އެމެރިކާގެ ޗިކާގޯ ފަޔާރއަށް ކުޅެމުން އަންނަ ޒުވާން ގޯލްކީޕަރު ގެބްރިއަލް ސްލޯނީނާއާއެކު ޗެލްސީއަށް އެއްބަސްވުމަކަށް އާދެވިއްޖެކަމަށް މީޑިއާ ރިޕޯޓުތައް ބުނެފިއެވެ.

ކުޅިވަރު ނޫސްވެރިޔާ ފެބްރީޒިއޯ ރޮމާނޯ ބުނި ގޮތުގައި ޗެލްސީން މިހާރު ވަނީ ސްލޯނީނާ އާއެކު އަނގަބަހުން އެއްބަސްވުމަކަށް އާދެވިފައެވެ. އޭނާ ބުނި ގޮތުގައި އެއްބަސްވުމަކަށް އާދެވުނީ ޗެލްސީގެ އޯނަރު ޓޮޑް ބޮހްލީއާއި އެ ކުލަބާ ދެމެދު ކުރެވުނު މަޝްވަރާތަކަށްފަހު ކަމަށެވެ. އެއީ 10 މިލިއަންގެ ޑީލެއްގެ ކަމަށާއި، ސްލޯނީނާ ޗެލްސީއަސް ބަދަލުވާނީ، ލޯނު އެއްބަސްވުމެއްގެ ދަށުން ޗިކާގޯ ފަޔާރއަށް ކުޅެވޭ ގޮތަށް ކަމަށް ވެސް ރޮމާނޯ ވަނީ ބުނެފައެވެ.

މީގެ އިތުރުން ރޮމާނޯ ބުނި ގޮތުގައި ސްލޯނީނާ ހޯދުމުގެ ގޮތުން ޗެލްސީން މި ހަފްތާގެ ތެރޭގައި ރަސްމީކޮށް ބިޑު ހުށަހަޅާނެކަމަށް ލަފާކުރެވެއެވެ.

ސްލޯނީނާ އޭނާގެ ސީނިއަރ ކެރިއަރު ޗިކާގޯ ފަޔާރއިން ފަށާފައިވަނީ 2021 ވަނަ އަހަރުއެވެ. 18 އަހަރުގެ ޒުވާން ސްލޯނީނާ ވަނީ ޗިކާގޯ ފަޔާރއަށް 30 މެޗު ކުޅެދީފައެވެ. އެއީ އެމެރިކާގެ މޭޖަރ ލީގު ސޮކާގެ މެޗުތަކެކެވެ.

ޗެލްސީގެ އިތުުރުން ސްޕެއިންގެ ގަދަ އެއް ބާރު ރެއާލް މެޑްރިޑުން ވެސް ވަނީ މީގެ ކުރިން ސްލޯނީނާ ހޯދުމުގެ ޝައުގުވެރިކަން ފާޅުކޮށްފައެވެ.