ދެ އަހަރުގެ އެއްބަސްވުމެއްގެ ދަށުން ޕޮގްބާ މޮނާކޯ އަށް
ޕޮގްބާ ވަނީ މޮނާކޯއާ އެކު ދެ އަހަރު ދުވަހުގެ އެއްބަސްވުމެއްގައި ސޮއި ކޮށްފަ އެވެ. އެ އެއްބަސްވުމުގެ މުއްދަތު ހަމަވާނީ 2027 ވަނަ އަހަރުގެ ޖޫން މަހުގެ ނިޔަލަށެވެ.
މޮނާކޯގެ އެއްބަސްވުމުގައި ސޮއި ކުރުމަށް ފަހު ޕޮގްބާ
ފްރާންސްގެ ޕައުލް ޕޮގްބާ، މޮނާކޯ އަށް ބަދަލު ވެއްޖެ އެވެ.
އިޓަލީގެ ޔުވެންޓަސް އަށް ކުޅެމުން އަންނަނިކޮށް، އުމުރުން 32 އަހަރުގެ ޕޮގްބާ އަށް ވަނީ ހަތަރު އަހަރު ދުވަހުގެ ސަސްޕެންޝަނަކާ ކުރިމަތިލާން ޖެހިފަ އެވެ. މިދިޔަ އަހަރުގެ މާޗު މަހުގެ ތެރޭގައި ޕޮގްބާ ސަސްޕެންޑު ކުރުމަށް ނިންމީ، މަނާ ބޭހެއް ބޭނުން ކުރި މައްސަލައިގަ އެވެ.
އިޓަލީގެ އެންޓި ޑޯޕިންގ އެޖެންސީ (ނާޑޯ) ކުރިއަށް ގެންދިޔަ ތަހުލީލު ތަކަށް ފަހު، ޕޮގްބާ ސަސްޕެންޑު ކުރުމަށް ނިންމި ނިންމުން. ކޯޓް އޮފް އާބިޓްރޭޝަން ފޯ ސްޕޯޓްސް (ކާސް) ގައި ޕޮގްބާގެ ފަރާތުން އިސްތިއުނާފު ކުރި އެވެ.
އެ މައްސަލަ ބެލުމަށް ފަހު ކާސް އިން އޭރު ނިންމީ ޕޮގްބާގެ ސަސްޕެންޝަނަށް ލުއި ދިނުމަށެވެ. އެ ސަސްޕެންޝަންގެ މުއްދަތު 18 މަސް ދުވަހަށް ކުޑަ ކުރުމަށް ކާސް އިން ނިންމުމާއެކު، މިހަރުގެ މާޗު މަހުގެ ތެރޭގައި އަލުން ފުޓުބޯޅަ ކުޅުމުގެ ތެރެއަށް ޕޮގްބާ އަށް އޮތީ އާދެވޭ ގޮތަށެވެ.
ނަމަވެސް، އެ މައްސަލައިގެ ތެރޭގައި ޔުވެންޓަސް އިން ވަނީ ޕޮގްބާގެ އެއްބަސްވުން އުވާލައިފަ އެވެ. ޔުވެންޓަސް އާއެކު އޭނާ ސޮއި ކޮށްފައި އޮތް އެއްބަސްވުމުގެ މުއްދަތު ހަމަވާން އޮތީ ވެސް އަންނަ އަހަރު އެވެ. ނަމަވެސް، މަނާ ބޭހެއް ބޭނުން ކުރި ކަމުގެ މައްސަލައިގައި ސަސްޕެންޑު ކުރުމުން ޔުވެންޓަސް އިން ނިންމީ އޭނާގެ އެއްބަސްވުން އުވާލުމަށެވެ.
އަލުން ފުޓުބޯޅަ ކުޅުމުގެ ތެރެއަށް އައުމަށް، ޕޮގްބާ ވަނީ މޮނާކޯ އަށް ބަދަލުވެފަ އެވެ. އެ ކުލަބުގެ އެއްބަސްވުމުގައި އޭނާ ސޮއި ކޮށްފައިވާއިރު، މޮނާކޯ އިން ވަނީ އެކަން ރަސްމީކޮށް އިއުލާން ވެސް ކޮށްފަ އެވެ. އެގޮތުން ޕޮގްބާ ވަނީ މޮނާކޯއާ އެކު ދެ އަހަރު ދުވަހުގެ އެއްބަސްވުމެއްގައި ސޮއި ކޮށްފަ އެވެ. އެ އެއްބަސްވުމުގެ މުއްދަތު ހަމަވާނީ 2027 ވަނަ އަހަރުގެ ޖޫން މަހުގެ ނިޔަލަށެވެ.
މެންޗެސްޓަރ ޔުނައިޓެޑުން ސީނިއަރ ކެރިއަރު ފެށި ޕޮގްބާ އެ ކުލަބު ދޫކޮށް ޔުވެންޓަސް އަށް ބަދަލުވީ 2012 ވަނަ އަހަރު އެވެ. އޭގެ ފަހުން 2016 ވަނަ އަހަރު ދެ ވަނަ ފަހަރަށް ޔުނައިޓެޑަށް ދިޔުމަށް ފަހު، 2022 ވަނަ އަހަރު އަނެއްކާ ވެސް އޭނާ ވަނީ ޔުވެންޓަސް އަށް ބަދަލުވެފަ އެވެ.
އެންމެ ފަހުން ޔުވެންޓަސްގައި ހޭދަ ކުރި މުއްދަތުގެ ތެރޭގައި އޭނާ ވަނީ އެ ކުލަބަށް 12 މެެޗު ކުޅެދީފަ އެވެ. ޕޮގްބާގެ އިތުރުން، މޮނާކޯ އިން އަންނަނީ ސްޕެއިންގެ ޒުވާން ކުޅުންތެރިޔާ އަންސޫ ފާޓީ ހޯދުމުގެ މަސައްކަތް ވެސް ކުރަމުންނެވެ.
