އާރްޓީއެލް ލޯގޯއިން ރީނދޫ ކުލަ ފޮހެލިޔަސް އާރް.ޓީ.އެލް ސްޕީޑް ބޯޓު ދަތުރު ފަތުރުގެ ލުއިފަސޭހަ ނިޒާމަކީ ރައީސް އިބޫ ވެރިކަމުގައި ފެއްޓެވި ނިޒާމެއްކަން ދިވެހިން ގަބޫލުކުރާނެ ކަމަށް ރައްޔިތުން މަޖިލީހުގެ ވެލިދޫ ދާއިރާގެ މެންބަރު މުޙައްމަދު އައްބާސް ވިދާޅުވެއްޖެ އެވެ.

އައްބާސް އެކްސްގައި ކުރެއްވި ޕޯސްޓެއްގައި ވިދާޅުވީ އާރް.ޓީ.އެލް ފެރީ ލާންޗު ތަކުގެ ލޯގޯ އިން ރީދޫ ކުލަ ފޮހެލުމަށް ފަހު އަޅިކުލަ ލިޔަސް، އަދި މަޑު ވިލު ކުލަ ލިޔަސް އާރް.ޓީ.އެލް ސްޕީޑް ބޯޓު ދަތުރު ފަތުރުގެ ލުއިފަސޭހަ ނިޒާމަކީ ރައީސް ސާލިހުގެ ވެރިކަމުގައި އެކުލަވާލި ނިޒާމެއް ކަަމަށެެވެ. އެގޮތުން އެ ނިޒާމަކީ އެމްޑީޕީގެ ވެރިކަމުގައި ރާއްޖެތެރޭގެ ރައްޔިތުންނަށް ވަރަށް މާތް ނިޔަތެއްގައި މުޅި ރާއްޖެއަށް ފައްޓަވައި ދެއްވާފައިވާ ކަމެއް ކަމަށް ވެސް އައްބާސް ވިދާޅުވިއެވެ.

މީގެ އިިތުރުން އެ ނިޒާމަކީ ކާމިޔާބު ނިޒާމެއްކަން ދިވެހި ރައްޔިތުން ގަބޫލު ކުރައްވާނެ ކަމަށް އައްބާސް ވިދާޅުވިއެވެ. އައްބާސް ވިދާޅުވީ ރައީސް ޞާލިހު އެކަން ކުރެއްވީ ކޮންވެރިކަމެއްގައިކަން ނޭގޭ ހަމަ އެއްވެސް ދިވެހި ރައްޔިތަކު ނުހުންނާނެ ކަމަށެވެ.

މީގެ އިތުރުން ޤާނޫނީ ވަކީލް އަލްއުސްތާޒު އަހްމަދު މައުރޫފް އެކްސްގައި ކުރެއްވި ޕޯސްޓެއްގައި ވިދާޅުވީ، އާރްޓީއެލް ގެ ލޯގޯއިން ރީނދޫ ކުލަ ފޮހެލިކަމުގައި ވިޔަސް މި މަޝްރޫޢުއަކީ އެމްޑީޕީގެ ސަރުކާރުން ފެށި މަޝްރޫއުއެއް ކަމަށެވެ. އަދި މިއީ ރީނދޫ ދޮންކެޔޮ ގަނޑެއްގައި ނޫކުލަ ލީ ޑީއަރްޕީގެ ވިސްނުން ކަމަށާއި މިކަމުން ހާމަވަނީ މުޢިއްޒުގެ ފިނޑިކަން ކަމަށް މައުރޫފް ވިދާޅުވި އެވެ.

ސަރުކާރުގެ ޓްރާންސްޕޯޓު ކުންފުނި، އެމްޓީސީސީގެ ދަށުން ދޭ އާރްޓީއެލް ހިދުމަތުގެ ލޯގޯއަށް ބަދަލު ގެނެސްފައިވާކަން އެނގުނީ ބ. އަތޮޅުގައި އާރްޓީއެލްގެ ހިދުމަތް ފެށުމަށް އެ އަތޮޅަށް ގެންދިޔަ ލޯންޗުތަކުގެ ބޭރު ދަވާދަށް ގެނެސްފައިވާ ބަދަލުންނެވެ.

އާރްޓީއެލް ހިދުމަތް ދޭން ބޭނުންކުރާ ފެރީތަކުގެ ބޭރު ކުލައަށް ސަރުކާރުން ބަދަލުތަކެއް ގެނައި ސަބަބެއް އެމްޓީސީސީން އަދި ހާމައެއް ނުކުރެ އެވެ. އަދި އާރްޓީއެލްގެ ލޯގޯއަށް ރަސްމީކޮށް ބަދަލެއް ގެނައިކަމެއް ވެސް އެ ކުންފުނިން ހާމައެއް ނުކުރެ އެވެ.

އާރް.ޓީ.އެލް ފެރީ ލާންޗު ތަކުގެ ލޯގޯ އިން ރީދޫ ކުލަ ފުހެލުމަށް ފަހު އާރްޓީއެލްގެ ލޯގޯ ބަދަލުކޮށްފައިވާތީ އެމްޓީސީސީގެ މިހާރުގެ މެނޭޖްމެންޓާއި ސަރުކާރަށް ވަރަށް ބޮޑަށް ފާޑުކިޔުން ވަނީ އަމާޒުވެފައެވެ.