އިސްރާއީލް އިން ޣައްޒާގައި ހިންގަމުން އަންނަ އަނިޔާވެރި ހަނގުރާމަ ކުރިއަށްދާއިރު ވެސް، މުޅި ދުނިޔެ އެކަމާ ހަނު އޮންނާތީ ޖޯޑަންގެ ފޮރިން މިނިސްޓަރު އައިމަން ސަފަދީ ކަންބޮޑުވުން ފާޅު ކުރައްވައިފި އެވެ.

ސްލޮވޭނިއާގައި ކުރިއަށް ދިޔަ ބްލެޑް ސްޓްރެޓެޖިކް ފޯރަމްގައި ވާހަކަ ދައްކަވަމުން ސަފަދީ ވިދާޅުވީ، ޣައްޒާގައި ކުރިއަށްދާ ހަމަލާތަކާ ގުޅިގެން މުޅި ދުނިޔެ ހަނު އޮތް ނަމަވެސް، އެހެން ތަނެއްގައި އެކަން ކުރިއަށް ދާ ނަމަ، މުޅި ދުނިޔެ ތެދުވެ އަޑު އުފުލާނެ ކަމށެވެ.

ހަނގުރާމައިގައި ކޮންމެ ދުވަހަކު ވެސް އިސްރާއީލް އިން އެތައް ބަޔަކު ޝަހީދު ކުރަމުން އަންނަ އައުމަށް އިޝާރާތް ކުރައްވައި އޭނާ ވިދާޅުވީ، 24 ގަޑިއިރުގެ ތެރޭގައި 150 އަށް ވުރެ ގިނަ މީހުން ޝަހީދު ކުރަމުން ދާއިރު ވެެސް، އެއްވެސް ފަރާތަކުން އެކަމާ ދެކޮޅަށް އަޑު އުފުލާ ކަމަކަށް ނުވާ ހިސާބަށް ދުނިޔޭގެ ނިޒާމު ގޮސްފައިވާ ކަމަށެވެ.

އެކަން ފާހަގަ ކުރައްވައި އޭނާ ވިދާޅުވެފައި ވަނީ، ފާއިތުވި 48 ގަޑި އިރުގެ ތެރޭގައި އެކަނި ވެސް، އިސްރާއީލްގެ ހަމަލާތަކުގައި 98 އަށް ވުރެ ގިނަ ފަލަސްޠީނު މީހުން ޝަހީދުވެފައިވާ ކަމަށާއި، އޭގެ ތެރޭގައި އިންސާނީ އެހީ ހޯދަން އުޅުނު އެތައް ބަޔަކާއި، ބަނޑުހައި ހޫނު ކަމުގެ ސަބަބުން ޝަހީދުވީ ނުވަ މީހަކު ވެސް ހިމެނޭ ކަމަށެވެ.

ޖޯޑަންގެ ފޮރިން މިނިސްޓަރު މިފަދައިން ވާހަކަ ދައްކަވާފައިވާއިރު، ދާދި ފަހުން އިންޓަނޭޝަނަލް އެސޯސިއޭޝަން އޮފް ޖެނޮސައިޑް ސްކޮލާސް އިން ވަނީ، އިސްރާއީލްގެ ހަމަލާތަކަކީ ނަސްލު ނައްތާލުމަށް ހިންގާ ޖަރީމާ ތަކެއް ކަމަށް ކަނޑައަޅައިފަ އެވެ.

ގާތް ގަނޑަކަށް ދެ އަހަރު ވާން ކައިރިވެފައިވާ މި ހަނގުރާމައިގައި، އިސްރާއީލް އިން ދެމުން އަންނަ ހަމަލާތަކުގައި ޣައްޒާ އިން ޝަހީދުވެފައިވާ މީހުންގެ އަދަދު ވަނީ 63،000 އަށް ވުރެ މައްޗަށް އަރައިފަ އެވެ. އަދި ހަމަލާތަކުގައި ޒަޚަމުވެފައިވާ މީހުންގެ އަދަދު ވަނީ 150،000 އަށް ވުރެ މައްޗަށް އަރައިފަ އެވެ.

ޣައްޒާގައި ބަނޑުހައި ހޫނު ކަމުގެ ޙާލަތެއް އޮތް ކަަމަށް، އދ އިން ވެސް ވަނީ މިދިޔަ މަހުގެ ފަހު ކޮޅު ރަސްމީކޮށް ކަނޑައަޅައިފަ އެވެ. އެކަން ހާމަކޮށް ނެރެފައިވާ ރިޕޯޓަކީ ޞައްޙަ ރިޕޯޓެއް ނޫން ކަަމަށް އިސްރާއީލް އިން ވަނީ ބުނެފަ އެވެ.