ކާލޮސް ބެކާ ވިއަރެއާލް އަށް ބަދަލުވެއްޖެ

އިޓަލީގެ އޭސީ މިލާނަށް ކުޅެމުން އައި ކޮލަމްބިއާގެ އިތުބާރު ފޯވާޑް ކާލޮސް ބެކާ ސްޕެއިންގެ ވިޔަރެއާލްއަށް ބަދަލުވެއްޖެއެވެ.

އުމުރުން 30 އަހަރުގެ ބެކާ ވިޔަރެއާލްއަށް ބަދަލުވީ ލޯނެއްގެ ދަށުން 15 މިލިއަން ޕައުންޑަށެވެ. 15 މިލިއަން ޕައުންޑަށް ބެކާ ވިޔަރެއާލްއަށް ބަދަލުވިއިރު އޭނާ ގަތުމުގެ ފުރުސަތުވެސް މިލާނުން ވަނީ އެޓީމަށް ދީފައެވެ.

ތިން އަހަރަށް ފަހު ބެކާ މިލާން ދޫކޮށްލަން ނިންމި އިރު، ފަހަކަށް އައިސް ބެކާއަށް ވަނީ މިލާން ގެ ފުރަތަމަ އެގާރައިން ފުރުސަތު ނުލިބިފައެވެ. ގިނަވަގުތު ބެންޗުގައި ހޭދަކުރަން ޖެހުމުގެ ސަބަބުން ބެކާ މިލާން ދޫކޮށް ވިޔަރެއާލްއަށް ދިޔައިރު އޭނާ ދެން އެނބުރި މިލާނަށް ނުދާނެ ކަމަށް ބެލެވެއެވެ.

ބެކާ ގެނައުމަށް މީގެކުރިން އިންޓަމިލާން އަދި އޭނާގެ ކުރީގެ ކުލަބު ސެވިއްޔާއިން ވެސް މަސައްކަތް ކޮށްފައިވެއެވެ. މިލާން ދޫކޮށްލުމަށް ފަހު ބެކާ އިޓަލީގެ އެހެން ކްލަބަކަށް ބަދަލުނުވީ އޭނާ އިޓަލީގައި މަޑުކުރަން ބޭނުން ނުވާތީ ކަމަށް ރިޕޯޓުތައް ބުނެއެވެ.

2015 ވަނަ އަހަރު ސްޕެއިންގެ ސެވިއްޔާއިން މިލާނަށް ބަދަލުވި ކާލޮސް ބެކާ އަކީ، ފާއިތުވި އަހަރުތަކުގައި އެ ކްލަބުގެ ފޯވާޑް ލައިނުގައި، ވަރަށް މުހިއްމު ދައުރެއް އަދާކުރި ކުޅުންތެރިއެކެވެ. އޭނާ ވަނީ އެ ކްލަބާއެކު، އިޓާލިއަން ސުޕަކަޕް އެއް ފަހަރު ކާމިޔާބު ކޮށްފައެވެ. ބެކާ ވިޔަރެއާލްގައި ބޭނުން ކުރާނީ 9 ނަމްބަރ ޖާޒީ ކަމަށް އެކުލަބުން ވަނީ ހާމަ ކޮށްފައެވެ.

ބެކާ ވިޔަރެއާލްއަށް ބަދަލުވެފައިވާއިރު އެ ކްލަބުން އަންނަނީ އަންނަ ސީޒަނަށް ސްކޮޑު ވަރުގަދަ ކުރުމަށް، ގިނަ މަސައްކަތްތަކެއް ކުރަމުންނެވެ. އެގޮތުން މިހާތަނަށް، ވިޔަރެއާލް އިން ވަނީ ސްކޮޑު ވަރުގަދަ ކުރުމަށް ހަތަރު ކުޅުންތެރިއަކު ގެނެސްފައެވެ.

ވިޔަރެއާލް މިދިޔަ ސީޒަނުގެ، ސްޕެއިން ލީގު ނިންމާލީ ފަސްވަނާގައި އޮވެއެވެ.