ތައިލެންޑް މުބާރާތުގައި ދީމާއަށް 4 މެޑަލް
މުބާރާތުގައި ދީމާ ހާސިލްކުރީ 1 ރަން މެޑަލްއާއި 3 ލޯ މެޑަލް
ދީމާ، މުބާރާތުގައި ހޯދި ކާމިޔާބީތަކާއެކު
ތައިލެންޑުގައި ކުރިއަށް ގެންދިޔަ އޯލް ތައިލެންޑް ޓޭބަލް ޓެނިސް ޗެމްޕިއަންޝިޕްގައި ވާދަކުރި ރާއްޖޭގެ ޒުވާން ޓީޓީ ކުޅުންތެރިޔާ ފާތިމަތު ދީމާ އަލީ އެމުބާރާތުގައި ހަތަރު މެޑަލް ހޯދައިފިއެވެ.
މުބާރާތުގައި ދީމާ ހާސިލްކުރީ އެއް ރަން މެޑައްޔާއި ތިން ލޯ މެޑަލްއެވެ. ރަން މެޑަލް ކާމިޔާބުކުރީ 19 އަހަރުން ދަށުގެ ޑަބަލްސް ޗެމްޕިއަންކަން ހޯދައިގެންނެވެ. މި އިވެންޓުގައި ދީމާއާއި އެއް ޕެއަރއެއްގައި ވާދަކުރީ ތައިލެންޑްގެ ކުޅުންތެރިޔާ ފަންގްއެވެ.
ދީމާއަށް ލޯ މެޑަލް ލިބުނީ 15 އަހަރުން ދަށުގެ ޑަބަލްސް، 15 އަހަރުން ދަށުގެ ސިންގަލްސް އަދި 17 އަހަރުން ދަށުގެ ސިންގަލްސް އިވެންޓުންނެވެ. މި ތިން އިވެންޓުގައިވެސް ދީމާ ބަލިވީ ސެމީ ފައިނަލުންނެވެ.
ދީމާ މިހާރު އަންނަނީ ސަރުކާރާއި ޓޭބަލް ޓެނިސް އެސޯސިއޭޝަނުން ގުޅިގެން ހޯދައިދިން ފުރުސަތެއްގައި ތައިލެންޑްގައި ތަމްރީނު ހާސިލްކުރަމުންނެވެ. ނިމުނު ތައިލެންޑު މުބާރާތަކީ މި މަހުގެ ފަހުކޮޅު އޮންނަ ކޮމަންވެލްތު ގޭމްސް ފެށެންވާއިރަށް ދީމާއަށް ލިބުނު ރަނގަޅު ތަޖުރިބާއަކަށް ވާނެއެވެ.
