ފީފާ ކުލަބް ވޯލްޑް ކަޕްގެ ސެމީ ފައިނަލްގައި ފްލެމެންގޯ ބަލިކޮށް އަލް ޙިލާލް މުބާރާތުގެ ފައިނަލުން ޖާގަ ހޯދައިފި އެވެ.
އަންގާރަ ދުވަހުގެ ރޭ ކުޅުނު ސެމީ މެޗުން އަލް ޙިލާލް މޮޅުވީ 3-2 އިންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް އަލް ޙިލާލް އިންނެވެ. މެޗުގެ ހަތަރު ވަނަ މިނެޓުގައި އެ ޓީމަށް ލިބުނު ޕެނަލްޓީއެއް ކާމިޔާބުކޮށް ލީޑު ނަގައިދިނީ ސައުދީ އަރަބިއާގެ ސާލިމް އަލް ދައުސަރީ އެވެ. އޭގެ ފަހުން ފްލެމެންގޯ އިން ލަނޑު ޖަހައި މެޗުގެ ނަތީޖާ ހަމަހަމަ ކުރި އެވެ. މެޗުގެ 20 ވަނަ މިނެޓުގައި މަތިއުޒިންހޯ ތަނަވަސްކޮށްދިން ފުރުސަތަކުން އެ ޓީމަށް ނަތީޖާ ހަމަހަމަކޮށްދިނީ ޕެޑްރޯ އެވެ. ދެ ވަނަ ފަހަރަށް ޙިލާލް އިން ލީޑު ނެގީ ވެސް ޕެނަލްޓީއަކުންނެވެ. ފުރަތަމަ ހާފުގެ އިތުރު ވަގުތުގައި ދެ ވަނަ ޕެނަލްޓީ ވެސް ކާމިޔާބު ކުރީ ދައުސަރީ އެވެ. ދެ ވަނަ ހާފަށް ނުކުމެ ދައުސަރީ ތަނަވަސްކޮށްދިން ފުރުސަތެއްގައި އަލް ޙިލާލްގެ ތިން ވަނަ ލަނޑު ޖެހީ ލުސިއާނޯ ވިއެޓޯ އެވެ. މެޗުގައި ފްލެމެންގޯގެ ދެ ވަނަ ލަނޑު މެޗުގެ އިތުރު ވަގުތުގައި ޖެހީ ފުރަތަމަ ލަނޑު ވެސް ޖެހި ޕެޑްރޯ އެވެ.
މި މަހުގެ 12 ވަނަ ދުވަހު ކުޅުމަށް ހަމަޖެހިފައިވާ ފައިނަލް މެޗުގައި އަލް ޙިލާލާ ވާދަކުރާނެ ޓީމެއް ޔަޤީން ވަނީ ރެއާލް މެޑްރިޑާއި، އަލް އަޙްލީ ކުޅޭ ސެމީ މެޗަށްފަހު އެވެ. އެ މެޗު އޮންނާނީ ބުދަ ދުވަހުގެ ރޭ އެވެ.
