އިޓާލިއަން ލީގުގައި ޔުވެންޓަސް އިން ކުޅުނު ދެ ވަނަ މެޗުން ވެސް މޮޅުވެއްޖެ އެވެ.

ހޯމަ ދުވަހުގެ ރޭ ހެލާސް ވެރޯނާގެ ދަނޑުގައި ކުޅުނު މެޗު ޔުވެންޓަސް އިން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި ޔުވެންޓަސް އިން ދެ ލަނޑު ޖެހިއިރު، ފަހު ލަނޑު އެ ޓީމުން ޖެހީ ފަހު ހާފުގަ އެވެ.

މެޗު ފަށައިގެން 28 ވަނަ މިނެޓުގައި ޔުވެންޓަސް އަށް ލީޑު ނަގައިދިނީ ޑޫސަން ވްލަހޮވިޗް އެވެ. އޭގެ ފަހުން ފުރަތަމަ ހާފުގެ 39 ވަނަ މިނެޓުގައި ޔުވެންޓަސްގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ނިކޮލޯ ސަވޯނާ އެވެ. ފަހު ހާފު ފަށައިގެން މެޗުގެ 53 ވަނަ މިނެޓުގައި ޔުވެންޓަސް އަށް ލިބުނު ޕެނަލްޓީ ކާމިޔާބުކޮށް، ތިން ވަނަ ލަނޑު ޖެހީ ވްލަހޮވިޗް އެވެ.

މިހާތަނަށް ކުޅުނު ދެ މެޗުން ވެސް މޮޅުވެ، ޔުވެންޓަސް އެއް ވަނައިގައި އޮތްއިރު، އެ ޓީމުގެ ތިން ވަނަ މެޗުގައި އަމިއްލަ ދަނޑުގައި ނިކުންނާނީ ރޯމާއާ ދެކޮޅަށެވެ.