ބާސާގެ ޓުވިޓާ އެކައުންޓް ހެކްކޮށް، ޑިމަރިއާ އެ ކްލަބަށް ބަދަލުވެއްޖެ ކަމަށް ޓުވީޓްކޮށްފި

ބާސެލޯނާގެ ޓުވިޓާ އެކައުންޓް ހެކްކުރުމަށްފަހު އެ ކްލަބަށް، ރެއާލް މެޑްރިޑް އަށް ކުރިން ކުޅުނު އެންހަލް ޑިމަރިއާ ބަދަލުވެއްޖެ ކަމަށް ޓުވީޓްކޮށްފި އެވެ.

ބާސާގެ ރަސްމީ ޓުވިޓާ އެކައުންޓުން ކުރި ޓުވީޓެއްގައި ބުނީ ޑިމަރިއާ އެ ކްލަބަށް ބަދަލުވެފައިވާ ކަމަށެވެ. އެހެންނަމަވެސް އެކަމާ ގުޅިގެން އިތުރު ތަފްސީލެއް ދީފައެއްނުވެއެވެ.

ރިޕޯޓްތައް ބުނާގޮތުން ބާސާގެ ޓުވިޓާ އެކައުންޓު ވަނީ ހެކްކޮށްފައެވެ. އެކައުންޓް ހެކްކުރުމަށްފަހު "އަވާ މައިން" ކިޔާ ސެކިއުރިޓީ ގްރޫޕަކުން ވަނީ އެކަން ކަށަވަރުކޮށްދީ ބާސާގެ ޓުވިޓާއިން އިތުރު ޓުވީޓެއްކޮށްފައެވެ.

ޑިމަރިއާ ބާސާ އަށް ބަދަލުވިކަމަށް އެ ކްލަބުގެ ޓުވިޓާއިން ޓުވީޓްކޮށްފައިވާއިރު، ޑިމަރިއާ ކުޅެމުން އަންނަނީ ޕީއެސްޖީއަށެވެ. މިކަމާ ގުޅިގެން ޕީއެސްޖީވެސް އަދި ޑިމަރިއާވެސް އެއްވެސް އެއްޗެއް ބުނެފައެއް ނުވެއެވެ.

ކުޅުންތެރިން ގެނެއުމާއި، ކްލަބް ދޫކޮށްދިނުމުގެ ކަންތައްތަކާ ގުޅިގެން ބާސާގެ ބޯޑާ މެދު ސަޕޯޓަރުން އަންނަނީ ނުރުހުން ފާޅުކުރަމުންނެވެ. ސަޕޯޓަރުން ނުރުހުން ފާޅުކުރަން ފެށީ އެ ކްލަބުގެ ޓްރާންސްފާ ޕޮލިސީގެ ސަބަބުންނާއި ޒުވާން ކުޅުންތެރިންނަށް ފުރުސަތު ދިނުން މަދުވުމުގެ ސަބަބުންނެވެ.

މި ޓްރާންސްފާ މާކެޓުގައި ބާސާއަށް ގެންނަން ބޭނުންވި ގިނަ ކުޅުންތެރިން އެ ޓީމަށް ގެނެވިފައި ނުވާއިރު ޓީމުގައި ތިބި ޒުވާން ކުޅުންތެރިން ވެސް އެހެނިހެން ޓީމުތަކަށް ފޮނުވާލާފުމުގެ އިޝާރާތެއް އެ ކްލަބުގެ މެނޭޖްމަންޓުން ވަނީ ކޮށްފައެވެ.