10 ނަމްބަރު ޖަރޒީއާއެކު ޕޮގްބާ އަލުން ޔުވެންޓަސްއަށް
ޕޮގްބާ ސޮއިކުރީ ހަތަރު އަހަރުގެ އެއްބަސްވުމެއްގައި
ޕޮގްބާ ޔުވެންޓަސްގެ ކުޅުންތެރިއެއްގެ ގޮތުގައި ތަޢާރަފްކުރަނީ: ފޮޓޯ-ޔުވެންޓަސް
10 ނަމްބަރު ޖަރޒީއާއެކު މިޑްފީލްޑަރ ޕޮގްބާ އެނބުރި ޔުވެންޓަސްއަށް ބަދަލުވެއްޖެއެވެ.
10 ނަމްބަރު ޖަރޒީގައި ޔުވެންޓަސްގައި ކާމިޔާބު ހޯދި ޕޮގްބާ މެންޗެސްޓަރ ޔުނައިޓެޑްގައި ހޭދަކުރި ނާކާމިޔާބު ދުވަސްތަކަށްފަހު އެނބުރި ކުރީގެ ކްލަބާ ގުޅުނީ ހިލޭ އެއްބަސްވުމެއްގެ ދަށުންނެވެ. އަލުން ޔުވެންޓަސްއާ ގުޅުމަށްފަހު ޕޮގްބާ ބުނީ އެނބުރި އާދެވުމުން އުފާވެފައި ހުރިކަމަށާއި, ޔުވެންޓަސްއާއެކު އަލުން ތަށި ހޯދަން ބޭނުންވާކަމަށެވެ. 29 އަހަރުގެ މިޑްފީލްޑަރ ޔުވެންޓަސްއާއެކު ސޮއިކުރީ ހަތަރު އަހަރުގެ އެއްބަސްވުމެއްގައެވެ. މިދިޔަ ސީޒަންގައި ޔުވެންޓަސްގެ 10 ނަމްބަރު ޖަރޒީ ބޭނުންކުރީ ދިބާލާއެވެ. ކުރިއަށް އޮތް ސީޒަންގައި އޭނާ ޔުވެންޓަސްގައި ނުހުންނާނެއެވެ. ޕޮގްބާގެ އިތުރުން ހިލޭ އެއްބަސްވުމެއްގެ ދަށުން އާޖެންޓީނާގެ ވިންގަރ ޑި މާރިއާވެސް ވަނީ ޔުވެންޓަސްއަށް ބަދަލުވެފައެވެ.
ޕޮގްބާ އެންމެ ފަހުން މެންޗެސްޓަރ ޔުނައިޓެޑަށް ކުޅުނީ އޭޕްރީލް 19 ވަނަ ދުވަހުއެވެ. އޭގެ ފަހުން އަނިޔާގެ ސަބަބުން އޭނާ ނުކުޅެއެވެ. ޕޮގްބާ ޔުވެންޓަސްއިން ޔުނައިޓެޑަށް ބަދަލުވީ ރެކޯޑް ޓްރާންސްފާއެއްގައެވެ. އެކަމަކު ޔުވެންޓަސްގައި ދެއްކި މޮޅު ކުޅުން ޔުނައިޓެޑްގައި ނުދެއްކުނެވެ. އެކަމަކު ފްރާންސް ޤައުމީ ޓީމްގައި ޕޮގްބާގެ ފަރާތުން ތަފާތު ފެނެއެވެ. 2018 ވަނަ އަހަރު ވަރލްޑްކަޕް ހޯދި ޓީމްގައިވެސް ޕޮގްބާ ތަފާތު ދެއްކިއެވެ.
