މެންޗެސްޓަރ ޔުނައިޓެޑް ދޫކޮށްލަން ބޭނުންވާކަން ހާމަކޮށްފައިވާ ކްރިސްޓިއާނޯ ރޮނާލްޑޯ ސްޕެއިންގެ އެތުލެޓިކޯ މެޑްރިޑަށް ބައްދަލުވާން މަސައްކަތްކުރާ ކަމަށް މީޑިއާ ރިޕޯޓުތައް ބުނެފިއެވެ.

ސްޕެއިންގެ މީޑިއާތަކުގައި ރިޕޯޓުކޮށްފައިވާ ގޮތުގައި ރޮނާލްޑޯ ވަނީ އޭނާ ގެންދިޔުމަށް އެދި އެތުލެޓިކޯ މެޑްރިޑާ ވާހަކަ ދައްކާފައެވެ. ފަސް ފަހަރު ބެލޮންޑިއޯ އެވޯޑު ހޯދާފައިވާ ރޮނާލްޑޯ އަށް ވަނީ އޭނާ ބަދަލުވާނެ ކުލަބެއް ހޯދުމަށް ދަތިތަކަކާ ކުރިމަތިލާން ޖެހިފައެވެ. ޔުވެންޓަސް ދޫކޮށް ޔުނައިޓެޑަށް ބަދަލުވި ފަހުން އެ ޓީމާއެކު އޭނާއަށް އެދެވޭ ނަތީޖާއެއް ނެރެވޭ ގޮތް ވަނީ ނުވެފައެވެ. ޓީމު ދޫކޮށްލަން ބޭނުންވާކަން އޭނާ ޓީމަށް އެންގީ ޔުނައިޓެޑަށް ޔުއެފާ ޗެމްޕިއަންސް ލީގުގެ ޖާގަ ގެއްލުމުން ކަމަށް މީޑިއާ ރިޕޯޓުތައް ބުނެއެވެ.

މިހާތަނަށް ރޮނާލްޑޯގެ އެޖެންޓު ޖޯޖް މެންޑޭސް ވަނީ ޔޫރަޕުގެ ބޮޑެތި ކުލަބުތަކަށް ރޮނާލްޑޯ ގެންދިޔުމުގެ އޮފާ ހުށަހަޅާފައި ކަމަށާއި، އެ ޓީމުތަކުން އޮފާ ރިޖެކްޓުކުރި ކަމަށް ވެސް ރިޕޯޓުތަކުގައި ވެއެވެ. އޭގެ ތެރޭގައި ޖަރުމަނުގަ ބަޔާން މިއުނިކާއި، ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަދި އިނގިރޭސި ޕްރިމިއަރ ލީގުގެ ޗެލްސީ ހިމެނެއެވެ. މީގެ ތެރެއިން ޕީއެސްޖީގެ ރައީސް ނާސިރު އެލް-ހެއްލާފީއަކީ މެންޑޭސްއާ ގާތް ގުޅުމެއް އޮތް ފަރާތަކަށްވީ ނަމަވެސް، އެ ޓީމުން ވަނީ އޮފާ ރިޖެކްޓުކޮށްފައެވެ. މީގެ އިތުރުން ޗެލްސީގެ ވިސްނން ހުރީ ޓީމުގެ ޑިފެންސް ލައިން ވަރުގަދަ ކުރުމަށް ކަމަށްވާއިރު، ބަޔާނުން ދެކޭ ގޮތުގައި މިވަގުތު ރޮނާލްޑޯގެ ސޮއި ހޯދުމަކީ އެންމެ ރަނގަޅު ގޮތަކަށް ނުވާނެއެވެ.

ސްޕެއިންގެ ޑިއާރިއޯ އޭ.އެސްގައި ރިޕޯޓުކޮށްފައިވާ ގޮތުގައި ރޮނާލްޑޯ ވަނީ އެތުލެޓިކޯ މެޑްރިޑްގެ ކޯޗު ޑިއޭގޯ ސިމިއޯނޭއާ ވާހަކަ ދައްކައި، އޭނާ އެ ކުލަބަށް ގެންދިޔުމަށް އެދިފައެވެ. މީގެ އިތުރުން އެ ރިޕޯޓުގައިވާ ގޮތުން އެތުލެޓިކޯއިން ރޮނާލްޑޯ ގެންދިޔުމަކީ އެކަށީގެންވާ ކަމަކަށް ވެދާނެއެވެ. ސަބަބަކީ ނިމުނު ސީޒަނަށްފަހު އެ ޓީމުގެ ފޯވާޑުގައި ކުޅެމުން އައި ލުއިސް ސުއަރޭޒް ޓީމު ދޫކޮށްލުމުން އެތަން ފޫބެއްދުމަށެވެ.

ކުރިއަށް އޮތް ސީޒަނަށް ޔުނައިޓެޑުން ތައްޔާރުވަމުން އަންނަ އިރު، ޓީމުގެ ފަރިތަކުރުންތަކުގަޔާއި، އެކުވެރިކަމުގެ މެޗުތަކުގައި ރޮނާލްޑޯ ނުކުޅެއެވެ. ރޮނާލްޑޯ ނެތް ނަމަވެސް، އައު ކޯޗު އެރިކް ޓެން ހާގްގެ އިރުޝާދުގެ ދަށުން ޔުނައިޓެޑު ވަނީ މިހާތަނަށް ރަނގަޅު ނަތީޖާއެއް ނެރިފައެވެ. ޕްރީ ސީޒަންގެ ފުރަތަމަ މެޗުގައި އެ ޓީމުން ވަނީ 4-0 ން ވާދަވެރި ލިވަޕޫލް ބަލިކޮށްފައެވެ. ދެވަނަ މެޗުގައި އެ ޓީމުން ވަނީ 4-1 ން މެލްބަން ބަލިކޮށްފައެވެ.

ކޯޗު ޓެން ހާގްގެ ޕްލޭންއަކީ ޓީމުގައި ރޮނާލްޑޯ ހިމަނައިގެން ކުރިއަށް ދިޔުމެވެ. އޭނާ ވަނީ ރޮނާލްޑޯއަކީ ވިއްކާލާނެ ކުޅުންތެރިޔެއް ނޫން ކަމަށް ވެސް ބުނެފައެވެ. މީގެ އިތުރުން ޓެން ހާގް ބޭނުންވަނީ ރޮނާލްޑޯ ހިމެނޭ ގޮތަށް ޓީމު އެކުލަވާލައި، ކުރިއަށް އޮތް ސީޒަނުގައި ރަނގަޅު ނަތީޖާއެއް ނެރުމަށެވެ.