ޖަރުމަނުގެ ބަޔާން މިއުނިކް ދޫކޮށްލަން ބޭނުންވާކަން ހާމަކޮށްފައިވާ ޕޮލޭންޑުގެ ރޮބާޓް ލެވަންޑޯސްކީ އެ ޓީމުގެ ފަރިތަކުރުންތަކަށް ހާޒިރުވެއްޖެއެވެ.

ލެވަންޑޯސްކީ ވަނީ ނިމުނު ސީޒަނަށްފަހު ބަޔާން ދޫކޮށްލަން ބޭނުންވާކަން ހާމަކޮށްފައެވެ. އެއާއެކު އޭނާ ހޯދުމުގެ މަސައްކަތް ސްޕެއިންގެ ބާސެލޯނާއިން އަންނަނީ ކުރަމުންނެވެ. ލެވަންޑޯސްކީ ވަނީ ބާސާއަށް އޭނާގެ ޝައުގުވެރިކަން އޮތް ކަން ހާމަކޮށްފައެވެ. ނަމަވެސް ބަޔާނުން އޭނާ ދޫކޮށްލާކަށް ބޭނުމެއް ނުވެއެވެ. ސަބަބެއްގެ ގޮތުގައި އެ ޓީމުން ބުނަނީ ލެވަންޑޯސްކީ އަކީ ބަޔާންގެ ކޮންޓްރެކްޓުގައި ހުރި ކުޅުންތެރިއެއް ކަމަށެވެ. ބަޔާނާއެކު އޭނާ ހަދާފައިވާ އެއްބަސްވުމުގައި ބާކީ އެއް އަހަރު އެބަ އޮތެވެ. އެ އެއްބަސްވުމުގެ މުއްދަތު ހަމަވާނީ އަންނަ އަހަރުގެ ޖޫން މަހުގެ ނިޔަލަށެވެ.

މީގެ ކުރިން ލެވަންޑޯސްކީ ބުނީ އެއްބަސްވުމުގައި ބާކީ އެއް އަހަރު އޮތުމަކީ ބަޔާނުން އޭނާ ހުއްޓުވަން ޖެހޭ ސަބަބެއް ނޫން ކަމަށެވެ. އަދި އޭނާ ޓީމު ދޫކޮށްލަން ބޭނުންވާއިރު، ޓީމުން އޭނާއަށް ހުރަސްނާޅާނެ ކަމަށް އުންމީދުކުރާ ކަމަށް ވެސް ލެވަންޑޯސްކީ ވަނީ ބުނެފައެވެ. މީގެ އިތުރުން ކުލަބް ދޫކޮށްލުމާ ގުޅޭ ގޮތުން އާންމުންގެ ތެރޭގައި ލެވަންޑޯސްކީ ވާހަކަ ދައްކާތީ ބަޔާނުން ވަނީ ނުރުހުން ފާޅުކޮށްފައެވެ.

މިކަމުގައި ލެވަންޑޯސްކީއާ ބަޔާނާ ދެމެދު ޚިޔާލު ތަފާތުވުންތަކެއް އުފެދިފައި އޮއްވާ، އޭނާ ވަނީ ބަޔާންގެ ޕްރީ ސީޒަންގެ ފަރިތަކުރުންތަކުގައި ބައިވެރިވުމަށް ހާޒިރުވެފައެވެ. ސޯޝަލް މީޑިއާގައި ދައުރުވަމުންދާ ވީޑިއޯއަކުން ފެންނަ ގޮތުގައި ލެވަންޑޯސްކީ ވަނީ އޭނާގެ ކާރުގައި ބަޔާންގެ ހެޑްކުއާޓާއަށް ހާޒިރުވެފައެވެ.

ބާސާއިން އަންނަނީ ލެވަންޑޯސްކޯ ހޯދުމުގައި ރޭހުގައި ވަރުގަދަޔަށް މަސައްކަތް ކުރަމުންނެވެ. އެގޮތުން އެ ޓީމުން އޭނާ ހޯދުމަށް އެދި 50 މިލިއަން ޔޫރޯގެ ބިޑެއް ހުށަހަޅަން ތައްޔާރުވަމުންދާ ކަމަށް މީޑިއާ ރިޕޯޓުއް ބުނެއެވެ. 33 އަހަރުގެ ފޯވާޑް އަންނަނީ ބަޔާންގައި މޮޅު ކުޅުމެއް ދައްކަމުންނެވެ. އޭނާ ވަނީ ފީފާ އިން ދޭ، ފީފާ ބެސްޓް ޕްލެޔަރ އޮފް ދަ އިޔަރ ދެ އަހަރު ހޯދާފައެވެ. އެއީ 21-2020 އަދި 22-2021 އެވެ.