ފަތުރުވެރިކަމުގެ ވާދަވެރިކަމުގެ ތެރޭގައި ރާއްޖޭގެ ނަން ދެމެހެއްޓޭނީ ޚާއްޞަ ސިފަތައް އެގޮތުގައި ދެމެހެއްޓިގެން – ރައީސް

ފަތުރުވެރިކަމުގެ ވާދަވެރިކަމުގެ ތެރޭގައި، ރާއްޖެގެ ނަން ދެމެހެއްޓޭނީ ދިވެހި ފަތުރުވެރިކަމުގެ ޚާއްޞަ ސިފަތައް އެގޮތުގައި ދެމެހެއްޓިގެން ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަކުރުމަށް ކުރުނބާ މޯލްޑިވްސްގައި އާދީއްތަ ދުވަހު މަޓީން ބޭއްވި އެވޯޑް ހަފްލާ ޝަރަފުވެރިކުރައްވައި ވާހަކަފުޅުދައްކަވަމުންނެވެ. އެ ޖަލްސާގައި ރައީސް ވިދާޅުވީ، ދުނިޔޭގެ ފަތުރުވެރިކަމުގެ ވިޔަފާރީގައި މިހާރު އޮތީ ވަރަށް ވާދަވެރި މާޙައުލެއް ކަމަށެވެ. ރާއްޖޭގެ ފަތުރުވެރިކަން ނަމޫނާއަކަށް ބަލައިގެން ފަތުރުވެރިކަން ތަރައްޤީކުރާ ކިތަންމެ މަންޒިލެއް މިހާރު އެބަހުރި ކަމަށާއި މި ވާދަވެރިކަމުގެ ތެރޭގައި، ދިވެހިރާއްޖޭގެ ނަން ދެމެހެއްޓޭނީ، ވަރަށް ބުރަ މަސައްކަތްތަކެއް ކޮށްގެން ކަމަށް ރައީސް ވިދާޅުވިއެވެ.

Advertisement

ރައީސް ވިދާޅުވީ މި ރާއްޖޭގެ ޖަޒީރާވަންތަ ސިފަތައް ނުގެއްލޭނެ ފަދަ ގޮތަކަށް، ފަތުރުވެރިކަމުގެ ޞިނާޢަތު ސިންދަފާތު ކުރުމަކީވެސް، މި ޞިނާޢަތުގެ ނަފާ އިތުރުކުރުމަށްޓަކައި ކޮންމެހެން ކުރަންޖެހޭ ކަމެއް ކަމަށެވެ. އަދި ފަތުރުވެރިކަމުގެ ޞިނާޢަތަށް ކުރިމަތިވާ ގޮންޖެހުންތައް ނައްތައިލުމަކީވެސް، އަޅުގަނޑުމެންގެ ވިސްނުމުގައި ބަހައްޓަންޖެހޭނެ ކަމެއް ކަމަށެވެ.

ރައީސް ވަނީ ދިވެހި ފަތުރުވެރިކަމުގެ ޞިނާޢަތުގެ ހުރިހާ ފަންތިއެއްގައި މަސައްކަތް ކުރައްވާ ބޭފުޅުންނަށް ވަރަށް ޚާއްޞަ ގޮތެއްގައި ޝުކުރު ދަންނަވާފައެވެ. ރާއްޖެއަށް ފަތުރުވެރިން އުފުލައިދޭ އެއަރލައިންތަކާއި ޓުއަރ އޮޕަރޭޓަރުންނަށްވެސް ޝުކުރު ދެންނެވިއެވެ.

އަދި ޓޫރިޒަމް މިނިސްޓްރީގެ އެންމެހައި މުވައްޒަފުންނަށާއި، ފަތުރުވެރިކަން އިޝްތިހާރު ކުރައްވާ އެމް.އެމް.ޕީ.އާރް.ސީ. އަށްވެސް އެމަނިކުފާނު ވަރަށް ޚާއްޞަ ޝުކުރެއް ދެންނެވިއެވެ.