ހައިކޯޓުގެ ގޮފިތައް އުވާލުމާ ގުޅޭ ބިލު ތަސްދީޤުކޮށްފި
17 ޖުލައި 2022 | އާދީއްތަ 08:13ހައިކޯޓުގެ އުތުރު ގޮފި ހުންނަނީ ހދ. ކުޅުދުއްފުށީގައި
ހައިކޯޓު- ގޮފިތައް ޤާއިމުކޮށް ކޯޓުތަކުގެ ޤާނޫނަށް އިސްލާޙު ގެނައީ 2014 ވަނަ އަހަރު
ހައިކޯޓުގެ ގޮފިތައް އުވާލުމާ ގުޅޭ ބިލު ރައީސުލްޖުމްހޫރިއްޔާ އިބްރާހީމް މުޙައްމަދު ސާލިޙު ތަސްދީޤު ކުރައްވައިފިއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ޤާނޫނު ނަންބަރު، 2010/22 (ދިވެހިރާއްޖޭގެ ކޯޓުތަކުގެ ޤާނޫނު) އަށް 4 ވަނަ އިސްލާޙް ގެނައުމުގެ ބިލް ތަސްދީޤު ކުރައްވާފައިވަނީ އާދިއްތަ ދުވަހުއެވެ.
މި ބިލަކީ، މި އަހަރުގެ ޖޫން 27 ވީ ހޯމަ ދުވަހު ބޭއްވި ރައްޔިތުންގެ މަޖިލީހުގެ 2022 ވަނަ އަހަރުގެ ދެވަނަ ދައުރުގެ 19 ވަނަ ޖަލްސާއިން ފާސްކުރި ބިލެކެވެ.
މިޤާނޫނަށް ގެނައި މައިގަނޑު އިސްލާޙަކީ، ހައިކޯޓުގެ ފަނޑިޔާރުން ޤާއިމްވެ ތިބޭނީ މާލޭގައި ކަމަށް ކަނޑައެޅުމާއި، ހައިކޯޓުގެ އުތުރު ގޮތްޕާއި ދެކުނު ގޮފި އުވާލައްވައި އެތަންތަނުން ކުރަމުން އައި މަސައްކަތްތައް ދިވެހިރާއްޖޭގެ ހައިކޯޓަށް ބަދަލުކުރެއްވުމެވެ.
ހައިކޯޓުގެ އުތުރު ގޮފި ހުންނަނީ ހދ. ކުޅުދުއްފުށީގަ އެވެ. ހައިކޯޓުގެ ދެކުނު ގޮފި ހުންނަނީ އައްޑޫ ސިޓީ ހުޅުމީދޫގަ އެވެ.
މި ބިލު ތަސްދީޤު ކުރެވިގެން ދިއުމާއެކު، ހައިކޯޓުގެ ގޮފިތަކުގެ މަސައްކަތް ކުރަމުން ދިޔަ މުވައްޒަފުންނަށް އެހެން ކޯޓުތަކުން ނުވަތަ ޝަރުޢީ ދާއިރާގެ އެހެން އިދާރާއަކުން ވަޒީފާ ހަމަޖައްސައިދެއްވުމުގެ ޒިންމާ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނާއި ޙަވާލުކުރެވިގެން ދާނެއެވެ.
މިޤާނޫނު ތަސްދީޤުކުރެއްވުމާއެކު ވަނީ ދިވެހިސަރުކާރުގެ ގެޒެޓްގައި ޝާއިއުކުރެވި ޢަމަލުކުރަން ފެށިފައެވެ.
ދިވެހިރާއްޖޭގައި އެންމެ ފުރަތަމަ ހައިކޯޓެއް ޤާއިމުކުރެވިފައިވަނީ 1980 ވަނަ އަހަރުގެ އޮކްޓޯބަރު މަހުގެ 05 ވަނަ ދުވަހުގައެވެ. ހައިކޯޓު އުފެދުނީއްސުރެ ހައިކޯޓުގެ ޝަރީޢަތްތައް ޢާންމު ގޮތެއްގައި ހިނގަމުން އައިސްފައިވަނީ މާލޭގައެވެ.
ދިވެހިރާއްޖޭގެ ކޯޓުތަކުގެ ޤާނޫނަށް 1 ވަނަ އިސްލާހު ގެނައުމުގެ ޤާނޫނުން ދިވެހިރާއްޖޭގެ 2 ސަރަހައްދެއްގައި ހައިކޯޓުގެ 2 ގޮފި ޤާއިމްކޮށް، އެދެ ގޮތްޕަށް ފަނޑިޔާރުން ޢައްޔަން ކުރުމުގެ މަސްއޫލިއްޔަތު ދިވެހިރާއްޖޭގެ ސުޕްރީމްކޯޓާއި ޙަވާލުކުރެއްވުމާއި ގުޅިގެން ހައިކޯޓުގެ ދެކުނު ގޮފި ސ.ހުޅުދޫ– މީދޫގައި ވަނީ ގާއިމުކޮށްފައެވެ.
އެގޮތުން، 2015 ޑިސެމްބަރު 16 ވަނަ ދުވަހުން ފެށިގެން ޤަވާޢިދުން ޝަރީޢަތްތައް ބާއްވަމުން ގެންދިއުމަށް، ދިވެހިރާއްޖޭގެ ސުޕްރީމް ކޯޓުގެ ޤަރާރަކުން 2015 ވަނަ އަހަރުގެ ޑިސެމްބަރ މަހުގެ 13 ވަނަ ދުވަހު ކަނޑައަޅުއްވައި، އެކަން ކަމާބެހޭ ފަރާތްތަކަށް އަންގަވާފައިވެއެވެ.
ހައިކޯޓުގެ ދެކުނު ގޮތްޕައް ނިންބަތްވާ ސަރަޙައްދަކީ ގއ، ގދ، ޏ، އަދި އައްޑޫ ސިޓީއެވެ. ހައިކޯޓުގެ އުތުރު ގޮފީގައި ހިމެނޭ އަތޮޅުތަކަކީ ހއ، ހދ، ށ، ނ، ރ އަދި ބ. އަތޮޅެވެ.
ދިވެހިރާއްޖޭގެ ހައިކޯޓުގެ އުތުރު ގޮތްޕާއި، ދެކުނު ގޮފި ޤާއިމްކުރުމަށް ކޯޓުތަކުގެ ޤާނޫނަށް އިސްލާޙު ގެނައީ 2014 ވަނަ އަހަރުއެވެ.
