ޓީމުން ރޮނާލްޑޯ ގެންނަން ބޭނުންނަމަ ހުރަހެއް ނާޅާނަން، ނަމަވެސް އެންމެ އިސްކަމެއްދެނީ ޑިފެންސް ރަނގަޅުކުރަން: ޓުޗެލް

ޗެލްސީގައި އޭނާ އެންމެ އިސްކަމެއް ދެނީ ޓީމުގެ ޑިފެންސް ރަނގަޅުކުރަން ކަމަށް އެ ޓީމުގެ ކޯޗު ތޯމަސް ޓުޗެލް ބުނެފިއެވެ.

ޓުޗެލް މިހެން ބުނީ މެންޗެސްޓަރ ޔުނައިޓެޑް ދޫކޮށްލަން ބޭނުންވާކަން ހާމަކޮށްފައިވާ ކްރިސްޓިއާނޯ ރޮނާލްޑޯ ޗެލްސީއަށް ގެނެސްފާނެތޯ ސުވާލުުކުރުމުންނެވެ. ޓުޗެލް ބުނީ ޗެލްސީން ރޮނާލްޑޯ ގެންނަން ބޭނުންވާނަމަ އެކަމަށް އޭނާ ހުރަަސްނާޅާނެކަމަށެވެ. ނަމަވެސް މިވަގުތު ޓީމަށް އެންމެ މުހިންމީ ޑިފެންސްގައި ކުޅޭނެ ރަނގަޅު ކުޅުންތެރިންކަން ފާހަގަކޮށް އޭނާ ބުނީ، އެއީ ސިއްރެއް ނޫންކަމަށެވެ. މީގެ އިތުރުން ޓުޗެލް ބުނީ ޑިފެންސްގައި ތިބި މޮޅެތި ބައެއް ކުޅުންތެރިން ގެއްލިއްޖެކަމަށާއި، އެ ކުޅުންތެރިންގެ ބަދަލަށް އެހެން ކުޅުންތެރިން ހޯދަންޖެހޭކަމަށެވެ.

ޔުނައިޓެޑް ދޫކޮށްލާނެކަން ހާމަކޮށްފައިވާ ރޮނާލްޑޯ ހޯދުމުގެ މަސައްކަތް ޗެލްސީން ކުރާކަމަށް މީޑިއާ ރިޕޯޓުތައް ވަނީ ބުނެފައެވެ. އެކަމާ ގުޅޭ ގޮތުން ޗެލްސީގެ ކޯޗު ޓުޗެލް މިފަދައިން ވާހަކަ ދައްކާފައިވާއިރު، ރޮނާލްޑޯ ހޯދުމުގެ ޝައުގުވެރިކަމެއް ނެތްކަމަށް ޕެރިސް ސެއިންޓް ޖާމަން (ޕީއެސްޖީ)ން ވެސް ވަނީ ބުނެފައިވާކަމަށް މީޑިއާ ތަކުގައި ވަނީ ރިޕޯޓުކޮށްފައެވެ.

ކުރިއަށް އޮތް ސީޒަނަށް ޗެލްސީން އަންނަނީ ޓީމު ވަރުގަދަކުރުމުގެ މަސައްކަތްކުރަމުންނެވެ. އެގޮތުން އެ ޓީމުގެ އައު އޯނަރު ޓޮޑް ބޮހްލީ ޓީމުގެ ހިންގުމާ ހަވާލުވިފަހުން އެ ޓީމުން ހޯދި ފުރަތަމަ ކުޅުންތެރިޔަކީ، މެންޗެސްޓަރ ސިޓީއަށް ކުޅެމުން އައި ރަހީމް ސްޓާލިންގއެވެ. މީގެ އިތުރުން އެހެން ކުޅުންތެރިން ހޯދުމުގެ މަސައްކަތް ވެސް ޗެލްސީން އަންނަނީ ކުރަމުންނެވެ. ލީޑްސް ޔުނައިޓެޑަށް ކުޅެމުން އައި ބްރެޒިލްގެ ރަފީނިއާ ހޯދުމުގެ މަސައްކަތްވެސް ޗެލްސީން ވަނީ ކޮށްފައެވެ. ނަމަވެސް ރަފީނިއާގެ ޑީލް ޗެލްސީއަށް ވަނީ ކާމިޔާބުކުރެވޭގޮތް ނުވެފައެވެ. އޭނާގެ ޑީލް ކާމިޔާބުކުރީ ސްޕެއިންގެ ބާސެލޯނާއިންނެވެ.