ދީމާގެ ކާމިޔާބީއަށް ރައީސް ސާލިޙު މަރުޙަބާ ވިދާޅުވެއްޖެ

ރާއްޖޭގެ ޓޭބަލް ޓެނިސް (ޓީޓީ) ކުޅުންތެރިޔާ ފާތިމަތު ދީމާ އަލީ ހޯދި ކާމިޔާބީއަށް ކުރީގެ ރައީސުލްޖުމްހޫރިއްޔާ އިބްރާހީމް މުޙައްމަދު ސާލިހު މަރުޙަބާ ވިދާޅުވެއްޖެއެވެ.

ދީމާއަށް މަރުޙަބާ ވިދާޅުވެ ކުރީގެ ރައީސް ސާލިޙު އެކްސްގައި ކުރެއްވި ޕޯސްޓެއްގައި ވިދާޅުވީ، މިއީ މުޅި ރާއްޖޭގެ ކުޅިވަރުގެ ދާއިރާއަށްވެސް ފަޚުރުވެރި ވަގުތުކޮޅެއް ކަމަށެވެ.

އަދި މިއީ އެތައް އަހަރެއްވަންދެން ދީމާއާއި އޭނާގެ މައިންބަފައިން މެދުނުކެނޑި ކުރި ބުރަ މަސައްކަތުގެ ނަތީޖާކަމަށްވެސް ރައީސް ސާލިޙު ވިދާޅުވިއެވެ.

އޭގެ އިތުރުން، ކުރިއަށް އޮތް ތަނުގައި ވެސް ދީމާ ރާއްޖެއަށް ފަޚުރުވެރި ނަތީޖާތަކެއް ހޯދައިދޭނެކަމުގެ ޔަޤީންކަން އެބައޮތްކަމަށް ވެސް ރައީސް ސާލިޙު ވިދާޅުވިއެވެ.

ދީމާ ވަނީ ސައުތު އޭޝިއަން ރީޖަނުގެ އޮލިމްޕިކްސް ކޮލިފިކޭޝަންގެ ސިންގަލްސް ބައިގެ ޗެމްޕިއަންކަން ހޯދައި މިއަހަރު އޮންނަ އޮލިމްޕިކްސް އަށް ކޮލިފައިވެފަ އެވެ. 

ދެކުނު އޭޝިއާ ސަރަޙައްދުގެ އެންމެ މޮޅު ޓީޓީ ކުޅުންތެރީންނާ ވާދަކޮށް، ރާއްޖޭގެ ޒުވާން އަންހެން އެތުލީޓަކު ހޯދި ބޮޑު ކާމިޔާބަށް މުޅި ރާއްޖެ ފަޚުރުވެރިވާކަން އެތައް ބަޔަކު ދަނީ ފާހަގަކުރަަމުންނެވެ.

އަންނަ މަހު ފްރާންސްގައި އޮންނަ އޮލިމްޕިކްސް އަށް ދީމާ ކޮލިފައިވެފައިވާއިރު، ދީމާ އަކީ އޮލިމްޕިކްސް އަށް ކޮލިފައިވި ދިވެހި ފުރަތަމަ އެތުލެޓީވެ. މީގެ ކުރިން ރާއްޖެ އިން އޮލިމްޕިކްސްގައި ވާދަކޮށްފައި ވަނީ އިންވިޓޭޝަނަލް ފުރުސަތުންނެވެ.