ޕޮގްބާގެ ސަސްޕެންޝަނަށް ލުއި ދޭން ނިންމައިފި

މަނާ ބޭހެެއް ބޭނުން ކުރުމުގެ މައްސަލައިގައި ފުޓުބޯޅަ އިން ސަސްޕެންޑު ކޮށްފައިވާ ޕައުލް ޕޮގްބާގެ ސަސްޕެންޝަނަށް ލުއި ދޭން ނިންމައިފި އެވެ.

އުމުރުން 31 އަހަރުގެ ޕޮގްބާ ސަސްޕެންޑު ކުރުމަށް ނިންމާފައި ވަނީ މިއަހަރުގެ ކުރީ ކޮޅު އެވެ. އޭނާ ސަސްޕެންޑު ކުރީ އިޓަލީގެ އެންޓި ޑޯޕިން އެޖެންސީ (ނާޑޯ) ކުރިއަށް ގެންދިޔަ ތަހުލީލުތަކަށް ފަހު އެވެ. އެ ތަހުލީލުތަކަށްފަހު، ޕޮގްބާ މަނާ ބޭހެއް ބޭނުން ކޮށްފައިވާކަން ސާބިތުވުމާ އެކު، އޭނާ އަށް ވަނީ ހަތަރު އަހަރު ދުވަހުގެ ސަސްޕެންޝަނަކާ ކުރިމަތިލާން ޖެހިފަ އެވެ.

ނަމަވެސް ޕޮގްބާ ވަނީ އޭނާގެ މައްސަލަ އިސްތިއުނާފަށް ހުށަހަޅައިފަ އެވެ. ކޯޓް އޮފް އާބިޓްރޭޝަން ފޯ ސްޕޯޓްސް (ކާސް) އިން އެ މައްސަލަ ބެލުމަށް ފަހު ނިންމާފައި ވަނީ، ޕޮގްބާގެ ސަސްޕެންޝަންގެ މުއްދަތު ކުޑަ ކުރުމަށެވެ. އެގޮތުން ކާސް އިން ވަނީ ޕޮގްބާގެ ސަސްޕެންޝަންގެ މުއްދަތު 18 މަސް ދުވަހަށް ލުއި ކޮށްފަ އެވެ. އެއާއެކު 2025 ވަނަ އަހަރުގެ މާޗު މަހުގެ ތެރޭގައި ޕޮގްބާ އަށް އަލުން އެނބުރި ފުޓުބޯޅަ ކުޅުމުގެ ތެރެއަށް އާދެވޭނެ އެވެ.

މެންޗެސްޓަރ ޔުނައިޓެޑު ދޫކޮށް ޕޮގްބާ ޔުވެންޓަސް އަށް ބަދަލުވީ 2022 ވަނަ އަހަރުގެ ޖުލައި މަހުގެ ތެރޭގަ އެވެ. އެ ކުލަބާއެކު އޭނާ ވަނީ ހަތަރު އަހަރު ދުވަހުގެ އެއްބަސްވުމެއް އެކުލަވާލައިފަ އެވެ. ޔުވެންޓަސް އަށް ބަދަލުވިތާ މާގިނަ ދުވަހެއް ނުވެ، ކުލަބުގެ ފަރިތަކުރުމުގެ ތެރެއިން ޕޮގްބާ އަށް ވަނީ އަނިޔާވެފަ އެވެ. އެއާއެކު އޭނާ ވަނީ ގިނަ ދުވަހު ކުޅުމާ ދުރުގައި ހުންނަން ޖެހިފަ އެވެ. އެ އަނިޔާގެ ސަބަބުން 2022 ވަނަ އަހަރު ޤަތަރުގައި އޮތް ފީފާ ވޯލްޑް ކަޕް ކުޅުމުގެ ފުރުސަތު ވެސް ޕޮގްބާ އަށް ވަނީ ގެއްލިފަ އެވެ.