް އެކަމުގައި ކައުންސިލްގެ އެއްބާރުލުމެއް ނުލިބޭ ކަމަށް އާޒިމް ވިދާޅުވިއެވެ.
އާޒިމް ވިދާޅުވީ މިނީ ބަސް ފަދަ ރައްޔިތުންނަށް މުހިންމު ޚިދުމަތެއް ދެވޭނީ އެމްޓީސީސީގެ އިތުރުން ސިޓީ ކައުންސިލުން ވެސް އެއްބާރުލުން ދީގެން ކަމަށެވެ. އަދި އެއްބާރުލުން ނުދޭނަމަ އެ ޚިދުމަތް ދޭން ޖެހޭ އެންމެ ފުރިހަމަ ގޮތުގައި ދޭން ދަތިވާނެ ކަމަށް ވެސް އޭނާ ވިދާޅުވިއެވެ.
އެމްޓީސީސީން ވަނީ ރާއްޖޭގެ 4 ސަރަހައްދެއްގައި މީނީ ބަހުގެ ޚިދުމަތް ފަށަން ނިންމާފައެވެ. އެގޮތުން، މި ޚިދުމަތް ފަށަން ބޭނުންވާ 41 ބަހުގެ ތެރެއިން 36 ބަސް މިހާރު ވަނީ ރާއްޖެއަށް ގެނެސްފައެވެ. އެއީ މާލެ އާއި އައްޑޫ ސިޓީ އާއި ފުވައްމުލައް ސިޓީގެ އިތުރުން ލ. އަތޮޅުގައެވެ.
އެމްޓީސީސީން މާލޭގައި މިނީ ބަހުގެ ޚިދުމަތް ފަށަން ނިންމާފައިވަނީ ޖުލައި 31ގައެވެ. އެ ގޮތުން، މާލޭގައި ބަސް ސްޓޮޕްތައް ބަހައްޓައި ބަސް ހުއްޓާނެ ޖާގަތައް ހެދުމުގެ މަސައްކަތް ވީހާވެސް އަވަހަށް ފަށަން ބޭނުންވާ ކަމަށް އެމްޓީސީސީން ބުނެއެވެ.
އެ ކުންފުނިން މައުލޫމާތު ދޭ ގޮތުގައި މާލޭގައި މިނީ ބަހުގެ ޚިދުމަތް ފެށުމުން ކޮންމެ 10 މިނެޓަކުން ބަސް ސްޓޮޕުތަކުން ދަތުރުތައް އޮންނާނެއެވެ.
އެމްޓީސީސީން ރާއްޖެ ގެނައި މިނީ ބަސްތަކަކީ 20-25 މީހުންގެ ޖާގައިގެ ބަސްތަކެކެވެ.
