މިއަހަރުގެ ޤައުމީ ޓޭބަލް ޓެނިސް (ޓީޓީ) މުބާރާތުގެ ފައިނަލްގައި ފާތިމަތު ދީމާ އަޙުމަދު ބަލިކޮށް، އައިޝަތު ރަފާ ނާޒިމް ތާރީޚީ ކާމިޔާބެއް ހޯދައި، މުބާރާތުގެ ޗެމްޕިއަންކަން ހޯދައިފި އެވެ.

އަންހެން ސިންގަލްސް އިވެންޓުގެ ފައިނަލްގައި ރަފާއާ ދެކޮޅަށް ނިކުތް ދީމާ އަކީ، ފާއިތުވި ފަސް އަހަރު ވެސް ޤައުމީ މުބާރާތުގެ ޗެމްޕިއަންކަން ހޯދާފައިވާ ކުޅުންތެރިޔާ އެވެ.

ހޮނިހިރު ދުވަހު ކުރިއަށް ދިޔަ އަންހެން ސިންގަލްސް އިވެންޓުގެ ފައިނަލްގައި ރަފާ ވަނީ، ދީމާގެ މައްޗަށް ސީދާ ފަސް ގޭމުން ކުރި ހޯދައިފަ އެވެ. މެޗުގެ ސެޓުތައް ރަފާ ކާމިޔާބު ކޮށްފައި ވަނީ 11-09، 11-09، 11-06 އަދި 15-13 އިންނެވެ. މުޅި މެޗުގައި ވެސް ރަފާގެ ފަރާތުން ވަނީ އާދަޔާ ޚިލާފު މޮޅު ކުޅުމެއް ފެނިފަ އެވެ.

މީގެ ކުރިން ބައިނަލްއަޤުވާމީ އެކި އެކި މުބާރާތްތަކުގައި ވެސް ވާދަކޮށް ރަނގަޅު ކާމިޔާބީތަކެއް ހޯދާފައިވާ ރަފާ، މީގެ ކުރިން ވަނީ ދެ ފަހަރެއްގެ މަތިން ޤައުމީ މުބާރާތުގެ ޗެމްޕިއަންކަން ހޯދައިފަ އެވެ. އެގޮތުން 2017 ވަނަ އަހަރާއި، 2018 ވަނަ އަހަރު ރަފާ ޤައުމީ މުބާރާތުގެ ޗެމްޕިއަންކަން ހޯދާފައިވާއިރު، މިއަހަރާ އެކު ރަފާ ވަނީ ތިން ފަހަރެއްގެ މަތިން ޤައުމީ މުބާރާތް ކާމިޔާބު ކޮށްފަ އެވެ.

މީގެ އިތުރުން ރަފާ ވަނީ މިކްސް ޑަބަލްސް އިވެންޓުން ވެސް ރަން މެޑަލް އަދި، ޑަބަލްސް އިވެންޓުން ރިހި މެޑަލް ހޯދައިފަ އެވެ. މިކްސް ޑަބަލްސް އިވެންޓުގައި ރަފާގެ ޕެއާ ޕާޓްނަރަކީ މޫސާ މުންސިފް އަޙުމަދު އެވެ. އަދި ޑަބަލްސް އިވެންޓުގައި ރަފާގެ ޕެއާ ޕާޓްނަރަކީ މިންހާ މަހުޖޫބު ޝުޖާއު އެވެ.

މީގެ އިތުރުން މި ފަހަރުގެ ޤައުމީ މުބާރާތުގެ ފިރިހެން ސިންގަލްސް އިވެންޓުގެ ޗެމްޕިއަންކަން ހޯދީ މުޙައްމަދު ޝައްފާން އިސްމާއީލް އެވެ. އެއީ ފައިނަލްގައި މޫސާ މުންސިފް އަޙުމަދުގެ މައްޗަށް ހަތަރު ސެޓު، އެއް ސެޓުން ކުރި ހޯދައިފަ އެވެ. މެޗުގެ ފުރަތަމަ ސެޓު މުންސިފް ކާމިޔާބު ކޮށްފައި ވަނިކޮށް، ޝައްފާން ވަނީ ފަހަތުން އަރައި މެޗުން މޮޅުވެފަ އެވެ.

މީގެ ކުރިން ޝައްފާން ވަނީ 2022 ވަނަ އަހަރު، އަދި 2023 ވަނަ އަހަރު ވެސް ޤައުމީ މުބާރާތް ކާމިޔާބު ކޮށްފަ އެވެ. ނަމަވެސް އަނިޔާގެ މައްސަލައާ ހެދި މިދިޔަ އަހަރުގެ މުބާރާތުގައި އޭނާ ވާދަކޮށްފައި ނުވާއިރު، އަނިޔާ އިން އެނބުރި އައިސް މިއަހަރުގެ މުބާރާތް ކާމިޔާބު ކުރީ އެވެ.