ޔުވެންޓަސް އިން ބޭނުން ވަނީ އެ ކުލަބަށް ކުޅެމުން އަންނަ ފްރާންސްގެ ޕައުލް ޕޮގްބާގެ އެއްބަސްވުން އުވާލަން ކަމަށް، މީޑިއާ ރިޕޯޓުތައް ބުނެފި އެވެ.

އުމުރުން 31 އަހަރުގެ ކުޅުންތެރިޔާ ޔުވެންޓަސް އަށް ބަދަލުވީ 2022 ވަނަ އަހަރު އެވެ. އެ ކުލަބާ އެކު އޭނާ ސޮއި ކޮށްފައި ވަނީ ހަތަރު އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. ޔުވެންޓަސް އަށް ކުޅެމުން އަންނަނިކޮށް ޕޮގްބާ އަށް ވަނީ ހަތަރު އަހަރު ދުވަހުގެ ސަސްޕެންޝަނަކާ ކުރިމަތިލާން ޖެހިފަ އެވެ. މިއަހަރުގެ މާޗު މަހުގެ ތެރޭގައި ޕޮގްބާ ސަސްޕެންޑު ކުރުމަށް ނިންމީ، މަނާ ބޭހެއް ބޭނުން ކުރި މައްސަލައިގަ އެވެ.

އިޓަލީގެ އެންޓި ޑޯޕިން އެޖެންސީ (ނާޑޯ) ކުރިއަށް ގެންދިޔަ ތަހުލީލުތަކަށް ފަހު ޕޮގްބާ ސަސްޕެންޑު ކުރުމަށް ނިންމި ނިންމުން އޭނާ ވަނީ ކޯޓް އޮފް އާބިޓްރޭޝަން ފޯ ސްޕޯޓްސް (ކާސް) ގައި އިސްތިއުނާފު ކޮށްފަ އެވެ. އެ މައްސަލަ ބެލުމަށް ފަހު ކާސް އިން ނިންމާފައި ވަނީ ޕޮގްބާގެ ސަސްޕެންޝަނަށް ލުއި ދިނުމަށެވެ. އެ ސަސްޕެންޝަންގެ މުއްދަތު 18 މަސް ދުވަހަށް ކުޑަ ކުރުމަށް ކާސް އިން ނިންމުމާއެކު، އަންނަ އަހަރުގެ މާޗު މަހުގެ ތެރޭގައި އަލުން ފުޓުބޯޅަ ކުޅުމުގެ ތެރެއަށް ޕޮގްބާ އަށް އާދެވޭނެ އެވެ. އަދި އަންނަ އަހަރުގެ ޖަނަވަރީ މަހުން ފެށިގެން ޔުވެންޓަސްގެ ފަރިތަކުރުންތަކުގައި ވެސް އޭނާ އަށް ބައިވެރިވެވޭނެ އެވެ.

އެހެން ނަމަވެސް، މީޑިއާ ތަކުގައި މިހާރު ބުނެފައިވާ ގޮތުން ޔުވެންޓަސް އިން ބޭނުން ވަނީ ޕޮގްބާގެ އެއްބަސްވުން އުވާލުމަށެވެ. އެގޮތުން އެކަމާ ގުޅުން ހުރި މަޝްވަރާތައް ޔުވެންޓަސް އިން ޕޮގްބާއާ ކުރަމުން އަންނަ ކަމަށާއި، އެއްބަސްވުން އުވާލަން ޕޮގްބާ ވެސް ޤަބޫލު ވާނެ ކަމަށް ވަނީ ރިޕޯޓުތައް ބުނެފަ އެވެ. އެގޮތުން ޕޮގްބާ ޤަބޫލު ކުރާ ގޮތުގައި އޭނާގެ ކެރިއަރަށް މިހާރު އެންމެ ރަނގަޅީ، އައު ފެށުމެއް ފެށުން ކަމަށް ވެސް ރިޕޯޓުތަކުގައި ބުނެފައިވެ އެވެ.

ޔުވެންޓަސް އަށް ބަދަލުވިތާ މާގިނަ ދުވަހެއް ނުވެ، ކުލަބުގެ ފަރިތަކުރުމުގެ ތެރެއިން ޕޮގްބާ އަށް ވަނީ އަނިޔާވެފަ އެވެ. އެއާއެކު އޭނާ ވަނީ ގިނަ ދުވަހު ކުޅުމާ ދުރުގައި ހުންނަން ޖެހިފަ އެވެ. އެ އަނިޔާގެ ސަބަބުން 2022 ވަނަ އަހަރު ޤަތަރުގައި އޮތް ފީފާ ވޯލްޑް ކަޕް ކުޅުމުގެ ފުރުސަތު ވެސް ޕޮގްބާ އަށް ވަނީ ގެއްލިފަ އެވެ.