މުޅި ރާއްޖެއަށް ވައިޓް އެލަރޓް ނެރެފި

ރާއްޖެއަށް މިހާރު ކުރަމުންދާ ވިއްސާރައިގައި މުޅި ރާއްޖެއަށް ހުދު ސަމާލު ނެރެފި އެވެ.

މޫސުމާއި ބެހޭ ގައުމީ އިދާރާއިން ނެރެފައިވާ ހުދު ސަމާލުގައި ބުނެފައިވަނީ އޮކްޓޯބަރު 16 ވަނަ ދުވަހުރޭ 20:00 އިން ފެށިގެން 17 އޮކްޓޯބަރުގެ ދަންވަރު 2:00 އާއި ހަމައަށް މިއެލަރޓް ނެރެފައިވާ ކަމަށެވެ.

އެގޮތުން ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައިޖެހި ވިލާގަނޑުގައި ގަޑިއަކު 45 މޭލަށް ވައިގަދަވެ ކަނޑުތައް ގަދަވާނެ ކަމަށް ލަފާކުރެވޭ ކަމަށް މެޓުން ވަނީ ބުނެފައެވެ.

ރާއްޖެޓީވީގެ 60 މިނިޓްގައި ވާހަކަ ދައްކަވަމުން މޫސުމާއި ބެހޭ ގައުމީ އިދާރާގެ އެސިސްޓަންޓް މީޑިއޮރޮލޮޖިސްޓް ހުސެއިން ވަހީދު ވިދާޅުވީ ކުރިއަށް އޮތް ސައުވީސް ގަޑިއިރު ރާއްޖޭގެ ހުރިހާ ހިސާބަކަށް ވެސް މޫސުމް ގޯސްވާނެ ކަމަށާއި، ގުގުރުމާއި އެކު ބޯކޮށްވާރޭހެނޭ ކަމަށެވެ.

ރާއްޖެ އަށް މިހާރު ކުރަމުން މިދަނީ މޫސުމީ ވިއްސާރަ ކަމަށާާއި ކުރިއަށް އޮތް ގަޑިތަކުގައި ކަނޑުތައް ވަރަށް ގަދަވާނެ ކަމަށް ލަފާކުރެވޭ އިރު ކަނޑު ދަތުރުކުރާ ފަރާތްތަކުން މޫސުމަށް ހާއްސަ ސަމާލުކަމެއް ދިނުމަށް ހުސެއިން ވަހީދު ވަނީ އިލްތިމާސްކޮށްފައެވެ.

ހުޅަނގު މޫސުމުގެ ބާރު ގަދަވެފައިވާއިރު. މަލިކު ކައިރިން، އެސަރަހައްދުގައި ބާރުގަދަ ކޮޅިގަނޑެއް ހުރި ނަމަވެސް ކޮޅިގަނޑު ދާނީ މަޑުމަޑުން ރާއްޖެއާ ދުރަށް ކަމަށް ހުސެއިން ވަހީދު ވިދާޅުވި އެވެ.

ރާއްޖެ އަށް ކުރަމުންދާ ވިއްސާރައިގައި، މާލެއިން ފުރައިގެން ކ.އެރިޔަދޫ އަށް ހަތް މީހުންނާ އެކު ދަތުރު ކުރަމުން ދިޔަ "އަލްމާކް ފިޔަ" ލޭންޑިން ކްރާފްޓް ބަންޑުން ޖަހާލި ހާދިސާގައި ގެއްލިގެން ހޯދި ތިން މީހުންގެ ތެރެއިން 2 މީހަކު ވަނީ މަރުވެފައެވެ.

މީގެ އިތުރުން މާލެއިން ޅ. ނައިފަރަށް ދަތުރު ކުރަމުން ދިޔަ މުދާ އުފުލާ ބޯޓެއްވެސް ވަނީ އަޑިއަށް ގޮސްފައެވެ.

މޫސުމާ ގުޅިގެން ކުރިމަތިވެދާނެ އެކި ހާދިސާތަކަށް ތައްޔާރުވުމުގެ ގޮތުން، ދިވެހި ފުލުހުންގެ ޚިދުމަތުން ވަނީ އެހެނިހެން މުއައްސަސާތަކާ ގުޅިގެން މަސައްކަތްކުރުމުގެ އިންތިޒާމުތައް ވަނީ ހަމަޖައްސާފައެވެ.

ކުއްލި ހާލަތެއް ކުރިމަތިވެ ނުވަތަ ފުލުހުންގެ އެހީތެރިކަން ބޭނުންވެއްޖެނަމަ، 911 އަށް ގުޅުއްވުމަށް ފުލުހުން ވަނީ އެދިފައެވެ.