އޭނާގެ ޙަޔާތުގައި އަބަދު ވެސް ތެދުވެރިކަމާއި، ނަޒާހަތްތެރިކަން އިސް ކުރާނެ ކަމަށް، ފްރާންސްގެ ޕައުލް ޕޮގްބާ ބުނެފި އެވެ.
ޕޮގްބާ މިހެން ބުނީ މަނާ ބޭހެއް ބޭނުން ކުރި ކަމުގެ މައްސަލައިގައި ފުޓުބޯޅަ އިން އޭނާ ސަސްޕެންޑު ކުރުމަށް ނިންމި ނިންމުމަށް، ލުއި ދިނުމަށް ނިންމުމާ ގުޅިގެންނެވެ. އުމުރުން 31 އަހަރުގެ ޕޮގްބާ ސަސްޕެންޑު ކުރުމަށް ނިންމާފައި ވަނީ މިއަހަރުގެ މާޗު މަހުގެ ތެރޭގަ އެވެ. އޭނާ ސަސްޕެންޑު ކުރީ އިޓަލީގެ އެންޓި ޑޯޕިން އެޖެންސީ (ނާޑޯ) ކުރިއަށް ގެންދިޔަ ތަހުލީލުތަކަށް ފަހު އެވެ. އެ ތަހުލީލުތަކަށްފަހު، ޕޮގްބާ މަނާ ބޭހެއް ބޭނުން ކޮށްފައިވާކަން ސާބިތުވުމާ އެކު، އޭނާ އަށް ވަނީ ހަތަރު އަހަރު ދުވަހުގެ ސަސްޕެންޝަނަކާ ކުރިމަތިލާން ޖެހިފަ އެވެ.
ނަމަވެސް ޕޮގްބާ ވަނީ އެ މައްސަލަ ކޯޓް އޮފް އާބިޓްރޭޝަން ފޯ ސްޕޯޓްސް (ކާސް) ގައި އިސްތިއުނާފު ކޮށްފަ އެވެ. މައްސަލަ ބެލުމަށްފަހު ކާސް އިން ނިންމާފައި ވަނީ ޕޮގްބާގެ ސަސްޕެންޝަންގެ މުއްދަތު ކުޑަ ކުރުމަށެވެ. އެގޮތުން ކާސް އިން ވަނީ ޕޮގްބާގެ ސަސްޕެންޝަންގެ މުއްދަތު 18 މަސް ދުވަހަށް ލުއި ކޮށްފަ އެވެ. އެއާއެކު 2025 ވަނަ އަހަރުގެ މާޗު މަހުގެ ތެރޭގައި ޕޮގްބާ އަށް އަލުން އެނބުރި ފުޓުބޯޅަ ކުޅުމުގެ ތެރެއަށް އާދެވޭނެ އެވެ.
އެކަމާ ގުޅޭ ގޮތުން ވާހަކަ ދައްކަމުން ޕޮގްބާ ބުނީ، މިހާތަނަށް އޭނާ ދެކެމުން އައި ބިރުވެރި ހުވަފެންތަކަށް ނިމުން އަތުވެއްޖެ ކަމަށެވެ. އަދި އަނެއްކާ ވެސް އޭނާގެ އުންމީދުތަކައިގެން ކުރިއަށް ދެވޭނެ ދުވަހަކަށް ކެތްމެދުވެފައި ހުރި ކަމަށް ވެސް ޕޮގްބާ ވަނީ ބުނެފަ އެވެ. ޕޮގްބާ ބުނީ ދުވަހަކު ވެސް އެންޓި ޑޯޕިންގެ ޤަވާއިދާ އޭނާ ޚިލާފުވެފައި ނުވާނެ ކަމަށާއި، އޭނާ އަކީ ތެދުވެރިކަމާއި، ނަޒާހަތްތެރިކަން އިސްކުރާނެ މީހެއް ކަމަށެވެ. ހަމަ އެހެންމެ، ކާސް އިން އޭނާގެ ތަފުސީލުތައް އަޑު އަހައި، ނިންމި ނިންމުމަށް ޝުކުރު އަދާ ކުރާ ކަމަށް ވެސް ޕޮގްބާ ބުންޏެވެ.
މީގެ އިތުރުން ޕޮގްބާ ބުނީ އެކަމަކީ އޭނާގެ ޙަޔާތުގައި ކުރިމަތިވި ވަރަށް އުނދަގޫ އަދި ހިތާމަވެރި ކަމެއް ކަމަށެވެ. ސަބަބަކީ ވަރަށް ބުރަކޮށް މަސައްކަތް ކުރަމުން އަންނަނިކޮށް، ކުއްލި އަކަށް ހުއްޓުން އަރާފައި ހުންނަން ޖެހުމުން ކަމަށް ވެސް ޕޮގްބާ ބުންޏެވެ. އޭނާ ވަނީ މިދިޔަ މުައްދަތުގައި އޭނާ އަށް ހިތްވަރުދިން ފަރާތްތަކަށް ޝުކުރު އަދާ ކޮށްފަ އެވެ. އަދި އަލުން އެނބުރި ފުޓުބޯޅަ ދަނޑަށް އަންނަން ކެތްމަދުވެފައި ހުރިކަމަށް ވެސް ޕޮގްބާ ބުންޏެވެ.
މެންޗެސްޓަރ ޔުނައިޓެޑު ދޫކޮށް ޕޮގްބާ ޔުވެންޓަސް އަށް ބަދަލުވީ 2022 ވަނަ އަހަރުގެ ޖުލައި މަހުގެ ތެރޭގަ އެވެ. އެ ކުލަބާއެކު އޭނާ ވަނީ ހަތަރު އަހަރު ދުވަހުގެ އެއްބަސްވުމެއް އެކުލަވާލައިފަ އެވެ. ޔުވެންޓަސް އަށް ބަދަލުވިތާ މާގިނަ ދުވަހެއް ނުވެ، ކުލަބުގެ ފަރިތަކުރުމުގެ ތެރެއިން ޕޮގްބާ އަށް ވަނީ އަނިޔާވެފަ އެވެ. އެއާއެކު އޭނާ ވަނީ ގިނަ ދުވަހު ކުޅުމާ ދުރުގައި ހުންނަން ޖެހިފަ އެވެ. އެ އަނިޔާގެ ސަބަބުން 2022 ވަނަ އަހަރު ޤަތަރުގައި އޮތް ފީފާ ވޯލްޑް ކަޕް ކުޅުމުގެ ފުރުސަތު ވެސް ޕޮގްބާ އަށް ވަނީ ގެއްލިފަ އެވެ.
