ޗެލްސީއަށް ބަދަލުވާން ކަލީދޫ ކުލިބަލީ އެއްބަސްވެއްޖެ

ނަޕޯލީއަށް ކުޅެމުން އަައި ސެނެގާލްގެ ސެންޓަރ ބެކް ކަލީދޫ ކުލިބަލީ އިނގިރޭސްި ޕްރިމިއަރ ލީގުގެ ޗެލްސީއަށް ބަދަލުވާން އެއްބަސްވެއްޖެއެވެ.

ސެނެގާލްގެ ކެޕްޓަން ކަން ވެސް ކުރަމުން އަންނަ ކުލިބަލީ ޗެލްސީއަށް ބަދަލުވާން އެއްބަސްވީ އޭނާގެ އެޖެންޓާއި ބައްދަލުކޮށް މަޝްވަރާކުރުމަށްފަހުއެވެ. އޭނާ ހޯދުމުގެ މަސައްކަތް ޗެލްސީން ކުރަމުން ދިޔައިރު، ނަޕޯލީގެ ކޯޗު ބުނީ ކުލިބަލީއަކީ ނަޕޯލީއަށް މުހިންމު ކުޅުންތެރިއަކަށްވުމުން، އޭނާ ކުލަބުގައި މަޑުކުރާނެ ކަމަށް އުންމީދުކުރާ ކަމަށެވެ. އަދި ކުރިއަށް އޮތް ސީޒަނުގައި ނަޕޯލީގެ ކެޕްޓަނެއްގެ ގޮތުގައި އޭނާ ފެންނަން އެދޭ ކަމަށެވެ. ނަމަވެސް އޭނާ ބުނީ، ކުލިބަލީ އެހެން ކުލަބަކާ ގުޅެން ނިންމައިފިނަމަ ނަޕޯލީން އޭނާ އަށް ޝުކުރު އަދާ ކުރާނެ ކަމަށެވެ.

ކުލިބަލީ ޗެލްސީއަށް ބަދަލުވާން އެއްބަސްވީ ފަސް އަހަރު ދުވަހުގެ މުއްދަތަކަށެވެ. އެއީ 2027 ވަނަ އަހަރުގެ ޖޫން މަހުގެ ނިޔަލަށެވެ. އޭނާ ހޯދުމަށް ފައިނަލް ޕްރޮޕޯސަލެއްގެ ގޮތުގައި ޗެލްސީން ހުށަހަޅާނީ 38 މިލިއަން ޔޫރޯގެ ޕްރޮޕޯސަލްއެކެވެ. ޗެލްސީގައި އޭނާ އަށް މުސާރައިގެ ގޮތުގައި އަހަރަކު 10 މިލިއަން ޔޫރޯ ލިބޭނެއެވެ. ކުލިބަލީ މިހާރު މަޑުކުރަމުން ދަނީ ޗެލްސީން ފައިނަލް އެއްބަސްވުން އެކުލަވާލަން ދެނެވެ.

2014 ވަނަ އަހަރު ނަޕޯލީއަށް ބަދަލުވި 31 އަހަރުގެ ކުލިބަލީ ވަނީ އެ ޓީމަށް ޖުމުލަ 317 މެޗު ކުޅެދީ، 14 ލަނޑު ޖަހާފައެވެ. މީގެ އިތުރުން އޭނާ އަންނަނީ 2015 ވަނަ އަހަރުން ފެށިގެން ސެނެގާލްގެ ޤައުމީ ޓީމަށް ވެސް ކުޅެމުންނެވެ. މިހާތަނަށް އޭނާ ވަނީ ޤައުމީ ޓީމަށް 60 މެޗު ކުޅެދީފައެވެ. ކުލިބަލީ ވަނީ ނަޕޯލީއާއެކު ކޮޕާ އިޓާލިއާގެ އިތުރުން އިޓާލިއަން ސުޕަ ކަޕް ކާމިޔާބުކޮށްފައެވެ.