ވިޑާލް ފްލަމެންގޯއަށް ބަދަލުވެއްޖެ

އިންޓަރ މިލާން ދޫކޮށްލިކަން ހާމަކޮށްފައިވާ ވިޑާލް ބްރެޒިލްގެ ފްލަމެންގޯއަށް ބަދަލުވެއްޖެއެވެ.

ވިޑާލް ފްލަމެންގޯއަށް ބަދަލުވެފައިވާކަން އެ ކުލަބުން ވަނީ ރަސްމީކޮށް އިއުލާކޮށްފައެވެ. ވިޑާލްއަށް މަރުހަބާ ކިޔަމުން ފްލަމެންގޯއިން ބުނީ އެ ޓީމުގައި އޭނާ ބޭނުންކުރާނީ 32 ނަންބަރު ޖަރޒީކަމަށެވެ. މީގެ އިތުރުން ބުރާސްފަތި ދުވަހުން ފެށިގެން ފްލަމެންގޯގެ ފަރިތަކުރުންތަކުގައި ވިޑާލް ބައިވެރިވާނެއެވެ. ފްލަމެންގޯއަށް ބަދަލުވުމާ ގުޅޭ ގޮތުން ވިޑާލް ބުނީ އެއީ އޭނާގެ ހުވަފަނެއް ހަގީގަތަކަށްވުން ކަމަށެވެ.

ޔޫރަޕުގެ ބޮޑެތި ކުލަބުތަކަށް ކުޅެފައިވާ 35 އަހަރުގެ ވިޑާލް އޭނާގެ ސީނިއަރ ކެރިއަރު ފަށާފައިވަނީ ޗިލީގެ ފުޓުބޯޅަ ކުލަބެއް ކަމަށްވާ ކޮލޯ-ކޮލޯ އިން 2005 ވަނަ އަހަރުއެވެ. ދެ އަހަރު ދުވަހު އެ ޓީމަށް ކުޅުމަށްފަހު އޭނާ 2007 ވަނަ އަހަރު ބަދަލުވީ ޖަރުމަނު ލީގުގެ ބަޔާ ލެވާކުސަންއަށެވެ. އެ ޓީމުގައި ހަތަރު އަހަރު ހުރުމަށްފަހު، 2011 ވަނަ އަހަރު ވިޑާލް ބަދަލުވީ އިޓާލިއަން ލީގުގެ ޔުވެންޓަސްއަށެވެ. ޔުވެންޓަސް ދޫކޮށް 2015 ވަނަ އަހަރު އޭނާ އަނެއްކާ ވެސް ބަދަލުވީ ޖަރުމަނު ލީގުގެ ޓީމަކަށެވެ. އެފަހަރު އޭނާ ބަދަލުވީ ބަޔާން މިއުނިކަށެވެ. ބަޔާން ދޫކޮށްލުމަށްފަހު 2018 ވަނަ އަހަރު ވިޑާލް ވަނީ ސްޕެއިންގެ ބާސެލޯނާއަށް ބަދަލުވެފައެވެ. ބާސާގައި ދެ އަހަރު ހޭދަކުރުމަށްފަހު ވިޑާލް ވަނީ އެންމެ ފަހުން ކުޅުނު އިންޓަރ މިލާނަށް ބަދަލުވެފައެވެ.

ވިޑާލް ވަނީ އިންޓަރ މިލާނަށް 71 މެޗު ކުޅެދީ، އެެއް ލަނޑު ޖަހާފައެވެ. އެ ޓީމާއެކު އޭނާ ވަނީ އިޓާލިއަން ލީގު، އިޓާލިއަން ކަޕް އަދި އިޓާލިއަން ސުޕަ ކަޕް ކާމިޔާބުކޮށްފައެވެ. މީގެ އިތުރުން ވިޑާލް އަންނަނީ 2007 ވަނަ އަހަރުން ފެށިގެން ޗިލީގެ ޤައުމީ ޓީމަށް ވެސް ކުޅެމުންނެވެ. ޤައުމީ ޓީމަށް ކުޅެދިން 133 މެޗުގައި އޭނާ ވަނީ 32 ލަނޑު ޖަހާފައެވެ. ޗިލީއާއެކު ވިޑާލް ވަނީ 2015 ވަނަ އަހަރާއި 2016 ވަނަ އަހަރުގެ ކޮޕް އެމެރިކާ މުބާރާތް ކާމިޔާބުކޮށްފައެވެ. އަދި އޭނާ ވަނީ އެ ޓީމާއެކު 2017 ވަނަ އަހަރުގެ ފީފާ ކޮންފެޑެރޭޝަން ކަޕްގެ ރަނރަޕް ކަން ހޯދާފައެވެ.