ވިއްސާރަ ރަނގަޅުވާނެ ކަމަށް ލަފާކުރެވެނީ ހުކުރު ދުވަހު: މެޓް އޮފީސް
17 ޖުލައި 2022 | އާދީއްތަ 16:17މި ހަފްތާގައި އެއްކޮށް ވިއްސާރަ ކުރާނެ ކަމަށް ވަނީ ލަފާކޮށްފައި
މޫސުން ގޯސްވެ ކަނޑު ގަދަ ދުވަހެއް
ރާއްޖެއަށް މިހާރު ކުރަމުން އަންނަ ވިއްސާރަ ރަނގަޅުވާނެ ކަމަށް ލަފާ ކުރެވެނީ އަންނަ ހުކުރު ދުވަހު ކަމަށް މޫސުމާ ބެހޭ ޤައުމީ އިދާރާއިން ބުނެފިއެވެ.
އެ އިދާރާއިން "ރާއްޖެ އެމްވީ" އަށް ބުނީ ކުރިއަށް އޮތް ހަފްތާއެއްހާދުވަހު ރާއްޖޭގެ ގިނަ ސަރަހައްދުތަކަށް ވިއްސާރަ ކުރާނެ ކަމަށެވެ. އެގޮތުން، ބޮޑަށް ވިއްސާރަ ކުރާނެ ކަމަށް ލަފާ ކުރެވެނީ ރާއްޖޭގެ އުތުރުގެ އަތޮޅުތަކާއި މެދުރާއްޖެތެރޭގެ އަތޮޅުތަކަށް ކަމަށްވެސް އެ އިދާރާއިން ބުންޏެވެ.
މޫސުމާ ބެހޭ ޤައުމީ އިދާރާއިން ބުނި ގޮތުގައި މި ހަފްތާގެ ބުދަ ދުވަހު ގަދަޔަށް ވާރޭ ވެހޭނެ ކަމަށް ލަފާ ކުރެވެއެވެ.
މޫސުން ލަފާ ކުރާ ގޮތުގައި ރާއްޖޭގައި ގަޑިއަކު 10 މޭލާއި 20 މޭލާ ދެމެދުގެ ބާރު މިނުގައި ވައި ޖެހޭނެއެވެ. އަދި ވިލާގަނޑުގައި ގަޑިއަކު 45 މޭލާއި 55 މޭލަށް ވައިގަދަވާނެ ކަމަށް ވެސް ވަނީ ލަފާ ކޮށްފައެވެ.
މި މުއްދަތުގައި ރާއްޖޭގެ ކަނޑުތައް ގަދަވާނެ ކަމަށް ލަފާ ކޮށްފައިވާއިރު މި މުއްދަތުގައި ރަށްތަކަށް އުދަ އަރާނެ ކަމަށް ލަފާ ނުކުރެވޭ ކަމަށް މޫސުމާ ބެހޭ ޤައުމީ އިދާރާއިން ބުންޏެވެ.
އެ އިދާރާއިން ވަނީ މި ހަފްތާގައި ކަނޑު ދަތުރު ކުރާ ފަރާތްތަކުން ސަމާލުވުމަށް އެދިފައެވެ. އެގޮތުން، ދަތުރަށް ފެށުމުގެ ކުރިން މޫސުމާ ބެހޭ އެންމެ ފަހުގެ މައުލޫމާތު ހޯދުމަށާއި ސަލާމަތީ ފިޔަވަޅުތައް އަޅާފައިވާކަން ކަށަވަރު ކުރުމަށް އެ އިދާރާއިން އިލްތިމާސްކުރެއެވެ.
