ފްރާންސްގެ ޕެރިސް ސެއިންޓް ޖާމަން (ޕީއެސްޖީ)ގެ ލިއޮނަލް މެސީ އާއި ކީލިއަން އެމްބާޕޭ އަދި ނޭމާ ޖޫނިއަރ އަކީ ދުނިޔޭގައި ތިބި އެންމެ މޮޅު ތިން ކުޅުންތެރިންކަމަށް ވިޓީނިއާ ބުނެފިއެވެ.

ދާދި ފަހުން ޕޯޓޯ ދޫކޮށް ޕީއެސްޖީއަށް ބަދަލުވި ޕޯޗުގަލްގެ މިޑްފީލްޑަރު މިހެން ބުނީ އެ ޓީމަށް ބަދަލުވުމަށްފަހު އޭނާ ދިން އިންޓަވިޔުއެއްގައެވެ. 22 އަހަރުގެ ވިޓީނިއާ ޕީއެސްޖީއަށް ބަދަލުވަނީ 40 މިލިއަން ޔޫރޯއަށެވެ. އޭނާ އަކީ ޕީއެސްޖީގެ ސްޕޯޓިންގ ޑިރެކްޓަރުގެ މަގާމަށް އައްޔަންކުރި ކަމްޕޯސް މަގާމާ ހަވާލުވި ފަހުން އެކުލަބުން ހޯދި ފުރަތަމަ ކުޅުންތެރިޔާއެވެ.

ވިޓީނިއާ ވަނީ މެސީ، އެމްބާޕޭ އަދި ނޭމާއާ އެއް ޓީމަކަށް ކުޅުމާ ގޮތުން ވާހަކަދައްކާފައެވެ. އޭނާ ބުނީ އެ ތިން ކުޅުންތެރިންނާއެކު ކުޅެލުމުގެ ފުރުސަތު ލިބުމަކީ ވަރަށް ބޮޑު ފަޚުރަކާއި ޝަރަފަކަށް ވާނެ ކަމަށެވެ. މީގެ އިތުރުން އޭނާ ބުނީ އެ ތިން ކުޅުންތެރިންނަކީ ދުނިޔޭގައި ތިބި އެންމެ މޮޅު ތިން ކުޅުންތެރިން ކަމަށެވެ. އޭނާ ފާހަގަކުރި ގޮތުގައި އެ ކުޅުންތެރިންގެ ފަރާތުން އޭނާއަށް އައު ކަންތައްތަކެއް ދަސްވާނެއެވެ. ވިޓީނިއާ ބުނީ އެ ކުޅުންތެރިންނާއެކު ފަރިތަކުރުންތަކުގައި ބައިވެރިވެ، އެ ކުޅުންތެރިން އޭނާއާ ވާހަކަ ދައްކައި، ކަންކަމުގައި އެހީތެރިވުމަކީ ވެސް ބޮޑު ކަމަކަށް ވާނެއެވެ.

ޕީއެސްޖީން އަންނަނީ ކުރިއަށް އޮތް ސީޒަނަށް ޓީމު ވަރުގަދަ ކުރުމުގެ މަސައްކަތް ކުރަމުންނެވެ. އެގޮތުން އެ ޓީމުން ވަނީ ކޯޗުކަމުގެ މަގާމުގައި ހުރި މައުރީސިއޯ ޕޮޗެޓީނޯ މަގާމުން ވަކިކޮށް، އެ މަގާމަށް  ކްރިސްޓޮފް ގަލްޓިއޭ ހަމަޖައްސާފައެވެ. މީގެ އިތުރުން ޕީއެސްޖީގެ ރައީސް ނާސިރު އެލް-ހެއްލާފީ ވަނީ އަންނަ ސީޒަނަށް ޓީމު ވަރުގަދަ ކުރަމުން އަންނަ ކަމަށް ބުނެފައެވެ. އޭނާ ބުނީ ކުރިއަށް އޮތް ސީޒަނަށް ޕީއެސްޖީ ނުކުންނާނީ ބޮޑު ޕްރޮޖެކްޓަކާއެކު ކަމަށާއި، އެ ޕްރޮޖެކްޓުގައި ނުހިމެނޭ ކުޅުންތެރިންނަށް އެ ތީމުން ފުރުސަތެއް ނޯންނާނެ ކަމަށެވެ. ޕީއެސްޖީގެ އެންމެ ބޮޑު އެއް ޓާގެޓަކީ ޔުއެފާ ޗެމްޕިއަންސް ލީގު ކާމިޔާބުކުރުމެވެ.